قازاقستاندىق وقۋشىلار اراسىنداعى حالىقارالىق وليمپيادادا ەكى مەدال جەڭىپ الدى
قازاقستان ۇلتتىق قۇراماسى 24-31 شىلدە ارالىعىندا سانكت-پەتەربۋرگ قالاسىندا وتكەن IEO 2019 وقۋشىلار اراسىنداعى حالىقارالىق وليمپياداسىندا ەكى قولا مەدال جەڭىپ الدى.
ايتا كەتۋ كەرەك، قازاقستاندىق ۇلتتىق كەزەڭدەر ەكىنشى جىل قاتارىنان «استانا» حالىقارالىق قارجى ورتالىعىنىڭ ۇزدىكسىز كاسىبي دامۋ بيۋروسى الاڭىندا وتكىزىلەدى. AIFC Finance Olympiad جەڭىمپازدارى IEO حالىقارالىق كەزەڭىندە ەلدى تانىستىرۋعا مۇمكىندىك الادى.
IEO 2019 ءۇش كەزەڭىنىڭ ناتيجەلەرى بويىنشا جەكە جانە كوماندالىق سىناقتاردا جەڭىمپازدار انىقتالدى. وسىلايشا، قازاقستان قۇراماسىنىڭ قورجىنىنا ايعانىم داۋپباەۆا (نزم، قاراعاندى ق.) جانە ەركەجان بالتاشەۆا (نزم، نۇر-سۇلتان ق.) جەكە ەسەپتە ەكى قولا مەدال اكەلدى. جينالعان ۇپاي سانى بويىنشا جەكە ەسەپتە ءابسوليۋتتى جەڭىمپاز بولىپ قىتايدان كەلگەن ەندريۋ پەي اتاندى. ەكىنشى ورىندا برازيليالىق گيلەرمو كۋتريم كوستا، ءۇشىنشى ورىندا جاڭا زەلانديادان كەلگەن ماكسيميليان سۋرۆەيور.
كوماندالىق ەسەپ قورىتىندىسى بويىنشا ءبىرىنشى ورىندى برازيليادان كەلگەن كوماندا، كۇمىس جانە قولا جۇلدەنى قىتايدان كەلگەن وقۋشىلار يەلەندى.
جارىسقا 24 ەلدەن 29 كوماندا قاتىستى. وليمپيادانىڭ بارلىق جەڭىمپازدارى 2020 جىلى نيۋ ۆشە ەكونوميكالىق باعدارلاماسىنا وقۋعا ءتۇسۋ مۇمكىندىگىنە يە بولدى.
ايعانىم داۋپباەۆا (IEO 2019 قولا جۇلدەگەرى):
«ەكونوميكا بويىنشا وليمپيادانىڭ باسقالاردان ايىرماشىلىعى، مۇندا ناقتى فورمۋلالاردان باسقا ەكونوميكالىق ويلاۋ مەن تۇيسىكتى پايدالانۋ قاجەت. مەن وسى تاقىرىپ قىزىقتىرعان جانە بولاشاقتا كاسىپقوي بولعىسى كەلەتىن ءار ەلدىڭ بالالارىمەن تانىسۋعا قۋانىشتىمىن. ءبىز ءوز كۇشىمىزدى جوعارى دەڭگەيدە سىناپ كورۋگە مۇمكىندىك بەرگەن احقو بيۋروسىنا العىسىمىزدى بىلدىرەمىز».
ەكونوميكا بويىنشا حالىقارالىق وليمپيادا 2018 جىلى ماسكەۋدە العاش رەت وتكىزىلدى. قازاقستان 2020-شى جىلى جارىستى نۇر-سۇلتان قالاسىندا احقو بيۋروسى الاڭىندا قابىلدايدى.
انىقتامالىق اقپارات:
احقو. 2015 جىلدىڭ جەلتوقسان ايىندا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ «استانا» حالىقارالىق قارجى ورتالىعىن (احقو) قۇرۋ تۋرالى كونستيتۋتسيالىق زاڭعا قول قويدى. احقو ماقساتى حالىقارالىق دەڭگەيدەگى قارجىلىق قىزمەتتەردىڭ جەتەكشى ورتالىعىن قالىپتاستىرۋ بولىپ تابىلادى. احقو-نىڭ مىندەتتەرى قارجى قىزمەتتەرى سالاسىندا ينۆەستيتسيالاۋ ءۇشىن تارتىمدى ورتا قۇرۋ جولىمەن ەل ەكونوميكاسىنا ينۆەستيتسيالار تارتۋعا جاردەمدەسۋ، قازاقستان رەسپۋبليكاسىنىڭ باعالى قاعازدار نارىعىن دامىتۋ، ونىڭ حالىقارالىق كاپيتال نارىقتارىمەن ينتەگراتسيالانۋىن قامتاماسىز ەتۋ بولىپ تابىلادى.
