پرەزيدەنتتى  ۇلىقتاۋ راسىمىندە قاسىم-جومارت توقاەۆ ۇسىنعان ەلىمىزدى تىعىرىقتان شىعارۋدىڭ 10 باعىتى تۋرالى جانە ساياسي-الەۋمەتتىك سالادا جۇرگىزگەن ءوز زەرتتەۋلەرىمىز توڭىرەگىندە  كوكەيگە تۇيگەن كەيبىر وزەكتى ماسەلەلەر  جونىندە وقىرمانمەن وي ءبولىسۋدى ءجون كورىپ وتىرمىز.

ءيا، ەلىمىزدەگى قازىرگى الەۋمەتتىك-ەكونوميكالىق احۋال اسا كۇردەلى.  كوپبالالى انالاردىڭ بيىل بىرنەشە رەت ۇكىمەتكە قول جايىپ، كومەك سۇراپ، كوشەگە شىقتى. بۇل بۇرىن بولماعان ادەت. ال سايلاۋ تۇسىنداعى 9-13 ماۋسىم كۇندەرى ەلىمىزدىڭ باستى قالالارىندا رۇقسات ەتىلمەگەن ميتينگىگە شىعىپ، ەشقاشان بولماعان  ءتورت مىڭعا تارتا ادام نارازىلىق ءبىلدىردى. كەز كەلگەن ساياسي-الەۋمەتتىك جاعدايدى تەرەڭ تالداپ ۇيرەنگەن   قاسىم-جومارت توقاەۆ بۇل ەكى ساۋالدىڭ دا ءتۇپ-توركىنى: «قاراپايىم  حالىقتىڭ كەدەيشىلىككە ۇشىراۋىنان» ەكەنىن اشىپ ايتتى. «بيلىك ەستىدى. ىسكە كىرىسەمىز!» دەپ ۋادە بەردى. بۇل جوعارى بيلىكتىڭ العاش رەت مويىنداۋى...

جۇرتتىڭ ابدەن زىعىردانىن قايناتقان سىبايلاس جەمقورلىقپەن كۇرەستى شۇعىل كۇن تارتىبىنە قويدى. ەلىمىزدىڭ بولاشاعى جاستارعا قولداۋ كورسەتۋ، كوبىرەك قىزمەتكە تارتۋ باستالىپ تا كەتتى. "مەنىڭ تاپسىرمام بويىنشا، پرەزيدەنتتىڭ كادرلىق رەزەرۆى قۇرىلىپ، وعان 300 جاس مامان ەنگىزىلەدى. اكىمدەردىڭ مىندەتى-رەزەرۆكە ەڭ دارىندى جانە كەلەشەگىنەن ءۇمىت كۇتتىرەتىن جاس باسقارۋشىلاردى ىرىكتەۋ" دەدى پرەزيدەنت  قاسىم-جومارت توقاەۆ. بۇل قۋانىشتى، ارينە.  بىراق ءىس مۇنىمەن بىتە مە؟

ادەتتە، مەملەكەت ءبىر دامۋ فورماتسياسىنان ەكىنشىسىنە وتەردەگى ءولىارا كەزەڭدە تۋىندايتىن الگىندەي كوپ پروبلەمانى تۇبەگەيلى شەشۋ ءۇشىن ەلباسى ءوز ەركىمەن كەيىنگى جاڭا تولقىنعا جول بەرۋى الەم الدىندا بيىك پاراساتتىلىقتى پايىمداتتى. ايتسە دە، جاڭا مەملەكەت باسشىسى الدىندا تۇرعان مىندەت تە وسال ەمەس ەكەنى كامىل.

مەملەكەت باسشىسى: «اشىق جانە ءادىل جۇمىس ىستەيمىز. قوعامدا قوردالانعان كەز كەلگەن ماسەلەگە قاتىستى ۇسىنىس ەنگىزىڭىزدەر، قاراستىرامىز، بىرلەسىپ شەشىم قابىلدايمىز» دەدى. اشىقتىق-باستى ۇستانىمى ەكەنىن كەيىن دە قايتالاپ ايتتى. بۇل ءبىر كەزدەرى تىعىرىققا تىرەلگەندە  بار قيىندىقتى حالقىنا اشىپ ايتىپ، قوعامدى قولداۋعا شاقىرعان  وڭتۇستىك كورەيا بيلىگى تاجىريبەسىن دە ەسكە سالادى.

