ء"بولىپ ال دا، جەي بەر!" قازىر ءدال وسىنداي قاعيدا بەلەڭ الىپ تۇر. "تەندەر" دەيتىن "جەڭدەر" ۇرانىن ايتپاعاننىڭ وزىندە مەملەكەتتىك قورلاردىڭ ءوزى سۇمدىق.

زەينەتاقى جيناقتاۋ قورىنىڭ اكىمشىلىك شىعىنى قارجى مينيسترلىگىنىڭ ءوزىن ون ورايتىن كورىنەدى. ول اقشانى دا وڭدى-سولدى شاشىپ، دامۋشى ەلدەردىڭ بانكتەرىنە بەرىپ قويىپ الا الماي ساندالىپ ءجۇر. نە دەگەن مايشەلپەك؟! ال، ەندى وعان مىندەتتى مەديتسينالىق ساقتاندىرۋ دەگەن قازىردىڭ وزىندە 200 ميلليارد قارجى جيناپ العان تاعى ءبىر مايشەلپەك قوسىلدى.

بۇل قور 90-جىلدارى ءبىر رەت قۇرىلىپ، ءبارىمىز جالاقىمىزدان تىرنەكتەپ جيناپ قارجى اۋدارعانبىز. كەيىن تالاپكەر يمانباەۆ دەيتىن باسشىسى قورداعى اقشانى تۇگەل سىپىرىپ الىپ اقش-قا قاشىپ كەتتى. ءبىراز شۋلادىق تا قويدىق. قازىر مۇلدە ۇمىتتىق.

قور قۇرىلسا دا وتاندىق مەديتسيناعا بيلىك تىزگىنىن ۇستاپ وتىرعانداردىڭ وزدەرى سەنبەيدى. ولار قىڭق ەتىپ اۋىرسا شەتەل اسىپ ەمدەلەدى. گەرمانيا، يزرايل نەمەسە وزگە ەلدەرگە بارىپ ساۋىعىپ كەلەدى. سوندىقتان قاراپايىم حالىقتى "ولمەك تۇرماق ومىرەم قاپ", "پۇل بولماساڭ، كۇل بول" دەگەندەي تونالعان، ىسىراپتالعان بيۋدجەتكە تەلمىرتىپ قويادى.

جوعارى ءبىلىم الۋ ءۇشىن دە چينوۆنيك اتاۋلىنىڭ بالالارى قۇس قايتقاندا ەۋروپا مەن باتىس وركەنيەتتى ەلدەرىنىڭ ۋنيۆەرسيتەتتەرىنە اتتانادى. جالعىز جارىم كەتپەيدى، شەشەلەرىن ەرتە كەتەدى. بار بولسا، اتا-اجەسى دە قوسىلا شابادى. ويتكەنى، لوندون، ۋاشينگتون، بونن، نيۋ-يورك سەكىلدى الەمنىڭ ءىرى قالالارىندا ولاردىڭ الدە قاشان ساتىپ الىپ قويعان جايلى ءۇي-جايلارى بار.

ال، مۇنداعى "بويداق" وتاعاسى ەش جەتىمسىرەپ جۇتامايتىنى ايتپاسا دا تۇسىنىكتى. اپتا سايىن چارتەرلىك رەيسپەن ۇشىپ بارىپ كەلەمىن دەسە، ەشكىم وعان ء"اي" دە، "قوي" دا دەمەيدى. مۇنداي جاعدايدا مەملەكەتتىك ءىرى لاۋازىمدا وتىرعاندار ەلدەگى مەديتسينانىڭ، ءبىلىم بەرۋدىڭ ساپاسىنا، جالپى، ەل مەن جەردىڭ، حالىقتىڭ تاعدىرىنا پىسىرىپ تا قارامايتىنىن اڭعارۋ ءۇشىن كوپ اقىلدىڭ قاجەتى جوق.

قۋاندىق شاماحايۇلىنىڭ facebook پاراقشاسىنان

Abai.kz