الماتىدا «Almaty Nordic Walking Fest 2019» اتاۋىمەن سكانديناۆيالىق ءجۇرىس بويىنشا العاشقى فەستيۆال ءوز مارەسىنە جەتتى. شارانىڭ باستى ۇيىمداستىرۋشىسى - قىسقى وليمپيادا ويىندارىنىڭ كۇمىس جۇلدەگەرى ەلەنا حرۋستالەۆانىڭ وليمپيادالىق قورى.

ورتا ازيا ەلدەرى بويىنشا العاش رەت ۇيىمداستىرىلعان جارىسقا 200-دەن استام ادام قاتىسقان. قازاقستاندىقتاردان بولەك، رەسەي، وزبەكستان جانە قىرعىزستان ەلدەرىنەن دە قاتىسۋشىلار كەلگەن. جارىستىڭ ەڭ جاس قاتىسۋشى – 14 جاستا.

«بۇل شارانىڭ ماقساتى – قاراپايىم ادامدار اراسىندا بۇقارالىق سپورتتى دامىتۋ. سالاۋاتتى ءومىر سالتىنا جەتەلەيتىن سكانديناۆيالىق ءجۇرۋ ءادىسى جاس تالعامايدى. بىزدە ۆەلوسيپەد تەبۋگە، جۇگىرۋگە جاعدايلار جاسالعان. بىراق كەيبىر ادامداردىڭ وعان دەنساۋلىعى جاراماۋى مۇمكىن. ال سكانديناۆيالىق ءجۇرۋ ادىسىمەن كەز-كەلگەن ادام اينالىسا الادى»، - دەيدى ەلەنا حرۋستالەۆا اتىنداعى وليمپيادالىق قور ديرەكتورى، وليمپيادا جۇلدەگەرى ەلەنا حرۋستالەۆا.

الداعى ۋاقىتتا فەستيۆال جىل سايىن تۇراقتى تۇردە وتكىزىلەتىن بولادى. سونداي-اق فەستيۆال اياسى كەڭەيىپ، الماتىدان بولەك، نۇر-سۇلتان، شىمكەنت قالالارىندا، كورشىلەس قىرعىزستان جانە وزبەكستان مەملەكەتتەرىن دە وتكىزۋ جوسپارلانعان.

ايتا كەتسەك، سكانديناۆيالىق ءجۇرىس سپورتى باتىس ەۋروپادا، سكانديناۆيا تۇبەگىندە وتە تانىمال. سپورتتىڭ بۇل ءتۇرىن قازاقستانعا العاش رەت 2014 جىلى رەسەيلىك جاتتىقتىرۋشى ماكسيم پروششەنكو الىپ كەلگەن. ول ورتالىق ازيادا العاش رەت سكانديناۆيالىق جۇرىسكە باعىتتالعان كاسىبي «ەۆرازيا» مەكتەبىن اشقان.

بۇگىندە ەلىمىز بويىنشا ارنايى دايىندايتىن 120-دان استام كاسىبي مامان جۇمىس ىستەيدى. اتالمىش مەكتەپتىڭ الماتى، نۇر-سۇلتان، وسكەمەن، پاۆلودار، قىزىلوردا، ريددەر، سەمەي، بىشكەك پەن تاشكەنت قالالارىندا ارنايى فيليالدارى قىزمەت ەتەدى.

سكانديناۆيالىق ءجۇرىس – دەنە ءپىشىنىن، حال-احۋالدى جانە كوڭىل-كۇيدى جاقسارتۋ، سونىمەن قاتار سالماقتى باقىلاۋدىڭ قاراپايىم، قولجەتىمدى جانە وتە ءتيىمدى ءتاسىلى.

Abai.kz