ال، دانا حالىقىمىز:«اۋرۋىن جاسىرعان ولەدى»، «ءمىن تۇزەلمەي، سىن تۇزەلمەيدى» دەمەدى مە. شىندىعىنا كەلسەك، حالىق قازىر اشىنعان. بۇرىنعى «قالعىعان» قازاق از. مۇنى كەشەگى سايلاۋ تۇسىندا دا كوردىك. اشىنۋىنا وبەكتيۆتى دە، سۋبەكتيۆتى دە سەبەپ كوپ. سونىڭ ۇشەۋىنە عانا توقتالايىن.

ءبىرىنشى سەبەپ. تاۋەلسىزدىگىمىزدىڭ سوناۋ تاڭ سارىسىندە ەلباسىنىڭ: «...كۋۆەيتتەن دە باي تۇراتىن ەل بولامىز. اراب امىرلىگىندە دۇنيەگە كەلگەن ءاربىر نارەستەنىڭ ەسەپ شوتانا   $ 20 مىڭ سالسا، ءبىز ولاردان جيىرما  ەسە كوپ سالامىز، ويتكەنى ولاردىڭ مۇنايى عانا بار، بىزدە مەندەلەەۆتىڭ 92 ەلەمەنتىنىڭ ءبارى بار» دەگەن وڭ نيەتى نەگە ورىندالمادى؟ بۇل ساۋال الەۋمەتتىك جەلىلەردى كەزگەلى قاشان؟. وسىنشاما بايلىقتىڭ ۇستىندە وتىرىپ نەگە الگىندەي  كەدەيشىلىككە ۇرىنامىز؟ وسىعان وي جىبەرىپ كورەلىكشى، كانە. بيلىك پەن حالىقتىڭ اراسىنا  سىنا بوپ قاعىلعان ساۋالدىڭ ءبىرى وسى.

ەكىنشى سەبەپ. قازاق قاشاننان اناسىنا اۋليەدەي باس يگەن، جەتىمىن جىلاتپاعان، جەسىرىن قاڭعىرتپاعان ەل ەدىك قوي. انالارىمىزدىڭ جاردەم سۇراپ شەرۋگە شىعۋى بۇرىن قازاقتا بولماعان ادەت. ولاردى مۇنداي قايىرشىلىق كۇيگە تۇسىرگەن نە؟ ول - جۇمىسسىزدىق، جالاقىنىڭ ازدىعى. بۇل پرەزيدەنتتىككە ۇمىتكەرلەردىڭ سايلاۋالدى كەزدەسۋلەرىندە كوتەرىلگەن ماسەلە. سامساتىپ تسيفرلار كەلتىرمەي-اق قويايىق. بىرەر مىسال. مىناۋ الماتىعا قاراڭىز! وتكەن 80-جىلدارى تۇرعىنى ميلليونعا جەتپەگەن الماتىدا جۇمىس ىستەگەن وننان استام الپاۋىت زاۋىت پەن فابريكا،  سان  مىڭ قىز-كەلىنشەك ەڭبەك ەتكەن  ماقتا-ماتا كومبيناتى، جالپى سانى 20-دان استام ءىرى-ءىرى  ءوندىرىس ورىندارى كەلمەسكە كەتكەن. جۇرتتىڭ ءبارى بىردەي بيۋدجەتتىك قىزمەتكەر ەمەس، سوندا بۇگىندە 2 ملن.-عا جۋىق الماتى تۇرعىندارى نەمەن كۇن كورىپ وتىر؟

نەمەسە، كەزىندە جارتى ميلليوننىڭ ماڭىندا عانا تۇرعىنى بولعان اقمولاداعى كەڭەستىك  اۋماعى ات شاپتىرىم «تسەلينسەلماش»، «كازسەلماش» ءتارىزدى الىپتار باستاعان ونعا تارتا ءوندىرىس ورىندارى بۇگىندە بايىرعى تۇرعىنداردىڭ تۇسىنە عانا كىرەدى.. ولاردىڭ ورنىن باسار قانداي  ىلكىمدى كاسىپورىن  سالا الدىق؟ ەلىمىزدىڭ وزگە قالالارىنداعى احۋال دا وسى.

