سەيسەنبى, 22 قازان 2019
الاشوردا 3802 3 پىكىر 2 تامىز, 2019 ساعات 13:20

تالدىقورعانداعى مەكتەپكە بارلىبەك سىرتتانوۆتىڭ ەسىمى بەرىلەتىن بولدى

تالدىقورعاننان ءسۇيىنشىلى حابار جەتتى. تالدىقورعانداعى №25 مەكتەپكە التى الاشتىڭ الداسپان تۇلعاسى، قازاقتىڭ العاشقى كونستيتۋتسياسىن جازعان وقىمىستى، زاڭگەر بارلىبەك سىرتتانوۆتىڭ ەسىمىن بەرۋ تۋرالى شەشىم شىقتى.

كۇنى كەشە الماتى وبلىسىنىڭ اكىمدىگىندە ءماسليحاتتىڭ سەسسياسى ءوتتى. سەسسيا وتىرىسىن وبلىستىق ءماسليحات دەپۋتاتى توقان بوتابەكوۆ جۇرگىزدى. سەسسيا وتىرىسىنا وبلىس اكىمىنىڭ ورىنباسارى سەرىكجان بەسكەمپىروۆ، وبلىستىق ءماسليحات حاتشىسى سۇلتان دۇيسەمبىنوۆ جانە باسقارما باسشىلارى، اۋدان، قالا اكىمدەرى قاتىستى. سەسسيا وتىرىسىنا ۇسىنىلعان ماسەلەنىڭ ءبىرى بارلىبەك سىرتتانوۆ كوشەسىنىڭ بويىنداعى №25 مەكتەپكە داڭقتى تۇلعانىڭ ەسىمىن بەرۋ. دەپۋتاتتار ۇسىنىستى ءبىراۋىزدان قولداپ، قر ۇكىمەتىنىڭ جانىنداعى رەسپۋبليكالىق ونوموستيكالىق كوميسسيانىڭ قاراۋىنا جىبەردى.

ەستەرىڭىزگە سالا كەتەيىك، 2017 جىلدىڭ 21 ماۋسىمى كۇنى پارلامەنت ءماجىلىسىنىڭ مىنبەرىندە تۇڭعىش رەت تاريحي تۇلعا – بارلىبەك سىرتانۇلىنىڭ ەسىمى ايتىلىپ، ونىڭ ءومىر جولى مەن قوعامدىق-ساياسي قىزمەتى، ۇلت بوستاندىعى ءۇشىن اتقارعان وراسان زور قىزمەتىنە ساياسي باعا بەرىلدى.

بۇل – تۇلعاتانۋ عىلىمى ءۇشىن ۇلكەن جەتىستىك! م.بوپازوۆ، س.ۇمبەتوۆ، ە.بەكتۇرعانوۆ، ب.سماعۇل، ب.مامراەۆ، ن.دۋلاتبەكوۆ سىندى قر پارلامەنتى ءماجىلىسىنىڭ دەپۋتاتتارى بارلىبەكتانۋ ماسەلەسىن كوتەرگەن ەدى.

سول دەپۋتاتتىق ساۋال بارىسىندا تالدىقورعانداعى №25 مەكتەپكە تۇلعانىڭ ەسىمىن بەرۋ تۋرالى ۇسىنىس ايتىلعان بولاتىن. مىنە، بۇگىن سول دەپۋتاتتىق ساۋالدىڭ جانە بىرنەشە مارتە جازىلعان ۇسىنىس حاتتىڭ ءۇمىتى «جانىپ» وتىر.

ەندى سول وبلىس ورتالىعىنداعى مەكتەپتىڭ الدىنا قايراتكەردىڭ ەڭسەلى ەسكەرتكىشىن ورناتسا، وسكەلەڭ ۇرپاققا قايرات بەرەر رۋح بولار ەدى.

Abai.kz

3 پىكىر