قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىشۇلى نازارباەۆ وتكەن جىلعى 5 قازانداعى جولداۋىندا قازاقستان حالقىنىڭ كۇندەلىكتى ءومىر ءسۇرۋ دەڭگەيىن قازىرگىدەن دە جوعارلاتۋدى تاپسىردى. اتالعان جولداۋدىڭ ءىىى تارماعى ء"ومىر سۇرۋگە جايلى ورتا قالىپتاستىرۋ" دەپ اتالادى. وسى تاراۋدىڭ ءبىرىنشى تارماعىندا ساپالى ءارى قولجەتىمدى تۇرعىن ءۇي سالۋ كەرەك ەكەنى ايتىلعان.

ەلباسى ەل حالقىنىڭ باسپانالى بولۋى ءۇشىن قانداي نەنى باستى نازاردا ۇستاپ وتىرعانىن ءبىلۋ ءۇشىن، جولداۋدا ايتقان ءسوزىن قاز-قالپىندا بەرىپ وتىرمىز.

- بۇگىندە ءبىز تۇرعىن ءۇي قۇرىلىسىنا زور سەرپىن بەرىپ وتىرعان «نۇرلى جەر» باعدارلاماسىن تابىستى ىسكە اسىرۋدامىز. تۇرعىن ءۇي يپوتەكاسىنىڭ قولجەتىمدىلىگىن ارتتىراتىن جاڭا اۋقىمداعى «7-20-25» باعدارلاماسى قولعا الىندى. اكىمدەرگە جەرگىلىكتى بيۋدجەت ەسەبىنەن جەڭىلدەتىلگەن يپوتەكا بويىنشا العاشقى جارنانى ءىشىنارا سۋبسيديالاۋ ماسەلەسىن پىسىقتاۋدى تاپسىرامىن. مۇنداي تۇرعىن ءۇي سەرتيفيكاتتارىن بەرۋ بىلىكتىلىگى جوعارى پەداگوگتەر، مەديتسينا قىزمەتكەرلەرى، پوليتسەيلەر جانە وڭىرگە قاجەتتى باسقا دا ماماندار ءۇشىن يپوتەكانىڭ قول جەتىمدىلىگىن ارتتىرادى. سونداي-اق، حالىقتىڭ الەۋمەتتىك تۇرعىدان ءالسىز توپتارى ءۇشىن ءىرى قالالاردا جالدامالى تۇرعىن ءۇي قۇرىلىسىن ۇلعايتۋ قاجەت. بۇل شارالار 250 مىڭنان استام وتباسى ءۇشىن تۇرعىن ءۇي جاعدايىن جاقسارتۋعا مۇمكىندىك بەرەدى. بيۋدجەت ەسەبىنەن سالىناتىن جاپپاي قۇرىلىس الاڭدارىنا ارنالعان ينجەنەرلىك ينفراقۇرىلىم جۇرگىزۋدى قوسا العاندا، مەملەكەت بەس جىل ىشىندە 650 مىڭ وتباسىعا نەمەسە 2 ميلليوننان استام ازاماتتارىمىزعا قولداۋ كورسەتەدى، - دەگەن بولاتىن ەلباسى.

ەلباسىنىڭ وسى تاپسىرماسىنا ساي ەلىمىزدىڭ جەر-جەرىندە قىزۋ قۇرلىس جۇمىستارى ءجۇرىپ، توپ-توبىمەن تۇرعىن ۇيلەر سالىنۋدا. مەملەكەتتىك باعدارلامامەن تۇرعىن ءۇي العان قازاقستاندىقتاردىڭ سانىن دا شەك جوق. بۇل جۇمىستار الدا دا ءدال وسىنداي باعىتتا، وسىنداي قارقىنمەن جالعاسارى ءسوزسىز.

وسىنداي يگى شارالاردىڭ ءبىرى جاقىندا قاراعاندى وبلىسىندا ورىن الدى. انىقتاپ ايتقاندا قاراعاندىدا مەملەكەتتىك «7- 20- 25» باعدارلاماسى اياسىندا سالىنىپ جاتقان تۇرعىن ۇيلەردىڭ ارنايى جارمەڭكەسى ءوتتى. بۇندا وڭىردەگى 13 قۇرىلىس كومپانياسى مەن «باسپانا» يپوتەكالىق ۇيىمىنىڭ سەگىز سەرىكتەس بانكى وڭىردەگى تۇرعىندارعا يپوتەكالىق نەسيە الۋدىڭ ءتيىمدى جولدارىن ءتۇسىندىرىپ بەردى.

