قازاقستان جازۋشىلار وداعىنىڭ شىعارماشىلىق ءۇيى وتكەن عاسىردا عابيت مۇسىرەپوۆ سەكىلدى ۇلى جازۋشىلاردىڭ باستاماسىمەن سالىنعان ەكەن. الماتى قالاسىنىڭ ەڭ ءبىر ادەمى جەرىنە ورىن تەپكەن شىعارماشىلىق ءۇيى كەڭەس وداعى كەزىندە اقىن-جازۋشىلاردىڭ جايلى قونىسى بولعان كورىنەدى. تالاي ۇلى قالامگەرلەرىمىز وسىندا دەمالىپ، تالاي ۇلى شىعارمالار وسىندا دۇنيەگە كەلگەن دەسەدى.

سول شىعارماشىلىق ءۇيى كەيىن كەلە جازۋشىلار ءۇشىن جات ورىنعا اينالدى. مەنشىك يەسى جازۋشىلار وداعى بولعانىمەن، پايداسىن باسقا ادامدار كورىپ ءجۇردى. ءار ءتۇرلى ادامدار جالعا الىپ، ءوز كاسىپتەرىن جاسادى. بيىل سول شىعارما­شىلىق ءۇيى قايتا جاساقتالىپ، شيپا­جايعا اينالىپ وتىر. ەندى ونى وسى ۇيىمعا مۇشە كەز كەلگەن قالامگەر جەڭىلدەتىلگەن تارتىپپەن پايدالانۋىنا بولادى. ءۇش ۋاقىتقى تاماعى مەن جوعارى ساپاداعى قىزمەتىن قاتار ۇسىنىپ وتىرعان شيپاجايدا قالامگەرلەر قولجەتىمدى قارجىمەن قالاعانىنشا دەمالا الادى. سونداي-اق، قارت قالامگەرلەر ءۇشىن دە جەڭىلدىكتەر قاراستىرىلعان ەكەن.

بايان جاناسباەۆا، «Al-Farabi» ەمدەۋ-ساۋىقتىرۋ ورتالىعىنىڭ ديرەكتورى:

- جازۋشىلار وداعىمەن كەلىسە وتىرىپ، وسى شيپاجايدى اشتىق. جۇمىسىمىزدى باستاعانىمىزعا ەندى ەكى اي بولدى. ال رەسمي اشىلۋ ءراسىمى جاقىندا عانا ءوتتى. شيپاجايدىڭ اشىلۋىنا وداق باسشىسى ۇلىقبەك ەسداۋلەتوۆ، اكادەميك سەرىك قيراباەۆ، كوزى ءتىرى كلاسسيكتەرىمىز: ءابدىجامىل نۇرپەيىسوۆ، قابدەش ءجۇمادىلوۆ سىندى اتاقتى قالامگەرلەرىمىز كەلىپ، باتاسىن بەرىپ كەتتى. ول كىسىلەردىڭ ءبارى جازۋشىلار وداعىندا وسىنداي شيپاجاي اشىلىپ جاتىر دەپ قۋانىشتارىن ءبىلدىردى.

سونىمەن، تەك قالامگەرلەر عانا ەمەس، كەز-كەلگەن ادام كەلىپ دەمالىپ، ەم قابىلداي الاتىن شيپاجاي ءوز جۇمىسىن باستادى. قازىر جەتپىستەن استام ادام شىعارماشىلىق ۇيىنەن شيپاجايعا اينالعان ورتالىقتا دەمالىپ جاتىر. قوناقتارىمىز قازاقستاننىڭ ءار تۇكپىرىنەن كەلۋدە. اسىرەسە، اقتاۋ، اتىراۋ سىندى باتىس ايماقتاردان ارنايى كەلىپ دەمالۋشىلار كوپ.

ال قالامگەرلەرگە 50% جەڭىلدىك جاسالادى. جازۋشىلار وداعىمەن كەلىسىمگە كەلگەندە وسىلاي كەلىستىك. قىزمەت كورسەتۋ مەن اس-سۋى بىردەي، بىراق باعادا ەلۋ پايىز جەڭىلدىك بار.

شيپاجايمىزدا 45 نومەر بار. مولشەرمەن ءبىر جولدا 90 ادامدى قابىلداي الامىز. دەمالۋشىلاردى ءتورت مەزگىل تاماقپەن، ءتۇرلى ەمدەۋ شارالارىمەن قامتاماسىز ەتەمىز. سونىمەن قاتار، تەننيس، ۆولويبول، باسكەتوبول، شاحمات، دويبى جانە بيليارد ويناۋعا بولادى. تازا اۋا مەن تىنىش تابيعاتىنىڭ ءوزى دەمالۋشىلار ءۇشىن ۇلكەن مۇمكىندىك بولىپ وتىر.

