«قازمۇنايگاز» كومپانيالارى توبى «بىرگە – تازا قازاقستان» رەسپۋبليكالىق ەكولوگيالىق باستاماسىنا بەلسەندى اتسالىسۋدا. ەلىمىزدىڭ تۇكپىر-تۇكپىرىندە شوعىرلانعان ۇلتتىق مۇناي-گاز وپەراتورىنىڭ ەنشىلەس ۇيىمدارىنىڭ قىزمەتكەرلەرى قورشاعان ورتانى تازالاۋعا كىرىسىپ كەتتى. قازىردىڭ وزىندە يگى شاراعا 900-دەن استام مۇنايشى قاتىسىپ ۇلگەردى.

قورشاعان ورتانى قورعاۋعا باعىتتالعان سەنبىلىكتەر تىزبەگىن شىلدەنىڭ 26-شى جۇلدىزىندا پاۆلودار مۇناي-حيميا زاۋىتىنىڭ 270 قىزمەتكەرى باستاپ بەردى. پاۆلودارلىقتار بەلگىلەنگەن اۋماقتا سىنعان تال بۇتاقتارىنان تازارتۋ، قوقىستاردى شىعارۋ جۇمىستارىن جۇرگىزدى. سەنبىلىككە ەكى كاماز كولىگى مەن جۇك-جولاۋشى ءاۆتوموبيلى جۇمىلدىرىلدى. كەيىننەن قالدىقتار قالالىق قوقىس تاستايتىن جەرگە شىعارىلدى.

قازاق مۇنايىنىڭ قارا شاڭىراعى اتىراۋداعى «ەمبىمۇنايگاز» كومپانياسى دا ەكولوگيالىق ناۋقاننان شەت قالمادى. شىلدەنىڭ 27-ءسى كۇنى اتىراۋلىق مۇنايشىلار جايىق وزەنى جانە قالا اۋماعىنداعى سۋ توعاندارىنىڭ جاعالاۋلارىن قوقىس قالدىقتارىنان تازارتۋ شارالارىنا قاتىستى. ال 2-3 تامىزدا اققىستاۋ جانە تالقايراڭ اۋىلدارىنىڭ اينالاسى تازارتىلدى.

اتىراۋ مۇناي وڭدەۋ زاۋىتى دا بىرنەشە سەنبىلىك ۇيىمداستىردى. شىلدەنىڭ 27-ءسى كۇنى زاۋىتتىڭ 60 جۇمىسشىسى جاڭاتالاپ اۋىلىنان باستاپ امانگەلدى اۋىلىنا دەيىنگى جايىق وزەنى جاعالاۋىن تۇرمىستىق قالدىقتاردان تازالادى. تازالاۋ جۇمىستارىنا 3 كولىك تەحنيكاسى تارتىلدى. ال 3-ءشى تامىزدا ءاموز بەن مەردىگەرلىك ۇيىمداردىڭ 170 قىزمەتكەرى جايىق وزەنى جاعالاۋىن زاۋىت ايماعىنان باستاپ «جيلگورودوك» شاعىن اۋدانىنا دەيىن تازالاپ شىقتى. ەكى سەنبىلىكتىڭ ناتيجەسىندە 50 توننادان استام قوقىس جينالىپ، ارنايى پوليگونعا شىعارىلدى.

3-تامىزدا رەسپۋبليكالىق ناۋقان جالعاسىن قىزىلوردا وڭىرىندە تاپتى. قازگەرمۇناي كومپانياسىنىڭ قىزمەتكەرلەرى 500 مەترگە سوزىلعان جاعالاۋ اۋماعىن قوقىستان تازالادى.

«قازترانسگاز» اكتسيونەرلىك قوعامىنىڭ ۇجىمى وتكەن سەنبىدە نۇر-سۇلتان مەن الماتى قالالارىندا وتكەن «بىرگە – تازا قازاقستان» اكتسياسىنا بىلەك سىبانا قاتىستى. وسىمەن ءۇشىنشى اپتاعا سوزىلعان سەنبىلىكتەرگە گاز سالاسىنىڭ 200-دەي مامانى جۇمىلدى. ەلىمىزدى كوگىلدىر وتىنمەن قامتاماسىز ەتىپ وتىرعان ىرگەلى كومپانيانىڭ قىزمەتكەرلەرى نۇر-سۇلتان قالاسىنىڭ اكىمى التاي كولگىنوۆ باستاعان شارا اياسىندا مايبالىق كولىنىڭ جاعالاۋىن تازالادى. ناتيجەسىندە، نەگىزىنەن دەنى پلاستيكتەن تۇراتىن بىرنەشە توننا قوقىس جينالدى.

ەكولوگيالىق سەنبىلىكتىڭ سوڭىندا «قازترانسگاز» اق كومپانياسىنىڭ جاستار ءىسى جونىندەگى كەڭەسىنىڭ مۇشەلەرى قازاقستاندىقتاردى پلاستيكالىق بۇيىمداردان باس تارتۋعا شاقىردى. بۇل دۇنيەجۇزى بويىنشا قالىپتاسىپ كەلە جاتقان تاجىريبە. جاستار ەكولوگيالىق تازا ماتەريالداردى پايدالانۋعا كوشۋ بايتاق ەلىمىزدىڭ تابيعاتىن قورعاۋدا ۇلكەن قادام بولاتىنىنا سەنىمدى.

«قازمۇنايگاز» ۇلتتىق كومپانياسى قورشاعان ورتانى قورعاۋ جانە ەڭبەك قاۋىپسىزدىگى ماسەلەسىن قاشاندا باستى نازاردا ۇستايدى. بۇل جۇمىسشىدان باستاپ باسشىعا دەيىن قاتاڭ ورىنداۋدى قاجەت ەتەتىن نەگىزگى قاعيدا، باستى تالاپ. «قازمۇنايگاز» كومپانياسىنىڭ مىندەتى – قورشاعان ورتاعا زيان كەلتىرۋدى بولدىرماۋ، بۇل باعىتتا نولدىك كورسەتكىشكە قول جەتكىزۋ جەتۋ.

ايتا كەتەيىك، اۋقىمدى رەسپۋبليكالىق ناۋقان قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ، ۇكىمەت باسشىسى اسقار مامين، مينيسترلەر، پارلامەنت دەپۋتاتتارى، قوعامدىق ۇيىمداردىڭ مۇشەلەرى، قوعام بەلسەندىلەرى، جاستار، بيزنەس وكىلدەرى تاراپىنان قولداۋ تاپتى.

Abai.kz