قوشانوۆ قاراعاندىعا اكىم بولىپ كەلگەنىنە ءۇش جىلعا جۋىقتادى. ۇكىمەت كەڭسەسىنەن شىققان ادام ءىرى وبلىستىڭ تىزگىنىن ۇستاعاندا ابدىراپ قالعان جوق. وسى ءۇش جىلدىڭ ىشىندە ءتۇرلى ورتا مەن ۇلت ۇيىسقان، كاسىبى مەن ءناسىبى ءار الۋان ءوڭىردى ۋىسىنان شىعارعان جوق.

كەلە سالىپ، 40 جىل باسپاناسىز جۇرگەن تاتتىمبەت اتىنداعى ونەر كوللەدجىنىڭ ماسەلەسىن شەشتى، عيمارات تاۋىپ بەردى.
20 جىلعا جۋىق جوندەۋ كورمەگەن جەزقازعان-قاراعاندى تاس جولىن جوندەتتى.
قاراعاندىداعى تەمىرجول ۆوكزالىنىڭ بۇرىنعى كەيپى مەن ءسانىن ساقتاي وتىرىپ، جاڭارتتى.
ەڭ باستىسى، مەنىڭ ويىمشا "مىناۋ قوشانوۆ سالدىرعان" دەپ ايتا جۇرەتىن بالالار مەن جەتكىنشەكتەر سارايى بولادى. 4000-نان استام بالا تەگىن قاتىساتىن روبوتوتەحنيكا، باعدارلامالاۋ جانە اۆيامودەلدەۋ سياقتى 50-دەن استام تەحنيكالىق باعىتتاعى ۇيىرمەلەر اشىلادى. بالالارعا زاماناۋي تەحنولوگيالاردى - گيدروپونيكا مەن اەروپونيكانى پايدالانۋدى ۇيرەتەتىن بولادى. بالالاردىڭ بولاشاعىن ويلاعان ادام ەڭ ىزگى ادام. وعان ەل بولاشاعىن دا سەنىپ تاپسىرۋعا بولادى.

ەرلان قوشانوۆ سىن مەن ەسكەرتپەگە اشىق ادام. حالىق پىكىرىنە قۇلاق قويىپ، نارازىلىق تۋسا شەشۋگە ۇمىلادى. سىن ايتىلعاندا باسىن الىپ قاشۋ ادەتىندە جوق. كەرىسىنشە ماسەلە ۋشىققان جەردەن تابىلادى.

جەلتوقسان ايىنىڭ ىزعىرىعىندا تەمىرتاۋدا 600 شاحتەر جەر استىنان ءۇش كۇن شىقپاي ەرەۋىلدەتكەنى ەستەرىڭىزدە شىعار. تاۋەلسىزدىك مەيرامىنا ءبىر ءتۇن قالعان. كەنشىلەردىڭ ەرەۋىلى ەل تۇتاستىعىنا دا سىن مەزەت بولدى. ەگەر، قوشانوۆ اشىنعان كەنشىلەردىڭ كوكەيىندەگى ءسوزدى تاپ باسىپ ايتپاعاندا ەكىنشى جاڭاوزەن بۇرق ەتە قالۋشى ەدى.

قوشانوۆتىڭ ەل تىنىشتىعىن شايقالتپاي، شەشۋشى ساتتە دۇرىس شەشىم قابىلداي الاتىن قابىلەتى ريم وقيعاسىندا دا انىق كورىندى. حالىق سەنگەن ادامىنىڭ سوزىنە عانا توقتايدى. قوشانوۆ ەل سەنىمىنە يە بولا الدى. از ۋاقىتتا مۇنداي سەنىمگە يە بولۋ قوعامعا ادال قىزمەت ەتكەن ادامنىڭ قولىنان عانا كەلەدى.

ءبىزدىڭ وبلىستى تالاي ادام باسقاردى. تەك وسى لاۋازىمدى ابىرويمەن، ارتىنان ءسوز ەرتپەي اتقارعان شەنەۋىك كەمدە كەم. ەرلان جاقانۇلى ءۇشىن قاراعاندى وبلىسى ۇلكەن مەكتەپ بولعانى ايقىن. حالىقتى قانداي ماسەلە مازالايتىندىعىن تومەننەن كورىپ، ءبىلىپ كەتتى.

كوپ بالالى انالار ماسەلەسىندە مەن ەرلان جاقانۇلىنىڭ قولداۋىنا ارقا سۇيەدىم. بۇل ماسەلە ءبىزدىڭ وڭىردە ءبىراز شەشىمىن تاپتى. كوپ بالالى انا مەن بالالارىنا تەگىن جولاقى بيلەتى مەن بالاباقشاعا ەلۋ پايىز جەڭىلدىك، وقۋشىلارعا ۇزارتىلعان كۇن، تەگىن لاگەرلەر مەن ۇيىرمەلەر، ۆسەوبۋچ - وڭىرلەردىڭ ىشىندە تەك ءبىزدىڭ وبلىستا عانا جۇزەگە استى. باسقا وبلىستاردا كوپ بالالى انالاردىڭ ماسەلەسى ءجۇردىم-باردىم دەڭگەيىندە قالدى. سەبەبى، رەسپۋبليكا دەڭگەيىندە ءبىرىزدى، ورتاق ساياسات جۇرگىزىلمەدى. ءار ءوڭىر باسشىسى ءوز قۇزىرەتى مەن قالاۋى شەڭبەرىندە عانا ماسەلەلەردى شەشتى. وبالى نەشىك ەرلان جاقانۇلى قانداي سۇراقپەن بارسام دە، شەشۋگە پارمەن بەرىپ وتىردى. ال، اتاۋلى كومەك تاعايىنداۋداعى ۆولوكيتا، "باقىتتى وتباسى" بويىنشا سەرتيفيكات ماسەلەسى ۇكىمەتتىك دەڭگەيدە عانا شەشىلەتىن دۇنيە. ول ماسەلەلەردى ەرلان جاقانۇلى جاقسى بىلەدى، ەندى وسى ماسەلەگە قانىق ادام رەتىندە كوپ بالالى انالارعا قاتىستى ساياسات دۇرىس ارناعا بۇرىلاتىنىنا سەنىمدىمىن.

ءلاززات قوجاحمەتتىڭ facebook پاراقشاسىنان

Abai.kz