كەشە، 2019 جىلدىڭ 10 ماۋسىمىندا شامامەن كەشكى ساعات 18.00-دەن 2019 جىلدىڭ 11 ماۋسىمى 02.00-گە دەيىن الماتىدا بىرنەشە ادامنان قۇرالعان توپ قوعامدىق ءتارتىپتى بۇزۋعا جول بەردى. اتالعان قۇقىق بۇزۋشىلىققا قاتىسۋشىلاردى پوليتسيا ۇستادى. قازىرگى ۋاقىتتا اتالعان وقيعا بويىنشا قۇقىق قورعاۋ ورگاندارى تاراپىنان تولىق قۇقىقتىق باعا بەرىلگەن جوق. بۇل رەتتە ينسينۋاتسيانى بولدىرماۋ ءۇشىن جانە حالىققا دۇرىس حابار بەرۋ ماقساتىندا پوليتسيا وكىلدەرى راستالعان بىرقاتار فاكتىلەردى مالىمدەپ وتىر.

بىرىنشىدەن. 10 ماۋسىم كۇنى كەشكى ساعات 18.00-دە «العاباس» ىقشاماۋدانىندا «الاتاۋ» تەاترىنىڭ الدىندا ر. زايىتوۆتىڭ شاقىرۋىمەن رۇقسات ەتىلمەگەن ميتينگ وتكىزۋ ءۇشىن ءبىر توپ ادام جينالدى. ميتينگ ۇيىمداستىرماۋ تۋرالى حابارلاماعا قۇلاق اسپاعان ولار، پوليتسياعا قارسىلىق كورسەتىپ، ارتىنشا ۇستالدى.

ونىڭ ۇستىنە، ولاردىڭ كەيبىرەۋلەرى الماتى ارەنا اۋدانىنداعى جولدى جاۋىپ تاستادى. ر.زايىتوۆپەن اڭگىمەلەسۋ جۇرگىزىلگەننەن كەيىن ول بوساتىلدى. الايدا وسى ارالىقتا الماتى قالاسى پوليتسيا دەپارتامەنتىنىڭ («تسەليننىي» عيماراتى) الدىندا وعان قولداۋ كورسەتۋ ءۇشىن ءبىر توپ ادام جينالدى. ۇيىنەن قايتىپ ورالعان ر.زايىتوۆ جينالعان قاۋىمدى ەشقانداي زاڭسىز ءىس-شارالارعا قاتىسپاۋعا جانە ارانداتۋشىلىق جاساماۋ جونىندە ءوتىنىش ءبىلدىردى.

جينالعاندار بىرنەشە توپقا ءبولىنىپ، قالا بويىنشا تارايدى. بىراق ارالارىنداعى بىرەۋى جەكە اۆتوكولىگىنە وتىرىپ، تولە بي جانە اباي كوشەلەرىندەگى قوزعالىستى شەكتەيدى. بۇدان وزگە ءۇش-ءتورت اۆتوكولىك بىرىگىپ، كولوننا ۇيىمداستىرىپ، اقىرىن جىلدامدىقپەن قوزعالدى. ءتۇرلى دىبىس سيگنالدارىن پايدالانعان ولار سول جەردەگى باسقا كولىكتەردىڭ قالىپتى قوزعالىسىنا كەدەرگى كەلتىردى. سول ساتتە ءبىر توپ ادامدار كولىك جۇرەتىن جولدىڭ بويىنا شىعىپ، اپاتتى جاعداي تۋعىزادى. بۇل ادامدار دا وزدەرىن دورەكى ۇستاپ، قاتتى ايقايلاپ، ىسقىرىپ، قوعامدىق ءتارتىپتى بۇزدى. زاڭسىز ارەكەتكە بارعاندار قانداي دا ءبىر تالاپ، شارت قويعان ەمەس.

ەكىنشىدەن. زاڭسىز اكتسيالاردىڭ قاتىسۋشىلارى بىرنەشە قىلمىستىق ارەكەتكە دە باردى. ماسەلەن، تۇنگى بىرلەر شاماسىندا تولە بي داڭعىلى مەن وتەگەن باتىر كوشەسىنىڭ قيىلىسىندا «سايران» اۆتوۆوكزالىنا قاراما-قارسى جاقتا زاڭسىز اكتسياعا قاتىسۋشى ءبىر كولىك جول-كولىك قوزعالىسىن رەتتەۋمەن اينالىسىپ جۇرگەن جول-پاترۋلدىك پوليتسيا قىزمەتكەرىن قاعىپ كەتتى. دارىگەرلەردىڭ ايتۋىنشا، ونىڭ وڭ جاق جىلىنشىگى ىعىسىپ، جامباس-بەرتس سۇيەگىندە جابىق سىنۋ بار.

جۇرگىزۋشى قىلمىس ورنىنان بوي تاسالاعانىمەن، كوپ ۇزاماي قر قىلمىستىق كودەكسىنىڭ 345-بابىندا كورسەتىلگەن قىلمىس بەلگىلەرى بويىنشا ۇستالدى. الماتى قالاسىنىڭ الاتاۋ اۋدانىندا كەشكى ۋاقىتتا ءبىر توپ ادام ماس كۇيىندە پوليتسيا اۆتوكولىگىنە زاقىم كەلتىرگەن. ولار ماشينانى سىندىرىپ، ونى تاستارمەن لاقتىردى. ءتارتىپ بۇزۋشىلار ۇستالدى. بۇل فاكت قر قىلمىستىق كودەكسىنىڭ 293 بابى بويىنشا سوتقا دەيىنگى تەرگەۋدىڭ بىرىڭعاي تىزىلىمىندە تىركەلگەن.

ۇشىنشىدەن. اتالعان قۇقىق بۇزۋشىلىقتار بويىنشا كەشكى جانە تۇنگى ۋاقىتتا كولل-ورتالىعىنا قالالىقتاردان 1250 ءوتىنىش كەلىپ ءتۇستى. ونىڭ 70 پايىزى تۇنگى وقيعالار. تۇرعىندار تۇنگى ۋاقىتتاعى ايقاي-شۋدان قورىققان. ال جۇرگىزۋشىلەر جول قوزعالىسى ەرەجەلەرىن ورەسكەل بۇزعاندارعا نارازى بولدى. پوليتسيا ورگاندارى زاڭسىز ءىس-ارەكەتتەردىڭ جولىن كەسۋ بويىنشا ءتيىستى شارالار قابىلدادى. قۇقىق بۇزۋشىلار ۇستالدى.

قازىرگى ۋاقىتتا الماتىداعى جاعداي تولىعىمەن باقىلاۋعا الىندى. كولىكتىڭ جانە بارلىق قىزمەتتەردىڭ قالىپتى جۇمىس ىستەۋى قامتاماسىز ەتىلدى. كوشەلەردە قاۋىپسىزدىكتى قامتاماسىز ەتۋ بويىنشا بارلىق شارالار قابىلداندى. پوليتسيا قوعامدىق ءتارتىپتى بۇزۋعا جول بەرمەيتىنىن، كەز-كەلگەن قۇقىققا قارسى ارەكەتتەرگە، ازاماتتاردىڭ ءومىرى مەن قاۋىپسىزدىگىنە قاتەر توندىرۋگە جول بەرمەيتىنىن مالىمدەيدى.

قوسىمشا مالىمەتتەر اقپاراتتىڭ ناقتىلانۋىنا قاراي باق-تا حابارلاناتىن بولادى.

Abai.kz