سەنبى, 31 شىلدە 2021
2539 0 پىكىر 26 ماۋسىم, 2019 ساعات 12:23

سينگاپۋرلىق ساراپشى - قىزىلوردا وبلىسى اكىمىنىڭ كەڭەسشىسى

سينگاپۋرلىق ساراپشى باسكاران ناير قىزىلوردا وبلىسىنىڭ اكىمى قىرىمبەك كوشەرباەۆتىڭ شتاتتان تىس كەڭەسشىسى بولىپ تاعايىندالدى.

باسكاران ناير قازىرگى ۋاقىتتا نازارباەۆ ۋنيۆەرسيتەتىنىڭ مەملەكەتتىك ساياسات جوعارى مەكتەبىنىڭ شاقىرىلعان پروفەسسورى بولىپ جۇمىس ىستەيدى. ول – سينگاپۋر ۇلتتىق ۋنيۆەرسيتەتىنىڭ لي كۋان يۋ مەملەكەتتىك ساياسات مەكتەبىنىڭ پروفەسسورى.

كوممۋنيكاتسيا سالاسىنىڭ ساراپشىسى سينگاپۋردىڭ ءتۇرلى سەكتورلارىندا وسى سالادا 30 جىلدان استام قىزمەت اتقارعان.

باسكاران ناير اكتسيالار بويىنشا سەرىكتەس جانە كوممۋنيكاتسيا بويىنشا حالىقارالىق نيۋ-يورك كومپانياسىنىڭ باس ديرەكتورى بولعان. كومپانيادا باستاپقى جاريا (IPO) جانە ءىرى مامىلەلەردى ىسكە اسىرۋ، اكتسيونەرلەرمەن قارىم-قاتىناس، ينۆەستورلارمەن ءوزارا بايلانىس (M&A) باعدارلامالارىنا باسشىلىق جاسادى.
سونداي-اق، سينگاپۋر ۇكىمەتىنىڭ ۇلتتىق الەۋمەتتىك ناۋقاندارىن باسقاردى.

باسكاران ناير: "سينگاپۋرداعى قوعاممەن بايلانىس جونىندەگى وقۋلىق" (1986); جاڭا مەديا بويىنشا "باستى كوشەدەن كيبەر-كوشەگە دەيىن: كوممۋنيكاتسيا تاجىريبەسىندەگى وزگەرىستەر" جانە «مەملەكەتتىك ساياساتتاعى ماركەتينگ» (2018) كىتاپتارىنىڭ اۆتورى.

ايتا كەتەيىك، باسكاران ناير قىزىلوردا وبلىسىنا ساپارى بارىسىندا ءوڭىردىڭ الەۋمەتتىك-مادەني نىساندارىنىڭ قىزمەتىمەن تانىسىپ، جەرگىلىكتى اتقارۋشى ورگانداردىڭ قىزمەتكەرلەرى ءۇشىن ستراتەگيالىق كوممۋنيكاتسيالار بويىنشا ساباق وتكىزدى.

ەستەرىڭىزگە سالا كەتەيىك، قىزىلوردا وبلىسى اكىمىنىڭ شتاتتان تىس 2 كەڭەسشىسى بار، ولار - ەكونوميكالىق ماسەلەلەر بويىنشا كەڭەسشى رف پرەزيدەنتى جانىنداعى رەسەي حالىق شارۋاشىلىعى جانە مەملەكەتتىك قىزمەت اكادەمياسىنىڭ ەكونوميكالىق تەوريا جانە ساياسات كافەدراسىنىڭ مەڭگەرۋشىسى، اكادەميك ابەل اگانبەگيان جانە سۋ رەسۋرستارى ماسەلەلەرى جونىندەگى كەڭەسشى - ورتالىق ازيا حكجك عىلىمي-اقپاراتتىق ورتالىعى فيليالىنىڭ ديرەكتورى، بۇرىنعى مەليوراتسيا جانە سۋ شارۋاشىلىعى ءمينيسترى ناريمان قىپشاقباەۆ.

Abai.kz

0 پىكىر