ەگەر  ەلىمىزدە ورتا كاسىپكەرلىك، شاعىن ءوندىرىس ورىندارى ءالى دە دامي قويماعانىن ەسكە الساق، جالاقىنىڭ نەگە ماردىمسىز ەكەنىن، قانشاما ايەلدەر مەن قىزدارىمىز، ديپلومدى جاستار جۇمىسسىز جۇرگەنىن ويلاپ كورىڭىزشى... وعان دالەل - جىلىنا مىڭداعان جاس جالاقى كۋىپ وڭتۇستىك كورەياعا، ت.ب.ەلدەرگە اتتاناتىنى. سوڭعى بىرەر جىلدا عانا 38 مىڭ ادام ەلدەن كوشىپ كەتكەن.  ال، وتباسىنىڭ ءجيى اجىراسۋى، ءوز-وزىنە قول سالۋ، ءدىني جات اعىمعا ىلەسۋ، ءتۇرلى ازعىندىق قىلمىستاردىڭ دەنى ەڭ الدىمەن، تۇرمىسى نارشارلىقتان تۋىندايدى ەكەن...

مەملەكەنت باسشىسى 12 ماۋسىم كۇنگى اكىمدەرمەن كەزدەسۋىندە: «اكىمدەردىڭ قىزمەتى جاڭا جۇمىس ورىندارىن اشۋعا باعىتتالۋى كەرەك ەكەنىن» قاداپ  ايتتى. بۇل اكىمدەر جۇمىسىنىڭ باستى كورسەتكىشى بولۋعا ءتيىس» دەگەن مىندەت جۇكتەدى. دەمەك، اتالعان پروبلەما  باستى نازاردا. ەندى اۋىر دا بولسا اۋىل جايىنا ءسال توقتالساق...

ءيا، اۋىل دەيمىز. اۋىل ءبىزدىڭ گەنوفوندىمىز، قازاقى قاسيەتتەرىمىزدىڭ - تالبەسىگى. قانشاما ءان، ولەڭ-جىر ارنادىق. ال سول اۋىلدا قالعان جۇمىس ءتۇرى مىناۋ: مەكتەپ مۇعالىمدەرى، اكىمدىكتەگى 3-4 قىزمەتكەر، مەدپۋنكتەگى 1-2 مەدبيكە... ال، ەكى-ءۇش قانا سوزىلاتىن وراق، ءشوپ شابۋدان باسقا ۋاقىتتا اۋىلدىڭ بۇكىل جاستارى جۇمىسسىز وتىرادى. ءار كولحوزدا بولعان متس-تار  جوق، تەحنيكا ناشار. جۇمىس جۇرمەيدى. مادەنيەت ۇيلەرى ساتىلىپ كەتكەن. ديپلوممەن  اۋىلعا بار دەۋدىڭ ءوزى ۇيات! اۋىلدا مال باعا الماعاندار، جان باعۋ ءۇشىن قالاعا اعىلۋدا. بۇل وركەنيەتتى ەلدەردەگىدەي مادەنيەتتى ۋربانيزاتسيا ەمەس، «جابايى ۋربانيزاتسياعا» اينالىپ كەتتى.

ۇكىمەتتەن پاتەر، جاردەم سۇراپ جاپپاي  اكىمدىكتەرگە، ميتينگىگە شىعىپ جۇرگەندەردىڭ دە  باسىم كوپشىلىگى  سول اۋىلدان كوشىپ كەلگەندەر. بۇل جىل باسىندا ەلىمىزدى اياعىنان تىك تۇرعىزعان باس قالامىزدا  ورتەنىپ كەتكەن بەس بالا وقيعاسىنان كەيىن باستالدى. ەلباسى وتكەن جىلى 130 اۋىل مەكتەبى جابىلعانىن ايتتى. ول مەكتەپتەر اۋىلدا ادام قالماعان سوڭ جابىلعان.

ءۇشىنشى سەبەپ.: «ەلىمىزدىڭ باي  تابيعي رەسۋرستارى ورىنسىز جەمقورلىقپەن تالان-تاراجعا ءتۇسىپ، ءىرى كەن ورىندارى قىتاي ينۆەستورلارىنىڭ قولىنا وتۋدە» دەگەن ءسوز وتقا ماي قۇيىپ وتىرعانى  جانە بيلىكتىڭ حالىقپەن ساناسپاۋىنان وربىگەن وزگە دە وزەكتى فاكتورلار بار... وسى جايتتار داۋىل الدىنداعى تەڭىزدەي  كۇيگە تىرەپ، بۇدان ءجۇز جىل بۇرىن قايران الاش ارىستارى  كوتەرگەن «ويان، قازاق!»  ۇرانى قايتا ورالتىپ، جەر-جەردە تولقىنداي تەڭسەلتىپ تۇر.

