سارسەنبى, 22 قىركۇيەك 2021
1642 0 پىكىر 28 ماۋسىم, 2019 ساعات 18:01

قىزىلوردا وبلىسىنا جاڭا اكىم تاعايىندالدى

بۇگىن قىزىلوردا وبلىسىنا جاڭا اكىم تاعايىندالدى. سىر ءوڭىرىن ەندى قۋانىشبەك ىسقاقوۆ باسقارادى.

قر پرەمەر-ءمينيسترى اسقار مامين مەملەكەت باسشىسىنىڭ تاپسىرماسى بويىنشا قىزىلوردا وبلىسى ءماسليحاتىنىڭ كەزەكتەن تىس وتىرىسىنا قاتىستى، وندا قر پرەزيدەنتى قاسىم-جومارت توقاەۆتىڭ قۋانىشبەك ىسقاقوۆتى ءوڭىر اكىمى لاۋازىمىنا تاعايىنداۋ تۋرالى ۇسىنىسى جازىلعان حاتتى وقىپ بەردى.

داۋىس بەرۋ قورىتىندىسى بويىنشا، ءماسليحات دەپۋتاتتارى قر پرەزيدەنتى ۇسىنعان كانديداتۋرانى ءبىراۋىزدان قولدادى. قىزىلوردا وبلىسىنىڭ اكتيۆىمەن كەزدەسۋدە قر ۇكىمەتىنىڭ باسشىسى ق. كوشەرباەۆقا ءوڭىردى دامىتۋ بويىنشا اتقارعان ەلەۋلى جۇمىسى ءۇشىن العىس ايتىپ، جاڭا لاۋازىمى – قر پرەزيدەنتى اكىمشىلىگىنىڭ باسشىسى قىزمەتىندە ساتتىلىك تىلەدى.

«قىرىمبەك كوشەرباەۆ قىزىلوردا وبلىسىن 6 جىل بويى باسقاردى، ءوڭىردىڭ الەۋمەتتىك-ەكونوميكالىق دامۋىنا ۇلكەن ۇلەسىن قوستى. وسى ۋاقىت ىشىندە ءىرى ينفراقۇرىلىمدىق جانە ونەركاسىپتىك جوبالار ىسكە اسىرىلدى. الەۋمەتتىك سالانى دامىتۋ بويىنشا ءتيىمدى شارالار قابىلداندى»، — دەدى ا. مامين.

قىزىلوردا وبلىسىنىڭ اكتيۆىنە ءوڭىردىڭ جاڭا اكىمىن تانىستىرا وتىرىپ، اسقار مامين قۋانىشبەك ىسقاقوۆتىڭ وڭىرلىك جانە ورتالىق دەڭگەيدەگى ەلەۋلى جۇمىس تاجىريبەسىن اتاپ ءوتتى: 2015 جىلدان باستاپ قىزىلوردا وبلىسى اكىمىنىڭ ورىنباسارى لاۋازىمىن اتقاردى، ۇزاق جىلدار بويى قر قارجى مينيسترلىگىنىڭ جۇيەسىندە جۇمىس ىستەدى.

قر پرەمەر-ءمينيسترى اسقار مامين قىزىلوردا وبلىسىنىڭ الدىندا قر تۇڭعىش پرەزيدەنتى - ەلباسى نۇرسۇلتان نازارباەۆتىڭ حالىقتىڭ تۇرمىس ساپاسىن ارتتىرۋ جانە مەملەكەت باسشىسى قاسىم-جومارت توقاەۆتىڭ قولدا بار الەۋەتتى ىسكە اسىرۋ ارقىلى تۇراقتى ەكونوميكالىق ءوسىمدى قامتاماسىز ەتۋ بويىنشا مىندەتتەر تۇرعانىن اتاپ ءوتتى. جاڭا اكىمگە ءوڭىر اكتيۆىمەن جانە ءماسليحات دەپۋتاتتارىمەن بىرلەسىپ، العا قويىلعان ماقساتتارعا قول جەتكىزۋ ءۇشىن بارلىق كۇش-جىگەردى جۇمىلدىرۋ تاپسىرىلدى.

Abai.kz

0 پىكىر