شىمكەنت قالالىق مامانداندىرىلعان اۋدانارالىق سوتى ەرعالي قۇلىباەۆ، اباي ناحيتوۆ جانە نۇرجان ابىلداەۆتى - 5 تاۋلىككە، نۇرجان مۇحاممەدوۆتى 15 تاۋلىككە ("بەيبىت ميتينگ وتكىزۋ زاڭىن" ءبىر جىلدا ەكى رەت بۇزعانى ءۇشىن 15 كۇندىك جازا بەرىلدى) قاماۋعا شەشىم شىعاردى. بەلسەندىلەر سوت شەشىمىمەن كەلىسپەيدى. ال سوت بەلسەندىلەردىڭ ايىبى تولىق دالەلدەندى دەپ سانايدى.
ءتورت بەلسەندى دە 25 تامىزدا شىمكەنتتەگى اباي ساياباعىندا بيلىككە، ەلدىڭ ەكس-پرەزيدەنتى نۇرسۇلتان نازارباەۆتىڭ قاسىم-جومارت توقاەۆتى ورنىنا قويعانىنا قارسىلىق بىلدىرگەن. بۇعان قوسا، بەلسەندىلەر بيلىكتەن «ساياسي تۇتقىنداردى» تۇرمەدەن بوساتۋدى تالاپ ەتكەن. وسى ميتينگ ءۇشىن قامالعان ءتورت بەلسەندى 15 تامىزدا شىمكەنت قالاسى اكىمدىگىنەن نارازىلىق اكتسياسىن وتكىزۋگە ءوتىنىش جازعانىمەن، جەرگىلىكتى بيلىك رۇقسات بەرمەگەن.
ال اقتوبەدە بەرىك نوعاەۆ – 5 تاۋلىككە، جاقىپ ابىلازىۇلى 3 تاۋلىككە قامالدى. ولار دا "بەيبىت ميتينگ وتكىزۋ ەرەجەسىن بۇزدى" دەپ ايىپتالدى. ەكەۋى دە قىركۇيەكتىڭ باسىندا "قازاقستانداعى قىتاي جوبالارىنا" قارسى نارازىلىق شاراسىنا قاتىسقان.
اقتوبەلىك بەلسەندىلەردىڭ ءبىرى الىبەك ءمولديننىڭ ايتۋىنشا، پوليتسيا بەرىك نوعاەۆتى 17 قىركۇيەك كۇنى اقتوبەدەگى گازبەن جابدىقتاۋ مەكەمەسىنە جەكە شارۋاسىمەن بارا جاتقان جەرىنەن ۇستاپ اكەتكەن.
ال نۇر-سۇلتانداعى ماماندانداندىرىلعان اۋدانارلىق اكىمشىلىك سوتى جاس بەلسەندى التىن بازاربايدى ون تاۋلىككە قامادى. ونىڭ ادۆوكاتى ولگا ەنن سوت قاۋلىسىمەن كەلىسپەي، اپەللياتسيالىق ارىز جازعاندارىن ايتتى. بازارباي 3 قىركۇيەكتە "بايتەرەك" مونۋمەنتى الدىندا "قىتاي جوبالارىنا قارسى" اكتسياعا قاتىسقان. سوت بەلسەندى "بەيبىت ميتينگ وتكىزۋ زاڭىن بۇزدى" دەپ تانىدى.
سونداي-اق نۇر-سۇلتان سوتى 60 جاستاعى ءاسيا كارىموۆاعا 50 ايلىق ەسەپتىك كورسەتكىش (126 مىڭ تەڭگە) كولەمىندە ايىپپۇل سالدى. كارىموۆانىڭ ايتۋىنشا، ول 10 قىركۇيەكتە "بايتەرەك" مونۋمەنتى جانىندا ون جىلدان بەرى قاماۋدا وتىرعان "قازاتومونەركاسىپ" ۇلتتىق كومپانياسىنىڭ بۇرىنعى پرەزيدەنتى مۇحتار جاكىشەۆتى بوساتۋدى تالاپ ەتكەن.
16-18 قىركۇيەكتە الماتى مەن نۇر-سۇلتاندا دا بىرنەشە بەلسەندى "بەيبىت ميتينگ وتكىزۋ زاڭىن بۇزدى" دەپ ايىپتالىپ، 10-15 تاۋلىككە قامالعان. ولاردىڭ كوبى 4-5 قىركۇيەكتە وتكەن "قىتايدىڭ جوبالارىنا قارسى" نارازىلىق شاراسىنا قاتىسقان.
ال "Qaharman" قۇقىق قورعاۋشىلار قوزعالىسى بەلسەندىلەردىڭ ۇستالۋىن ەلدە ەكسترەميستىك ۇيىم دەپ تانىلعان "قازاقستاننىڭ دەموكراتيالىق تاڭداۋى" قوزعالىسىنىڭ الداعى كۇنگە جوسپارلاعان نارازىلىق شاراسىمەن بايلانىستىرادى.
Abai.kz
