كريميناليستيكا مەن سوت ساراپتاماسى سالاسىندا لازەرلىك ءادىستى پايدالانۋدان مۇحتار جاكىشەۆ 1992 جىلى زاڭ عىلىمدارىنىڭ كانديداتى دەگەن عىلىمي اتاق العان. سول جىلى ونى امەريكاداعى حالىقارالىق يدەنتيفيكاتسيا (انىقتاۋ) قاۋىمداستىعىنىڭ 77-ءشى كونفەرەنتسياسىنا شاقىرىپ، قاۋىمداستىققا مۇشە ەتىپ قابىلدادى. قاۋىمداستىققا الەمنىڭ 177 ەلىنەن 12 مىنان استام ادام مۇشە بولىپ كىرگەن ەكەن. ول جاقتا مۇحتاردىڭ ارىپتەستەرىمەن بىرىگىپ ويلاپ تاپقان ەرەكشە جاڭالىعىنا شەتەلدىكتەر قاتتى قىزىعادى.

كەيىن ونى قىلمىستىڭ بەتىن اشۋ ءۇشىن ناقتى جۇمىسقا تارتىپ، الگى قۇرالدى ءىس جۇزىندە سىناپ كورەدى. وسى كەزدە مۇحتار جاڭاعى قۇرالدىڭ كومەگىمەن اتلانتيك-سيتيدە سودان 15 جىل بۇرىن جاسالعان ساياسي قىلمىستى اشىپ، سونداعىلاردىڭ ءبارىن قايران قالدىرىپتى. امەريكاداعى رود-ايلاندتا مۇحتار لەكتسيا وقي باستايدى. فبب (فبر) قازاق جىگىتىنىڭ وسى ەڭبەگىن جوعارى باعالاپ، جىلىنا 110 مىڭ دوللارداي ايلىق الىپ وتىراتىن مىقتى مامان بولىپ، امەريكادا قالۋىن وتىنەدى. بىراق مۇحتار ولاردىڭ وتىنىشىنەن باس تارتادى. قازاقستانعا قايتىپ ورالىپ، ەلگە، وتانىنا قىزمەت ەتكىسى كەلەتىنىن ايتىپتى.

سودان ول توقىراپ، تۇرالاپ تۇرعان ۋران ءوندىرۋ سالاسىنىڭ قان تامىرىنا قايتا قان جۇگىرتىپ، ونى از ۋاقىتتا دۇنيە جۇزىندەگى ەڭ ۇزدىك وندىرىسكە اينالدىرىپ، «قازاتومپرومدى» الەمدىك دەڭگەيدەگى بولاشاعى بار تابىستى كومپانيالاردىڭ قاتارىنا قوسادى.

وتانىنا، ەلىنە قىزمەت ەتكىسى كەلگەن وسىنداي پاتريوت 14 جىلدان بەرى تەمىر توردا تورىعىپ جاتىر. مۇحتاردىڭ كەزىندە نە ءۇشىن تۇرمەگە وتىرعانىن، كىم وتىرعىزعانىن جاقسى بىلەمىز. ەندى مۇنداي ازاماتتى ارى قاراي قاماۋدا، قاپاستا ۇستاپ وتىرا بەرۋ – ەلدىگىمىزگە دە، ازاماتتىعىمىزعا دا ۇلكەن سىن.

مۇحتاردىڭ بوساپ شىعۋىن بۇكىل قوعام بولىپ، كۇللى قازاق قوعامى بولىپ تالاپ ەتۋىمىز كەرەك، اعايىن!

جولىمبەت ماكىشتىڭ جازباسىنان

Abai.kz