ەستۋىمشە، بۇرىن بۇل ورتالىقتىڭ جەرى قازىرگىدەن ۇلكەن بولعان ەكەن. وكىنىشكە وراي، كەيىن جارتىسى ساتىلىپ كەتكەن كورىنەدى. ابىز اقساقالىمىز ءابىدىجامىل نۇرپەيىسوۆتىڭ ءوزى وسىعان كۇيىنىش ءبىلدىرىپ وتىر. شيپاجايدىڭ اشىلۋ راسىمىنە كەلگەندە سول جەرلەردى قايتارىپ الۋ كەرەك ەكەنىن قاداپ ايتىپ كەتتى ول كىسى. اقساقالدىڭ ايتۋىنشا، اۋلادا ءوسىپ تۇرعان قوس بايتەرەكتى عابيت مۇسىرەپوۆ ءوز قولىمەن ەككەن ەكەن.

نەسىپ ءجۇنىسباي، قازاقستان جازۋشىلار وداعىنىڭ مۇشەسى، جازۋشى، جۋرناليست

- شىعارماشىلىق ءۇيى - ورنالاسقان جەرى تاماشا، قالانىڭ شۋىنان قاشىق، اۋماعى جاسىل جەلەككە ورانعان ناعىز شىعارماشىلىقپەن اينالىسۋعا لايىق ورىن. ونى جاقسىلاپ جوندەپ، قالامگەرلەردىڭ شىعارما جازاتىن مەككەسىنە اينالدىرۋعا بولاتىنىن، مىنە، كورىپ وتىرمىز.

جاقىندا 15 كۇن دەمالىپ قايتتىم. جاعدايلارى جاقسى ەكەن. ءۇش ۋاقىتتىق تاماعى دايىن، مەدەتسينالىق قىزمەت تۇرلەرىمەن تولىق قامتىلعان. ءارى دەمالىپ، ءارى ەمدەلىپ، ءارى شىعارما جازىپ قايتۋعا بولادى. ماعان ۇنادى. وزىمە سالسا، جىل ون ەكى اي جاتۋعا دا قارسى بولماس ەدىم.

بۇل جەرگە وسىدان وتىز جىل بۇرىن، جازۋشىلار وداعىنىڭ شىعارماشىلىق ءۇيى بولىپ تۇرعان كەزدە دە كەلىپ دەمالىپ ەدىم. ءبىر شىعارمامدى وسىندا جازدىم. اسقار سۇلەيمەنوۆ سىندى ۇلكەن جازۋشىمەن بىرگە جاتتىم. ءتىپتى، اسقار اعامەن بيليارد ويناپ، 25 رۋبل ۇتىپ العانىم بار. ول كىسىنىڭ ءوزى «نەسىپتەن بيلياردتان ۇتىلعانىم ءۇشىن» دەپ، جازىپ بەردى ول اقشاعا. بۇل شىعارماشىلىق ءۇيىن وسىنداي ۇلى تۇلعالارىمىزدىڭ ادەمى ەستەلىكتەرى قالعان جەر دەپ بىلەمىن.

بۇنداي جەردە ۇلكەن جازۋشىلارمەن بىرگە جاتۋدىڭ جاس قالامگەرلەرگە پايداسى مول. ولار ۇلكەندەردەن كوپ دۇنيەنى ۇيرەنەر ەدى. سول ءۇشىن بۇكىل قازاق قالامگەرلەرىن وسى شىعارماشىلىق-شيپاجاي ۇيىندە جاتىپ شىعارما جازۋعا شاقىرامىن. ءوزىمىزدىڭ شىعارماشىلىق وردامىزعا ءوزىمىز قولداۋ بىلدىرمەي قاڭىراتىپ بوس قويعانىمىز جارامايدى. «بىرەۋگە بەرىپ قويدى»، «ساتىلىپ كەتتى» دەپ ءار جەردە بوس ءسوز ايتىپ، بىتپەيتىن داۋدى قۋعانشا، سول شىعارماشىلىق ۇيىمىزگە بارىپ دەمالىپ، ەمدەلىپ، شىعارما جازىپ قايتۋعا مىندەتتىمىز.

ءسوز سوڭىندا قازاقتىڭ ۇلى جازۋشىلارىنىڭ ءىزى قالعان كونە شيپاجايدا دەمالعىسى كەلگەن كوپشىلىككە مىنا مالىمەتتەردى ۇسىنامىز.

شيپاجايدا ءبىر تاۋلىك تىنىعىپ، ەم قابىلداۋدىڭ قۇنى 15 مىڭ تەڭگە (قالامگەرلەرگە 50% جەڭىلدىك).

ادرەس: الماتى قالاسى، مەدەۋ اۋدانى، تايمانوۆ كوشەسى 222ا;

بايلانىس نومەرلەرى: +7 701 887 1595, +7 777 470 1919, +7 727 386 7783

قۋانىش قاپپاس

Abai.kz