بەيسەنبى, 18 شىلدە 2019
535 1 پىكىر 18 ماۋسىم, 2019 ساعات 11:51

اسقار مامين جاڭادان قۇرىلعان ەكى مينيسترلىكتىڭ باسشىسىن تانىستىردى

قازاقستان رەسپۋبليكاسىنىڭ پرەمەر-ءمينيسترى اسقار مامين ەكولوگيا، گەولوگيا جانە تابيعي رەسۋرستار جاڭا مينيسترلىگىنىڭ ۇجىمىمەن كەزدەسۋدە قر پرەزيدەنتىنىڭ جارلىعىمەن ۆەدومستۆو ءمينيسترى بولىپ تاعايىندالعان ماعزۇم مىرزاعاليەۆتى تانىستىردى.

ەكولوگيا، گەولوگيا جانە تابيعي رەسۋرستار مينيسترلىگىنە قورشاعان ورتانى قورعاۋ، تابيعي رەسۋرستاردىڭ ۇتىمدى پايدالانىلۋىن قاداعالاۋ، گەولوگيا جانە مينەرالدى-شيكىزاتتىق بازانى قايتا ءوندىرۋ وكىلەتتىكتەرى، سونداي-اق، قاتتى تۇرمىستىق قالدىقتاردىڭ اينالىمى، سۋمەن جابدىقتاۋ جانە سۋ تارتۋ، ورمان شارۋاشىلىعى ماسەلەلەرى بەرىلدى.

ا. مامين م. مىرزاعاليەۆتىڭ بىلىكتى مامان، تاجىريبەلى باسشى ەكەنىن اتاپ ءوتتى. ول مۇناي-گاز سالاسىندا جۇمىس ىستەگەن، «قازمۇنايگاز» ۇك توراعاسىنىڭ ورىنباسارى، مۇناي جانە گاز ۆيتسە-ءمينيسترى قىزمەتتەرىن اتقارعان. قازىرگى تاڭعا دەيىن ەنەرگەتيكا ۆيتسە-ءمينيسترى لاۋازىمىن اتقاردى.

سونىمەن قاتار، پرەمەر-مينيستر اسقار مامين جاڭا قر ساۋدا جانە ينتەگراتسيا مينيسترلىگىنىڭ ۇجىمىنا مەملەكەت باسشىسىنىڭ جارلىعىمەن تاعايىندالعان باسشى باقىت سۇلتانوۆتى تانىستىردى.

اسقار مامين تانىستىرۋ بارىسىندا ب. سۇلتانوۆتىڭ باسشىلىق قىزمەتتەردەگى كوپ جىلدىق جۇمىس تاجىريبەسىن اتاپ ءوتتى. ول ەكونوميكا جانە بيۋدجەتتىك جوسپارلاۋ، قارجى مينيسترلىكتەرىن باسقارعان. ءتۇرلى جىلدارى پرەمەر-ءمينيستردىڭ ورىنباسارى، پرەزيدەنتتىڭ كومەكشىسى، پرەزيدەنت اكىمشىلىگى باسشىسىنىڭ ورىنباسارى قىزمەتتەرىن اتقارعان. وسىعان دەيىن نۇر-سۇلتان قالاسىنىڭ اكىمى قىزمەتىن اتقارعان.

قر ساۋدا جانە ينتەگراتسيا مينيسترلىگىنە ىشكى جانە سىرتقى ساۋدا ساياساتى، ەكسپورتتى ۇيلەستىرۋ جانە ىلگەرىلەتۋ، تەحنيكالىق رەتتەۋ جانە ستاندارتتاۋ سالاسىنداعى فۋنكتسيالار بەرىلگەن.

Abai.kz

1 پىكىر