27 قىركۇيەكتە سەرۆانتەس ينستيتۋتىنىڭ (مادريد، يسپانيا) شتاب-پاتەرىندە قازىرگى قازاق پروزاسى مەن پوەزياسىنىڭ يسپان تىلىندەگى انتولوگياسى تانىستىرىلدى.

تۇساۋكەسەرگە تانىمال يسپان جازۋشىلارى، اۋدارماشىلار، فيلولوگتار، جۋرناليستەر، سونداي-اق يسپانياداعى قازاقستان دوستارى كلۋبىنىڭ مۇشەلەرى قاتىستى.

قازاقستان تاراپىنان شاراعا قر پرەزيدەنتىنىڭ كومەكشىسى، «رۋحاني جاڭعىرۋ» باعدارلاماسىن جۇزەگە اسىرۋ بويىنشا ۇلتتىق كوميسسيا حاتشىسى ايدا بالاەۆا، ۇلىبريتانياداعى قر توتەنشە جانە وكىلەتتى ەلشىسى ەرلان ىدىرىسوۆ، ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحانۇلى، قازاقستان جازۋشىلار وداعى توراعاسىنىڭ ورىنباسارى اقبەرەن ەلگەزەك قاتىستى.

«رۋحاني جاڭعىرۋ» باعدارلاماسى اياسىندا ىسكە اسىرىلعان بۇل جوبانىڭ ستراتەگيالىق سەرىكتەسى - يسپانيانىڭ مادەنيەت مينيسترلىگى، جوبانىڭ شىعارماشىلىق كەڭەسشىسى - سەرۆانتەس ينستيتۋتى. قازىرگى قازاق ادەبيەتىنىڭ ەكى انتولوگياسىن يسپان تىلىنە ادەبي اۋدارعان، باسىپ شىعارعان جانە تاراتقان - «Visor-Libros» باسپا ءۇيى. سەرىكتەستەردىڭ قولداۋىمەن جيناقتى دايىنداۋعا ەڭ جاقسى ادەبي اۋدارما ماماندارى تارتىلدى. سولاردىڭ ءبىرى - يسپان كورولدىك وتباسىنىڭ اۋدارماشىسى، فيلولوگيا عىلىمدارىنىڭ دوكتورى، پروفەسسور ماريا سانچەس پۋيگ. ول قازاق پروزاسىنىڭ انتولوگياسىن يسپان وقىرمانىنا ۇسىنىپ، ونىڭ العىسوزىن جازدى. ءيسپانتىلدى الەمگە قازىرگى قازاق پوەزياسىن تانىمال يسپان اقىنى، فيلولوگ، كورول اكادەمياسىنىڭ اكادەميگى لۋيس البەرتو دە كۋەنكو ۇسىندى.

سەرۆانتەس ينستيتۋتىنىڭ جەتەكشىسى روسا لەون اتاپ وتكەندەي، ونىڭ ارىپتەستەرى مەن ءوزى قازاقستاننىڭ الەمدى ءوزىنىڭ مادەنيەتى مەن ادەبيەتىمەن تانىستىرۋعا دەگەن ۇمتىلىسىن قولدايدى.

«قازاق وقىرماندارى ءبىزدىڭ ۇلى جازۋشىلارىمىزبەن، اقىندارىمىز بەن سۋرەتشىلەرىمىزبەن جاقسى تانىس دەپ سەنەمىن. ءبىز ولاردى بۇكىل الەم تانۋى ءۇشىن كوپتەگەن جۇمىستار اتقاردىق. بىراق، ناعىز دوستىق پەن تۇسىنىستىك ءۇشىن ەكىجاقتى مادەني الماسۋ بولۋى قاجەت. سوندىقتان، وسىنداي جيناقتىڭ باسىپ شىعارىلۋى ءبىز ءۇشىن اسا ماڭىزدى»، - دەدى روسا لەون.

ءوز كەزەگىندە ايدا بالاەۆا:

«قازاق ادەبيەتى انتولوگياسىن بۇۇ-نىڭ 6 تىلىنە اۋدارۋ جانە جاريالاۋ - قازاقستاننىڭ تۇڭعىش پرەزيدەنتى نۇرسۇلتان نازارباەۆ باستاماشى بولعان «رۋحاني جاڭعىرۋ» باعدارلاماسىنىڭ بولىگى. باعدارلاما جوبالارىنىڭ ءبىرى «جاھاندىق الەمدەگى زاماناۋي قازاقستان مادەنيەتى» دەپ اتالادى. ونىڭ مىندەتى – قازىرگى قازاقستاندى مادەنيەت ارقىلى الەمگە تانىتۋ. سوندىقتان، ءبىز ءۇشىن ەڭ باستىسى اۋدارمانىڭ يسپان وقىرماندارىنىڭ جۇرەگىنە جول تاباتىن جوعارى كوركەمدىك ساپاسىنا قول جەتكىزۋ بولدى. ول ءۇشىن اۋدارماشىلار قازاقستانعا كەلىپ، اۆتورلارمەن، ءبىزدىڭ ەلىمىزبەن جانە مادەنيەتىمىزبەن تانىستى. ولار ءبىزدىڭ دوستىق قارىم-قاتىناسىمىزعا ارقاۋ بولدى. مۇنداي ىنتىماقتاستىق قازاق جانە يسپان مادەنيەتتەرىن ودان ءارى جاقىنداستىرۋعا، مەملەكەتتەر اراسىنداعى قاتىناستاردى نىعايتۋعا قىزمەت ەتەدى دەپ سەنەمىز»، - دەپ اتاپ ءوتتى.

قازىرگى قازاق پروزاسىنىڭ انتولوگياسى مەن قازىرگى قازاق پوەزياسىنىڭ انتولوگياسى 10 مىڭ دانا تيراجبەن يسپان تىلىندە جارىق كوردى. تارالىم يسپانيا كىتاپحانالارىندا، وقۋ ورىندارىندا جانە اكادەميالىق ورتالىقتارىندا، سونداي-اق 600 ميلليون ادامعا ارنالعان اۋديتورياسى بار لاتىن امەريكاسىنىڭ 18 ەلىنە تارايدى.

زاماناۋي قازاق ادەبيەتىنىڭ ۇزدىك ۇلگىلەرىنىڭ بۇۇ 6 تىلىنە اۋدارماسى «جاھانداعى زامانۋي قازاقستاندىق مادەنيەت» جوباسى اياسىندا جۇزەگە اسىپ وتىر. جوبا، ءوز كەزەگىندە، قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.نازارباەۆتىڭ باستاماسىمەن قولعا الىنعان «رۋحاني جاڭعىرۋ» باعدارلاماسىنىڭ ماڭىزدى باعىتى سانالادى. «جاھانداعى زامانۋي قازاقستاندىق مادەنيەت» جوباسىنىڭ مىندەتى – قازىرگى زامانعى قازاقستاننىڭ ادەبيەت، مۋزىكا، بەينەلەۋ ونەرى، حورەوگرافيا، كينو جانە تەاتر سالالارىنداعى مادەني قازىناسىن الەم جۇرتشىلىعىنا تانىستىرۋ.

Abai.kz