نۇر-سۇلتاننىڭ ءبىلىم باسقارماسى مينيسترلىككە باعىنباي ما؟
جۋىردا مەكتەپتەردە دۇنيە ءجۇزى تاريحى ءپانىن ورىس تىلىندە وقىتۋ تۋرالى ايتىلىپ قالدى. الايدا، ول قوعام تاراپىنان قولداۋ تاپپادى. كەيىننەن ءبىلىم جانە عىلىم مينيسترلىگى ونىڭ جالعان اقپارات ەكەنىن ايتىپ، سەنبەۋگە شاقىردى. ال، كۇنى كەشە “نۇر-سۇلتان قالاسىنىڭ ءبىلىم باسقارماسى” مەملەكەتتىك مەكەمەسىنىڭ باسشىسى ءانۋار جانعوزين ەلوردانىڭ بىرنەشە قازاق مەكتەپتەرى اتالعان ءپاندى ورىس تىلىندە وقۋ تۋرالى بۇيرىق شىعارىپتى.
ال، 8-شىلدە كۇنى ءبىلىم جانە عىلىم ءمينيسترىنىڭ كەڭەسشىسى ەربولات مۇحامەدجان الەۋمەتتىك جەلىدەگى پاراقشاسىندا اتالعان اقپاراتتىڭ جالعان ەكەنىن جازىپ، ءتىپتى، ارانداتۋشىلىق دەپ ەسەپتەيتىنىن دە ايتتى.
ەربولات مىرزانىڭ پىكىرىن قاز-قالپىندا كەلتىرەيىك:
-كەشەدەن بەرى الەۋمەتتىك جەلىدە "دۇنيە ءجۇزى تاريحى" ءپانى وقۋ جىلى باسىنان قازاق مەكتەپتەرىندە ورىس تىلىندە وقىتىلادى دەگەن جالعان اقپارات تاراتىلۋدا.
بىرىنشىدەن، بۇعان دەيىن جازعانىمداي، الەۋمەتتىك جەلىدە جاريالانعان «fake اقپاراتقا» سەنبەۋلەرىڭىزدى سۇرايمىن. بۇنىڭ ءبارىن ارانداتۋشىلىق دەپ ەسەپتەيمىن.
ەكىنشىدەن، ءيا، راسىندا، بۇل ماسەلە وسىدان بىرنەشە جىل بۇرىن كوتەرىلگەن. بىراق، سىزدەرگە ناقتى سەنىممەن ايتا الامىن، قازىر جالپى ءبىلىم بەرەتىن قازاق مەكتەپتەردە دۇنيە ءجۇزى تاريحى ءپانى ورىس تىلىندە وقىتىلىپ جاتقان جوق. قازىرگى ۋاقىتتا جالپى ءبىلىم بەرەتىن مەكتەپتەردە وسى ءپان وقىتۋ تىلىنە بايلانىستى، ياعني قازاق سىنىپتارىندا قازاق تىلىندە، ال ورىس سىنىپتارىندا ورىسشا جۇرگىزىلىپ جاتىر، بۇگىنگى كۇنى باسقا جوسپار جوق.
P.S. بارلىق سۇراقتارعا بعم ارقاشان جاۋاپ بەرۋگە دايىن. سوندىقتان الدىن الا وسىنداي سۇراقتارىڭىزدى انىقتاپ الۋلارىڭىز دۇرىس.
الايدا، نۇر-سۇلتان قالالىق ءبىلىم باسقارماسى ءبىلىم جانە عىلىم مينيسترلىگىنىڭ بۇل تالابىن ەسكەرمەگەن سياقتى. ەسەسىنە، جانعوزين مىرزا قازىر مەكتەپتەردەگى بالالاردىڭ مەكتەپ عيماراتىن تازالاپ، تەحنيكالىق قىزمەتكەرلەرگە كومەك كورسەتۋىنە قاتتى ءمان بەرىپ جۇرگەن كورىنەدى. ءوزى دە جۇمىستان سوڭ تەحنيكالىق قىزمەتكەر ايەلدەرگە كومەكتەسەمىن دەپ شەشىم قابىلداعان ول، #وزىڭنەنباستا دەپ اتالعان ەستافەتاسىن نۇر-سۇلتانداعى بارلىق ءبىلىم بەرۋ ۇيىمدارىنىڭ باسشىلارىنا جولداعان.
بۇل جانعوزين مىرزانىڭ جاپوندىق ۇلگىدە بالا تاربيەلەۋگە جاساعان شىن ناسيحاتى ما، الدە، قوعام نازارىن الگى بۇيرىقتان باسقا جاققا اۋدارۋ ءۇشىن ويلاپ تاپقان ايلاسى ما؟
قالاي دەسەك تە، بۇل تاقىرىپ قازىر ءاداۋىر تالقىعا ءتۇسىپ جاتىر. ال، ءبىلىم جانە عىلىم ءمينيسترى اسحات ايماعامبەتوۆ بۇل ماسەلەگە قاتىستى:
-مەكتەپ بيۋدجەتىندە اكىمشىلىك-تەحنيكالىق پەرسونالعا ءتيىستى قاراجات پەن شتات قاراستىرىلعان. مۇنداي جۇمىستار وقۋشىلاردىڭ ءوز باستاماسى بويىنشا جانە اتا-انالاردىڭ رۇقساتىمەن عانا جۇرگىزىلەدى، - دەپ پىكىر ءبىلدىرىپتى.
الايدا، ءدال قازىر قوعام ءۇشىن بالانىڭ تەحنيكالىق قىزمەتكەرگە كومەكتەسكەنىنەن دە، "قازاق بالاسى الەمدىك تاريحتى نە سەبەپتى ورىس تىلىندە وقيدى؟" دەگەن ساۋال ماڭىزدى بوپ تۇر.
سوندا بۇل ماسەلەدە ءبىلىم جانە عىلىم مينيسترلىگى جالعان اقپار بەرىپ وتىر ما، الدە، نۇر-سۇلتان قالالىق ءبىلىم باسقارماسى ايماعامبەتوۆ باسقاراتىن مينيسترلىككە باعىنباي ما؟ بۇل ساۋالدارعا مينيستر ايماعامبەتوۆ نە دەيدى؟
نۇربيكە بەكسۇلتانقىزى
Abai.kz
