مەملەكەت باسشىسى توتەنشە جاعداي بولعان ايماقتان كوشىرىلگەن تۇرعىنداردى ورنالاستىرۋ بويىنشا اتقارىلىپ جاتقان جۇمىستاردىڭ بارىسىمەن تانىستى. پرەزيدەنت قاۋىپسىز جەرلەرگە كوشىرىلگەن ارىس قالاسىنىڭ تۇرعىندارىن ىستىق تاماقپەن، مەديتسينالىق جاردەممەن قامتاماسىز ەتىپ، باسقا دا بارلىق قاجەتتى كومەك كورسەتۋدى تاپسىردى.

قاسىم-جومارت توقاەۆ ازاماتتاردىڭ قاۋىپسىزدىگى مەن ولاردىڭ دۇنيە-مۇلىكتەرىنىڭ ساقتالۋىن باقىلاۋدا ۇستاۋ قاجەتتىگىن ەسكەرتتى. مەملەكەت باسشىسى ىشكى ىستەر مينيسترلىگىنە، اسىرەسە بالالارعا ەرەكشە كوڭىل ءبولۋدى تاپسىردى.

– وسى تارتىپپەن جۇمىستى جالعاستىرىڭىزدار. ۇكىمەتكە قالاعا جانە ونىڭ تۇرعىندارىنا كومەكتەسۋ تۋرالى تاپسىرما بەرىلدى. قازىر ءبىز ەڭ ءبىرىنشى كەزەكتە ادامداردىڭ، قالا تۇرعىندارىنىڭ قاۋىپسىزدىگىن قامتاماسىز ەتۋىمىز كەرەك. ەكىنشى – كورسەتىلەتىن كومەكتەر. ارنايى قور قۇرىلدى. ارىسقا بۇكىل قازاقستان كومەكتەسەدى. مەن حالىقپەن جۇمىس ىستەپ جاتقان قالانىڭ جۇرتشىلىعىنا، ارداگەرلەرگە ريزاشىلىعىمدى بىلدىرەمىن. جارىلىستىڭ سەبەپتەرىن انىقتاۋ قاجەت. قىلمىستىق ءىس قوزعالدى، تەرگەۋ-تەكسەرۋ باستالدى. ەگەر كىنالىلەر بولسا، ولار زاڭمەن قاتاڭ جازالانادى. الداعى ۋاقىتتا ارىس جارىلعىش قۇرىلعىلاردىڭ بارلىعىنان تازارتىلۋى ءتيىس، – دەدى قازاقستان پرەزيدەنتى.

قاسىم-جومارت توقاەۆ ءورت پەن وق-دارىلەردىڭ جارىلىس بولعان جەرلەردى قالپىنا كەلتىرۋ جونىندە بىرقاتار ناقتى تاپسىرمالار بەردى.

مەملەكەت باسشىسىنىڭ ءباسپاسوز حاتشىسى بەرىك ءۋالي facebook-تەگى پاراقشاسىندا قورعانىس ءمينيسترى نۇرلان ەرمەكباەۆتىڭ پرەزيدەنتكە ارىستاعى جاعدايدى بايانداپ تۇرعان ساتىنەن سۋرەتتەر جاريالادى.

Abai.kz