مىنە، ءدال وسىنداي تىعىرىققا تىرەلگەن  تۇستا ەل تاعدىرىن، مەملەكەت تىزگىنىن كىمگە سەنىپ امانات ەتكەن ءجون؟ سايلاۋ ناۋقانى باستالسىمەن-اق وسى سۇراق حالىق كوكەيىندە تۇردى. ءبىر-ءبىرىن قارالاپ، اباي ايتقانداي «باس-باسىنا بي بولعان...» جۇرت ءوزدى-ءوزى قىرقىسىپ جاتقان اناۋ  «وپپوزيتسيا وكىلدەرىنە»  سەنۋى كەرەك پە ەدى؟

«قازاق وپپوزيتسياسى» دەگەنىمىز كىمدەر؟

ءوزىن وپپوزيتسيانىڭ جەكە دارا «كوسەمى» سانايتىن مۇحتار ءابىليازوۆ شەت جايلاپ جۇرگەن ەرمەك نارىمباي مەن ءامىرجان قوسانوۆتارمەن ۇستاستى. ءبارىمىز سىيلايتىن رىسبەك سارسەنباي اعامىز  ونبەس ءىس - بايكوت دەگەندى باستاپ، «ولگەندە كورگەن» جالعىز قۇرىلتايدىڭ قادىرىن كەتىرىپ الدى. ال قازاقستان ازاماتتىق قوعامى بەلسەندىلەرى (اشارشىلىق،86-جىلعى جانە 2011ج. جاڭاوزەن قانتوگىسى، اتادان قالعان جەر بايلىعى، شەتەل ينۆەستيتسياسىنا قۇل بولماۋ ءتارىزدى) ءار قازاقتىڭ  جۇرەك مۇڭىن قوزعاعان ەڭ ماڭىزدى  ۇسىنىس-قۇجاتتى ءا.قوسانوۆقا سايلاۋ كۇنىنە ءبىر جەتى قالعاندا عانا  تاپسىرعانىن قالاي تۇسىنەمىز؟

ەڭ سوراقىسى، ءامىرجان قوسانوۆتى «قازاقتىڭ زەلەنسكيى» جاسايمىز دەگەن جاستار جاعى قاتتى ۇرىندى... سەنىمدەرىنە وراسان سەلكەۋ ءتۇستى. ءبارى «التاۋ الا بولعاننىڭ» قانداي بولاتىنىن ءوز كوزدەرىمەن كوردى.

 بىر قايران قالارلىعى، م.ءابىليازوۆتىڭ ءوز مانسابى ءۇشىن، ءوز جەمقورلىق ارانىن تولتىرۋ ءۇشىن نەدەن بولسىن تايىنبايتىنى تۋرالى ق-ج.توقاەۆ «بەلاسۋ» كىتابىندا (الماتى، 2003 ج.،195-197 ب.) 2003 جىلى-اق اتاپ كورسەتكەن ەكەن. ايتسا ايتقانداي، م. ءابىليازوۆ باستاعان توپ شەتەلدەردە  ارقايسىسى ءوز VouTube ارنالارىن اشىپ الىپ، اسىرەسە، ساياساتتان الىس جاستاردى ميتينگىگە شاقىرىپ وبالىنا قالۋى، ءتىپتى، رۇقسات ەتىلمەگەن ميتينگىلەرگە باعىت-باعدار بەرىپ وتىرۋى - ولاردىڭ قاسكويلىك ارەكەتتەرىنىڭ قاۋىپتى ەكەنىن تولىق اڭعارتتى.

