قىزىلوردادا تامىز كەڭەسى باستالدى. «باقىتتى بالالىق – جارقىن بولاشاق كەپىلى» تاقىرىبىندا بالالاردىڭ قۇقىقتارىن قورعاۋ ماسەلەسىمەن اينالاساتىن مامانداردىڭ وبلىستىق پلەنارلىق ءماجىلىسى ءوتتى،- دەپ حابارلايدى اباي-اقپارات.

شاراعا بۇۇ بالالار قورى بالالاردىڭ قۇقىقتارىن قورعاۋ باعدارلامالارىنىڭ ۇيلەستىرۋشىسى مەيرامكۇل الىبەكوۆا، قىزىلوردا وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ سۋدياسى قايرات بەرجانوۆ، «Bilim foundation» قق-نىڭ اتقارۋشى ديرەكتورى ەرلان ايتمۇحامبەت، ى.التىنسارين اتىنداعى ۇلتتىق ءبىلىم اكادەمياسىنىڭ ينكليۋزيۆتىك ءبىلىم بەرۋ ماسەلەسى بويىنشا اعا وقىتۋشىسى ءمولدىر سەيدينا قاتىستى.

ءبىلىم سالاسىنداعى باسىم باعىتتىڭ ءبىرى – كامەلەتكە تولماعانداردىڭ قۇقىقتارىن قورعاۋ، بالالاردىڭ ءومىر ءسۇرۋ ساپاسىن جاقسارتۋ، الەۋمەتتىك جەتىمدىكتىڭ الدىن الۋ بولىپ وتىر. اسىرەسە، اتا-اناسىنىڭ قامقورلىعىنسىز قالعان بالالاردى وتباسى ۇلگىسىنە جاقىنداتىلعان جاعدايلارمەن قامتاماسىز ەتۋ، ەرەكشە قولداۋدى قاجەت ەتەتىن بالالاردىڭ ينكليۋزيۆتىك ءبىلىم الۋىنا جاعداي جاساۋ ماڭىزدى ءرول اتقارادى. وسى مىندەتتەردى ورىنداپ، ماقساتتى جوسپارلاردى جۇزەگە اسىرۋ ءۇشىن ۇكىمەتتىك جانە ۇكىمەتتىك ەمەس ۇيىمدارمەن جۇمىس جۇرگىزىلۋدە. بۇل رەتتە بىرىككەن ۇلتتار ۇيىمىنىڭ بالالار قورىن (يۋنيسەف) ەرەكشە اتاپ وتكەن ءجون. قىزىلوردا وبلىسىندا بالالار قورىمەن بىرلەسىپ «كامەلەتكە تولماعاندار اراسىنداعى سۋيتسيدتەر پرەۆەنتسياسى»، «زاڭمەن قايشىلىقتاعى بالالارعا التەرناتيۆتى ءادىل سوت جۇيەسىن نىعايتۋ»، «پاتروناجدىق مەدبيكەلىك قىزمەت كورسەتۋ جۇيەسى»، «مەكتەپتەردە زورلىق-زومبىلىقتىڭ الدىن-الۋ جانە ارەكەت ەتۋ» جانە ت.ب. جۇمىستار قولعا الىندى. بۇگىنگى كۇنى بالالار قورىمەن «بالالاردىڭ ءال-اۋقاتىنىڭ مونيتورينگىن جاساۋ ءۇشىن دەرەكتەر بازاسىن جاساۋ» جوباسى اياسىندا جۇمىس جاسالۋدا.

كەڭەس وتىرىسى ينكليۋزيۆتى ءبىلىم بەرۋدى جۇزەگە اسىراتىن مامانداردىڭ، ەرەكشە قولداۋدى قاجەت ەتەتىن بالالاردىڭ اتا-انالارىنا ارنالعان بالالاردىڭ قۇقىقتارىن قورعاۋ فۋنكتسياسىن جۇزەگە اسىراتىن مامانداردىڭ جانە مەكتەپ پسيحولوگتارىنا ارنالاعان سەكتسيا جۇمىستارىمەن جالعاسىن تاپتى.

Abai.kz