"قالانىڭ (ارىس – رەد.) بارلىق تۇرعىندارى ەۆاكۋاتسيالاندى جانە ءىز-ءتۇسسىز جوعالعاندار جوق" دەلىنگەن رەسمي حابارلامادا. ءىىم تۇرعىنداردى الەۋمەتتىك جەلىلەر مەن WhatsApp مەسسەندجەرى ارقىلى تارالاتىن "جالعان اقپاراتقا سەنبەۋگە" شاقىرىپ، ونداي حابار تاراتقاندار قىلمىستىق جاۋاپكەرشىلىككە تارتىلاتىنىن ەسكەرتكەن.
بۇعان دەيىن جەرگىلىكتى كەي باسىلىمدار شىمكەنتتەگى توتەنشە جاعداي قىزمەتىنە سىلتەمە جاساپ، ارىستاعى جارىلىستاردان كەيىن "350-دەن استام ادامنىڭ تابىلماي جاتقانى" تۋرالى حابار تاراتقان ەدى. ءىىم ونى تەرىسكە شىعارعاننان كەيىن، سارسەنبى كۇنى وسى حاباردى كوشىرىپ باسقان ون شاقتى باسىلىمنىڭ ءوز سايتىنان ول اقپاراتتى الىپ تاستاعانى جايلى قازتاگ اگەنتتىگى حابارلادى.
دۇيسەنبى كۇنى تاڭەرتەڭ اسكەري قويمادا جارىلىستار باستالعاننان كەيىن 43 مىڭنان استام ادام تۇراتىن ارىس قالاسىنان ونداعان مىڭ تۇرعىن شىمكەنت پەن باسقا دا ەلدىمەكەندەرگە كەتۋگە ءماجبۇر بولعان. بيلىكتىڭ دەرەگىنشە، 39 مىڭ ادام ءوز بەتىمەن باس ساۋعالاپ، باسقا جاققا كەتكەن. ءۇش مىڭنان استام ادام تۇركىستان وبلىسى اكىمدىگى بولگەن اۆتوبۋسپەن شىمكەنتكە جەتكەن. ولاردىڭ كوپشىلىگى تۋعان-تۋىسىن ساعالاپ كەتكەن.
26 ماۋسىم كۇنى قازاقستان قورعانىس مينيسترلىگى ارىستاعى جارىلىس كەزىندە جارالانعان تاعى ءبىر اسكەري قىزمەتكەردىڭ سەيسەنبىدە اۋرۋحانادا قايتىس بولعانىن حابارلادى. بۇعان دەيىن بيلىك ارىستاعى جارىلىستار سالدارىنان ءبىر اسكەري مەن كولىگىنە سنارياد تۇسكەن ءبىر تۇرعىننىڭ قازا بولعانى تۋرالى اقپارات تاراتقان ەدى.
25 ماۋسىمدا قازاقستان دەنساۋلىق ساقتاۋ مينيسترلىگى جارىلىستان سوڭ ون بەس ادامنىڭ (تورتەۋى - بالا) جان ساقتاۋ بولىمىنە جاتقىزىلعانىن، توعىز ادامنىڭ ءحالى اۋىر ەكەنىن حابارلاعان. رەسمي مالىمەت بويىنشا، بارلىعى 165 ادام دارىگەر كومەگىنە جۇگىنگەن. ونىڭ 89-ى اۋرۋحانادا جاتىر.
24 ماۋسىم كۇنى تاڭەرتەڭ ارىستاعى اسكەري وق-ءدارى قويماسىندا الدىمەن ءورت شىعىپ، كەيىن جارىلىستار بولعان. تۇركىستان وبلىسى اكىمدىگى ايماقتا توتەنشە جاعداي جاريالادى. قازىر ارىس قالاسىنا كىرۋگە تىيىم سالىنعان. بيلىك "قاۋىپتىڭ ءالى سەيىلمەگەنىن، قالادا ساپەرلەر كومانداسى جۇمىس ىستەپ جاتقانىن" حابارلاعان.
Abai.kz