 ميتينگ ماسەلە شەشە مە، الەم تاجىريبەسى نە دەيدى؟

شىندىعىنا كەلسەك، بىردەن ون مىڭ، ءجۇز مىڭ ادامدى الاڭعا شىعارا الاتىن ساياسي پارتيالارى بار وركەنيەتتى ەلدەردە بولسا ماسەلەنى باسقا قىرىنان قاراۋعا بولار ەدى. ال وپپوزيتسياسىنىڭ قاۋقارى ءالسىز قازاقستان جاعدايىندا شەرۋ دەگەن از عانا توپتى قاقتىعىسقا، ارانداتۋشىلىققا ايداپ سالۋمەن بىردەي. مۇنداي شەرۋلەردىڭ ارتى ءسوزسىز قانتوگىسكە اكەلمەي مە؟ سەبەبى، قازاقستان الپاۋىت  ۋكراينا دا،  شاعىن قىرعىزستان دا ەمەس. قازاقستان وزىندىك كۇردەلى گەوساياسي ەرەكشەلىگى بار ەل. الەمدە جەر  كولەمى 9-شى ورىنداعى، مەندەلەەۆتىڭ ەلمەنتتەرى تۇگەل بار «التىن ساندىق» - قازاقستان، عاسىرلار بويى اڭدىسقان - ايۋداي، اقىرعان، -ايداھارداي ىسقىرعان الپاۋىت دەرجاۆالاردىڭ  ەكسپانسياسىنا ۇشىراپ، ءبىر ساتتە تىستەگەنىنىڭ اۋزىندا، ۇستاعانىنىڭ قولىندا كەتپەسىمىزگە كىم كەپىل؟.. جۇزدەن اسا ۇلت مەكەن ەتەتىن قازاقستان جاعدايىندا قانتوگىس قاي كەزدەگىدەن دە، قاي ەلدەگىدەن دە  قاۋىپتى ەكەنى كىمگە بولسا دا تۇسىنىكتى.

مىنە، وسىنداي ساياسي جاعدايىمىز تىم كۇردەلى كەزەڭدە ەلدىڭ تاڭداۋى الەمدىك ساياساتتا ءوز ورنى بار ديپلومات قاسىم-جومارت توقاەۆقا اۋعانى نەگىزسىز ەمەس. ءبىر كەزدە «ءۇش وتتىڭ ورتاسىندا»  ارپالىسقان ۇلى  ابىلاي دا قىسىلعاندا ديپلوماتياعا جۇگىنبەپ پە ەدى؟! ءبىز دە سويتتىك.

قازىر توقاەۆ جونىندە ءار ءتۇرلى قايشىلىقتى پىكىرلەر ايتىلىپ ءجۇر. قاسىم-جومارت كەمەلۇلىمەن قىزمەتتەس، ءارى  ديپلوماتيالىق ىرگەلى ەڭبەگى «پرەودولەنيە» («بەلاسۋ») كىتابىن قازاق تىلىنە تارجىمالاعان ادام رەتىندە مەنىڭ ايتارىم مىناۋ: كىتاپ - اۆتوردىڭ جان دۇنيەسىنىڭ ايناسى دەمەي مە؟ ەگەر قاسىم-جومارت توقاەۆتىڭ قايراتكەرلىگىن بىلگىڭىز كەلسە «بەلاسۋ» كىتابىن، ەگەر اماناتقا ادالدىعىن بىلگىڭ كەلسە ونىڭ «اكە تۋرالى ءسوز» كىتابىن وقۋ كەرەك. اكەسى كەمەل: «ەڭ الدىمەن مەملەكەتىڭە ادال بول، ەكىنشى- كىسىنىڭ الا ءجىبىن اتتاما» دەگەندى امانات ەتكەن ەكەن. وزىنە  ۇنەمى سىن كوزبەن قاراۋ، ۇلى اباي ايتقان «سەنبە جانعا ءوزىڭدى تۇرعان ماقتاپ!..» ۇستانىمى ءبىز بىلەتىن قاسىم-جومارت. توقاەۆقا دا ءتان قاسيەت.

جاڭا ۇلت مۇددەسى دەدىك. عۇمىر بويى قازاقشا وقىعان ءا.قوسانوۆ كەزىندە قازاق تىلىنە قارسى شىقتى دەگەنگە  مەن ءوز باسىم سەنە قويمايمىن. بىراق عۇمىر بويى ورىسشا وقىعان، قىتايشا، اعىلشىنشا اعىپ تۇرعان توقاەۆ، تەك قازاقستان ديپلوماتياسىنىڭ نەگىزىن عانا ەمەس، 2002 جىلى سىرتقى ىستەر ءمينيسترى بولىپ كەلگەندە  بۇرىن ەشقاشان قازاق تىلىندە ءىس جۇرگىزبەگەن، وسى تىلدە بىردە-ءبىر كىتاپ شىعارماعان مەكەمەدە مەملەكەتتىك ءتىلدىڭ دە بەرىك تۇعىرىن قالىپتاستىرعانىن كوزبەن كوردىك... ءىسىمىزدىڭ ورگە باسقانى سونشالىق كەيىن مەنىڭ ءوزىم وسىندا قىزمەت ىستەي ءجۇرىپ، ديپلوماتتاردىڭ كومەگىمەن  ەكى جانە ءۇش تىلدە ءتورت سوزدىك، ەكى اۋدارما كىتاپ شىعارۋىما تۋرا كەلگەن...

