ءيا! ءيا، ءيا، ءيا! دومبىرا كەتتى اۋەنى اۋەلەپ، تۋ جايىلدى جەلبىرەپ. اي-حوي، وي-حوي!

تاۋەلسىزدىكتى قارادۇرسىن رومانتيكامەن شەندەستىرىپ جىبەرگەن ءبىزدىڭ پۋبليتسيستەر، اقىن-جازۋشىلار وڭبايدى. «ءويدويت، تاۋەلسىزدىك كەلدى، اق تاڭ اتتى!» دەگەننەن تانعان جوق. تاۋەلسىزدىكتىڭ باسىنان بەرگى ورتاشا وقىرمان/تىڭدارمان/كورەرمەن رەتىندە ايتسام - ەگەمەندىكتى ەندىگارى ەتەك-جەڭ جينايتىن كەزەڭنەن گورى، ەنشى الىپ، بولەك شىققان كەرجالقاۋدىڭ: «ەندى تۇسكە دەيىن ۇيىقتاسام دا - ءوزىم بىلەم!» دەگەنىنە كەلتىرىپ جىرلادى. جازۋشى دا، جازعىش تا، شەشەن دە. جىرلادى، بىراق تۇسىندىرمەدى.

حالىقارالىق قاۋىمداستىق تاۋەلسىز دەپ مويىنداۋمەن بىرگە - مىندەتتەر دە ارتىلادى. شىنىن ايتۋ كەرەك، ءبىزدىڭ ادامدار مىندەت جاعىن مويىنداعىسى كەلمەيدى، سەبەبى ونى تۇسىندىرمەگەن. مىسالى، لگبت قۇقىقتارى. تابيعاتىڭا جات، بىراق ونى راتيفيكاتسيالاماساڭ - ادام قۇقىقتارىنا بايلانىستى رەيتينگىڭ تۇسەدى. ال ول رەيتينگ - ءوز كەزەگىندە سەنىڭ كرەديت رەيتينگىڭنىڭ ءبىر بولىگى. كرەديتسىز قالۋىڭ مۇمكىن.

اۋعانعا استىقپەن گۋمانيتارلىق كومەك بەرمەسەڭ - ول دا ساعان تالىبتەردىڭ تىنىسى تۋرالى ايتپاي قويۋى مۇمكىن.

تاعى ءبىر كورشىڭە ساۋدا جولىن جەڭىلدەتىپ بەرمەسەڭ، ءبىر كۇنى: «اۋعان شەكاراسىن ءبارىڭ ءۇشىن جالعىز كۇزەتەمىن بە؟» دەپ، جاۋىنگەر سۇراۋى مۇمكىن.

ايتپاقشى، ءوزىڭ دە قۋلىققا باراسىڭ. مىسالى، الپاۋىت ەلدەر كاپيتالىن اكەلىپ، تاۋەكەلگە بارسا دەيسىڭ. سوندىقتان قۇلاق ەستىمەگەن جەڭىلدىكتەر جاسايسىڭ.

ايتپاقشى، ساۋدا ۇيىمىنا مۇشە بولۋ ءۇشىن وتاندىق وندىرۋشىلەرگە كومەك بەرە المايسىڭ.

ايتپاقشى، الەۋمەتتىك باعدارلامالار مەن جەڭىلدىكتەر تىم كوپ بولسا - گرەكتەر سياقتى قۇيرىقتان ءبىر تەبەدى. كوشەدە جىل بويى ەرەۋىلدەسەڭ دە پايدا جوق.

ايتپاقشى، الپاۋىتتاردىڭ وبليگاتسيالارىن ساتىپ الماساڭ، ولار دا سەنىڭ ءونىمىڭدى المايدى، اناۋ-مىناۋ كەلىسسوزدەردە «اعالىق» قىلمايدى.

ايتپاقشى، بۇۇ-داعى داۋىسىڭدى دا ورايى كەلسە ... ساتاسىڭ.

مۇنداي مىسالدار جىرتىلىپ-ايىرىلادى. ساندايەكتەرمەن كەلتىرىپ وتىرىپ جازۋعا تۇتاستاي ءبىر پلاست.

نە بولدى؟ جوعا، بۇل تىرلىك ءبارىبىر ماسكەۋ بوداندىعىنان ون مىڭ ەسە ارتىق.

دەگەنمەن، «جۋرناليست الدە اقىن يا شەشەن بولعاسىن، تاۋەلسىزدىكتى ءبىر مىسقال ارتىق تۇسىنەمىن» دەگەن اپەرباقاندىق قۇرتتى. ەگەمەندىك جىرلارىندا فاكتوگرافيا ەكىباستان بولمايدى. ول بار بولعانى - قالىقتاعان بۇركىت، تولقىنداعان ەگىن القابى، شاۋىپ بارا جاتقان جىلقىلار، اتا مەن بالا بولىپ شىقتى. سوسىن با، بۇگىندە - جەتى مىڭ شاقىرىم شەكارانى جالعىز كۇزەتىپ بەرەتىندەي نامىسى ورتەنىپ وكىرگەندەر كوپ. دۇرىس قوي: «ۇلىمىز دەپ سەندىرىپ ەدىڭدەر، ەندى كانەكي؟» دەپ وتىر عوي سول.

سوڭعى ايلاردا تاۋەلسىزدىكتىڭ باستاۋىندا جىرلاعانىن ايتىپ جۇرگەندەر كوبەيدى. قارىق قىلدىق دەيدى عوي. بىراق بۇگىنگى پروبلەمالاردىڭ كوبى سول - «جىرلاردان» بولىپ وتىر. جىنىمدى كەلتىرمەش، كەلەسى سولكەبايىڭدى ال دا - جۇرە بەر.

ەرلان وسپاننىڭ facebook پاراقشاسىنان

Abai.kz