مەملەكەت باسشىسى قاسىم-جومارت توقاەۆ مينيستر بەردىبەك ساپارباەۆتى قر پرەمەر-ءمينيسترىنىڭ ورىنباسارى قىزمەتىنە تاعايىندادى. بۇل تۋرالى اقوردا سايتى حابارلادى. 

"بەردىبەك ماشبەكۇلى ساپارباەۆ قازاقستان رەسپۋبليكاسى پرەمەر-ءمينيسترىنىڭ ورىنباسارى بولىپ تاعايىندالسىن، ول قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى قىزمەتىنەن بوساتىلسىن", دەپ جازىلعان پرەزيدەنت جارلىعىندا.

بەردىبەك ماشبەكۇلى ساپارباەۆ 1953 جىلى قىزىلوردا وبلىسىندا تۋعان. 66 جاستا. ەكونوميكا عىلىمدارىنىڭ دوكتورى. پروفەسسور.

1977 جىلى جىلى الماتى حالىق شارۋاشىلىعى ينستيتۋتىن «ەكونوميكا جانە ماتەريالدىق-تەحنيكالىق جابدىقتاۋ» ماماندىعى بويىنشا ءبىتىردى.

1988-1993 جىلدارى قازاقستان رەسپۋبليكاسى ءبىلىم ءمينيسترىنىڭ ورىنباسارى بولدى.

1993 جىلى پرەزيدەنت اپپاراتى ءبولىمى مەن قازاقستان رەسپۋبليكاسى مينيسترلەرى كابينەتى مەڭگەرۋشىسىنىڭ ورىنباسارى قىزمەتىنە تاعايىندالعان.

1994-1995 جىلدارى قازاقستان رەسپۋبليكاسى مينيسترلەرى كابينەتىنىڭ ىستەر باسقارماسىنىڭ قارجى، ەڭبەك جانە الەۋمەتتىك قورعاۋ ءبولىمى مەڭگەرۋشىسىنىڭ ورىنباسارى جانە مەڭگەرۋشىسى بولدى.

1995 جىلى قر مينيسترلەرى كابينەتى اپپاراتىنىڭ باسشىسى،

1995-1999 جىلدارى ارالىعىندا قىزىلوردا وبلىسىنىڭ اكىمى،

1999-2002 جىلدارى ارالىعىندا وڭتۇستىك-قازاقستان وبلىسىنىڭ اكىمى بولدى.

2002-2006 جىلدار ارالىعىندا قر كەدەندىك باقىلاۋ اگەنتتىگىنىڭ توراعاسى، قر قارجى مينيسترلىگىنىڭ ۆيتسە-ءمينيسترى، كەدەندىك باقىلاۋ كوميتەتىنىڭ توراعاسى قىزمەتتەرىن اتقاردى.

2006-2007 جىلدار ارالىعىندا پرەمەر-مينيستر كەڭسەسى باسشىسىنىڭ ورىنباسارى – قازاقستان رەسپۋبليكاسى پارلامەنتىندەگى ۇكىمەتتىڭ وكىلى بولىپ قىزمەت ەتتى.

2007 جىلى قر ەكونوميكا جانە بيۋدجەتتىك جوسپارلاۋ ۆيتسە-ءمينيسترى،

2007 جىلدىڭ 27 تامىزىنان باستاپ قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى لاۋازىمىندا بولعان.

2009 جىلعى 4 ناۋرىزدا شىعىس قازاقستان وبلىسىنىڭ اكىمى بولىپ تاعايىندالدى.

2014 جىلدىڭ قاراشاسى - 2015 جىلدىڭ قىركۇيەگى ارالىعىندا قر پرەمەر-ءمينيسترىنىڭ ورىنباسارى.

2015 جىلعى 11 قىركۇيەكتە قازاقستان رەسپۋبليكاسى پرەزيدەنتىنىڭ جارلىعىمەن اقتوبە وبلىسىنىڭ اكىمى بولىپ تاعايىندالدى.

2019 جىلعى 25 اقپاندا قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ ءمينيسترى بولىپ تاعايىندالعان.

Abai.kz