ەلباسى ن. نازارباەۆپەن بىرگە ەلىمىزدىڭ سىرتقى ساياساتىن نىعايتۋ ميسسياسىمەن ءجۇرىپ، ەكونوميكاسى تۇرالاپ، سىبايلاس جەمقورلىق جايلاعان شاعىن ارالداعى سينگاپۋردى ليۋ كۋان يۋ پرەزيدەنت قالاي «تازا ەل» اتاندىرىپ، وركەنيەت ورىنە شىعارعانىن، ال قحر ەكونوميكاسى قالاي العا شارىقتاعانىن، سونداي-اق تورتكۇل دۇنيەنىڭ نەبىر  سۇڭعىلا ساياساتكەرلەر، مەملەكەت قايراتكەرلەرىمەن پىكىر الماسا ءجۇرىپ، كوپ ەلدىڭ  دامۋ  جولدارىن زەردەلەپ،  كىتاپتار جازعان قاسىم-جومارت توقاەۆ، سول الەمدىك وزىق دامۋ  مودەلدەرى مەن تاجىريبەلەرىن ەلىمىزدى وركەندەتۋگە نەگە قولدانبايدى-دەيتىندەر دە بار. بۇل دا ورىندى پىكىر.  سەبەبى، ءدال قازىرگى تاڭدا بارىنشا  باتىل ساياسي وزگەرىس، شۇعىل ەكونوميكالىق رەفورما جاساي الاتىن پرەزيدەنت كەرەك دەگەن تالاپ بارشا  سايلاۋالدى پىكىلەردىڭ ورتاق قورىتىنىسىنا اينالىپ وتىر.

ال، سول ايتقان  وزگەرىس، رەفورماڭىز باستالىپ تا كەتكەن جوق پا؟

توقاەۆ مەملەكەت باسشىسى بولعان نەبارى ءۇش ايداي ۋاقىت ىشىندە عانا بىرقاتار باتىل شەشىمدەر جاساپ، اسىرەسە، كەلەلى جيىنعا باسشىلارىن جيناپ، ابدەن بەتىمەن كەتىپ، كەشەگى شاكارىمدى اتقان قاراسارتوۆتارعا اينالىپ بارا جاتقان كەيبىر پوليتسيا قىزمەتكەلەرىنە، بيۋدجەتتىڭ ءار تيىنىن ۇنەمدەپ، پايداسى جوق باعدارلامانى قىسقارتۋ جونىندە قاتاڭ ەسكەرۋ جاساۋى كوپتىڭ كوڭىلىنەن شىقتى.

قاراپايىم حالىقتىڭ مۇڭ-مۇقتاجىن ۇمىتقان اكىمدەرگە: «باستىسى- حالىقپەن ديالوگ ورناتۋ. بيلىك حالىقتى تىڭداپ، ولاردىڭ تالاپ-تىلەكتەرىنە زەيىن قويۋى كەرەك. شەنەۋنىكتەر كابينەتتەرىندە وتىرماۋى كەرەك. تۇرعىندارمەن جۇمىس ىستەۋى كەرەك. اكىمدەر مەملەكەتتىڭ ساياساتىن ازاماتتارعا ءتۇسىندىرۋى ءتيىس", – دەگەن ناقتى تالاپ قويىپ وتىر توقاەۆ.

ءيا، ءبىز تاريحي كەزەڭدە تۇرمىز. پرەزيدەنت سايلاۋىمەن بىرگە، «مىڭ ءولىپ، مىڭ تىرىلگەن»  بابالارىمىز اڭساعان تاۋەلسىزدىگىمىزدىڭ تاعى ءبىر  جاڭا ءداۋىرى باستاۋ الىپ تا  كەتتى! بولاشاق بۇگىننەن، وزگەرىس وزىمىزدەن باستالادى. ولاي بولسا، كوك تۋىمىز استىنا توپتاسىپ، ءوز ۇلەسىمىزدى قوسايىق، حالىق بولىپ سايلاعان پرەزيدەنتىمىزگە ەندى حالىق بولىپ قولداۋ كورسەتەيىك، اعايىن!

بولات جامكەنوۆ، ديپلومات-قالامگەر

Abai.kz