ەرەكشە اتاپ ءوتۋىمىز كەرەك، بۇل ۇيىمداستىرىلعان تۇرعىن ۇيلەر جارمەڭكەسى باسپاناعا مۇقتاج جانداردىڭ «7- 20 – 25» باعدارلاماسى ارقىلى باسپانالى بولۋىنا كومەكتەسۋ ءۇشىن ۇيىمداستىرىلىپ وتىر. «باسپانا» يپوتەكالىق ۇيىمىنىڭ مالىمەتىنشە، بۇل باعدارلامانىڭ اياسىندا جاڭادان سالىنعان پاتەرلەرگە جەتى پايىزبەن جيىرما جىلعا، ال ەكىنشى نارىقتاعى تۇرعىن ۇيلەرگە 7,75 پايىزبەن ون بەس جىلعا نەسيە بەرىلەدى. ودان دا جاقسىسى بۇنداي مۇمكىندىكتەن جالاقىسى ءسال تومەن ازاماتتاردا يگىلىكتەنە الادى.

وسى جوبا ارقىلى باسپانالى بولعىسى كەلگەن قاراعاندىلىق تۇرعىن جۇلدىزاي قارابەكوۆا ارنايى جارمەڭكەگە كەلگەن. ونىڭ ايتۋىنشا، جاس وتباسى ءۇش جىلدان بەرى پاتەر ىزدەپ ءجۇر. قازىرگە دەيىن باسپانا جالداپ تۇرىپ جاتىر ەكەن.

– تابىسىمىزدىڭ باسىم بولىگى ءۇي جالداۋعا كەتەتىندىكتەن، باسپاناعا ماردىمدى قارجى جيناۋ قيىن. سوندىقتان ءبىز ءوز جاعدايىمىزعا قاراي ەكى بولمەلى ءۇي قاراستىرىپ جاتىرمىز، – دەيدى ول.

ءوز كەزەگىندە «Eurazia Building» جشس قاراعاندى كوپ پاتەرلى تۇرعىن ءۇي كەشەنىنىڭ ديرەكتورى دارحان سادۋاقاس قالا تۇرعىندارىنىڭ باسپانالى بولۋىنا ۇلكەن مۇمكىندىك تۋىپ تۇرعانىن ايتتى. ونىڭ سوزىنشە، تۇرعىندار ءوز قالاۋىنشا بيزنەس ساناتتاعى نەمەسە قولجەتىمدى باعاداعى پاتەرلەر الا الادى.

ايتا كەتەرلگى، سالىنعان ۇيلەردى «نۇر وتان» پارتياسىنىڭ ارنايى كوميسسياسى قاداعالالاپ تەكسەرىپ، وتكىزىپ الادى. ولار تۇرعىنداردىڭ ارنايى باعدارلامامەن باسپانا الۋىن عانا ەمەس، سالىنعان ءۇيدىڭ ساپاسىن دا سارالاپ، قاداعالايدى.

– قۇرىلىسقا قانداي ماتەريالدار قولدانىلدى، قالاي سالىپ جاتىر، ينفراقۇرىلىمى بار ما دەگەن سياقتى تالاپتار بويىنشا تەكسەرىپ، قاجەت جاعدايدا وزگەرىستەر مەن ۇسىنىستارىمىزدى ايتامىز. ماسەلەن، ءبىز وسى سالىنعان ۇيلەردىڭ ءبىرىنشى قاباتىندا ەگدە جاستاعى ادامداردىڭ كوڭىل كوتەرۋ ورتالىعى مەن بالاباقشا ورنالاسسا دەگەن ۇسىنىس جاساپ وتىرمىز، – دەيدى «نۇر وتان» پارتياسى قاراعاندى وبلىستىق فيليالى توراعاسىنىڭ ورىنباسارى قاديشا وسپانوۆا.

بولاشاقتا قاراعاندى قالاسىنىڭ ورتالىعى بولادى دەپ جوسپارلانىپ وتىرعان قالانىڭ وڭتۇستىك شىعىسىندا تۇرعىن ۇيلەر كوپتەپ سالىنۋدا. اكىمشىلىكتىڭ ەسەبىنە سەنسەك، وسى جارمەڭكە كەزىندە 450 ادام 4 جارىم ملرد تەڭگە مولشەرىندە يپوتەكامەن ءۇي الۋعا تاپسىرىس بەرگەن. ۇيىمداستىرۋشىلار بۇنداي باستامالار الدا ءجيى ءوتىپ تۇراتىنىن ايتادى.

Abai.kz