مەملەكەت باسشىسى قحر بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ توراعاسى لي چجانشۋمەن كەزدەستى.

كەزدەسۋ بارىسىندا قازاقستان پرەزيدەنتى قاسىم-جومارت توقاەۆتىڭ بيىلعى 11-12  قىركۇيەكتە قىتايعا بارعان العاشقى مەملەكەتتىك ساپارىنىڭ قورىتىندىلارى مەن جاسالعان كەلىسىمدەرى تالقىلاندى. سونىمەن قاتار، قازاق-قىتاي  جان-جاقتى ستراتەگيالىق  ىنتىماقتاستىعىنىڭ قازىرگى جاعدايى مەن  دامۋ پەرسپەكتيۆالارى جايلى اڭگىمەلەستى.

لي چجانشۋ قازاقستان پرەزيدەنتىنە ۇلكەن قۇرمەت كورسەتكەنى ءۇشىن ريزاشىلىق ءبىلدىرىپ، قحر توراعاسى سي ءتسزينپيننىڭ شىنايى سالەمىن جەتكىزدى.

– توراعا سي تسزينپين سىزدى مەملەكەتتى باسقارۋ ىسىندە ءوز كوزقاراسى بار، ءوزارا قارىم-قاتىناسىمىزدىڭ ستراتەگيالىق ماڭىزىن تەرەڭ تۇسىنەتىن، تاجىريبەسى مول ساياساتكەر رەتىندە جوعارى باعالايدى. سوندىقتان ەكى ەلدىڭ كوشباسشىلارى اراسىندا وتە ماڭىزدى كەلىسسوزدەر ءوتتى. ءسىزدىڭ ەلىڭىز بىزگە جاقسى دوس، ءسىز دە بايلانىستارىمىزدىڭ دامۋىنا زور ۇلەس قوسىپ وتىرسىز، - دەدى لي چجانشۋ.

قازاقستان پرەزيدەنتى ەكى ەل اراسىنداعى ەگەمەندىك قۇقىقتاردى ءوزارا قۇرمەتتەۋگە، اينىماس حالىقارالىق قاعيداتتارعا جانە ءوزارا ءتيىمدى ىنتىماقتاستىقتى دامۋعا نەگىزدەلگەن دوستىق بايلانىستاردى اتاپ ءوتتى.

– شىن مانىندە، ءبىزدىڭ ەلدەر اراسىنداعى قارىم-قاتىناس جونىندە ماڭىزدى، ىرگەلى كەلىسىمدەر جاسالدى. ءبىزدىڭ ەلدەرىمىزدىڭ قارىم-قاتىناسى ماڭگىلىك ستراتەگيالىق سيپاتتا. بۇل كەلىسىمدەرگە ءسىزدىڭ دە قوسقان ۇلەسىڭىز وراسان. ەلىمىزدە ماڭىزدى ءىس-شاراعا قاتىساسىز. سىزگە ساتتىلىك تىلەيمىن! - دەدى قاسىم-جومارت توقاەۆ.

Abai.kz