قازىرگى تاڭدا ەلىمىزدە انالاردىڭ ءوز ىستەرىن دوڭگەلەتىپ، كاسىپپەن اينالىسۋى ءۇشىن جان-جاقتى قولداۋلار جاسالىپ جاتىر. سەبەبى، قازاقستاندا تاۋەلسىزدىك العان كەزەڭنەن بەرى ەلباسى، قازاقستاننىڭ تۇڭعىش پرەزيدەنتى نۇرسۇلتان نازارباەۆ گەندەرلىك ساياسات تۋرالى ارنايى باعدارلاما قابىلداعان بولاتىن. ناتيجەسىندە قوعامنىڭ ءار سالاسىندا ايەل ادامداردىڭ ۇلەسى ارتقان. ولار قازىر جەكە كاسىپتە دە ۇلگىلى ەڭبەك ەتىپ كەلەدى. سولاردىڭ ءبىرى – گۇلسارا جاقۋباەۆا.

 گۇلسارا - قوستاناي وبلىسى، سارىكول اۋدانى، تيميريازەۆو اۋىلىنداعى جالعىز تىگىنشى ايەل. ول قاراپايىم كورپەدەن باستاپ، سىرت كيىم، جاڭا جىلدىق ءتۇرلى كوستيۋمدەرگە دەيىن تىگەدى. جاقىندا، گۇلسارا مەملەكەتتىك گرانت ارقىلى “باستاۋ” جوباسىنا قاتىسىپ، ناتيجەسىندە ءوز تىگىن شەبەرحاناسىنا جاڭا جابدىق ساتىپ الدى.

بۇگىندە تىگىن سالاسىنىڭ شەبەرى بولعان ول ينەمەن جاستايىنان دوس بولعان. تىگىن ونەرىنىڭ بارلىعىن ءوز قىزىعۋشىلىعىمەن ۇيرەنگەن. گۇلسارا سەگىز جاسىندا شالبارلاردىڭ بالاعىن قىسقارتىپ، بەلدەمشە تىگۋدى ۇيرەنگەن. ءسويتىپ ول تىگىن تىگۋ ونەرىن جانىنا سەرىك ەتتى. ەسەيە كەلە، بۇل كاسىپتەن قول ۇزبەي، تىگىن ماشيناسىن يگەرەدى.

ول مەكتەپ بىتىرگەن سوڭ، شاشتاراز ماماندىعىن وقىعان. الايدا، ءوزىنىڭ سۇيىكتى تىگىن ونەرىنەن دە قول ۇزبەي، دامىتىپ وتىردى. ول ونەرى تۇرمىسقا شىعىپ، انا اتانعاندا كوپ كومەگىن تيگىزدى.

قازىر گۇلسارانىڭ ءتورت بالاسى بار. ولار دا انالارى تىككەن كيىمدەردى كيىپ ءوستى. گۇلسارانىڭ تىگىنشىلىك ونەرىنە قىزىققان كورشىلەرى دە كەيىننەن وعان تاپسىرىس بەرە باستادى. ول كەز-كەلگەن تاپسىرىستى قابىلداپ، ءار جۇمىستى  تىڭعىلىقتى ءارى ساپالى ورىندادى.

گۇلسارا جاقۋباەۆا، كوپ بالالى انا، تىگىنشى:

 -كەز كەلگەن قيىندىقتاعى جۇمىستى الامىن دەپ ايتا الامىن. مەكتەپ وقۋشىلارىنا جاڭا جىلدىق كوستيۋمدەر، ساحنالىق كوستيۋمدەر تىگەمىن... ەسكى كيىمدى قايتا تىگۋ بويىنشا تاپسىرىستار كوپ. سونىمەن قوسا شىعارماشىلىق جۇمىس جاقسى كورەمىن. كويلەك فاسوندارىن ويلاپ تابۋ، ولاردىڭ سۋرەتىن سالۋدى ۇناتامىن، – دەيدى ول.  

 سوڭعى كەزەڭدە گۇلسارانىڭ تىگىن ماشيناسى بۇزىلىپ، ىستەن شىققان. ال، ونىڭ جاڭاسىن ساتىپ الۋعا گۇلسارانىڭ مۇمكىندىگى بولمادى. سوندا وعان اۋىلداستارى مەملەكەتتىك “باستاۋ” باعدارلاماسىنا قاتىسىپ، باعىن سىناۋعا كەڭەس بەرەدى.

ءسويتىپ ول العاش رەت مەملەكەتتىك “باستاۋ” باعدارلاماسى تۋرالى ەستيدى. تىگىنشىلىكتى بيزنەس كوزى دەپ ويلاماعان ول مەملەكەتتىك باعدارلاما ناتيجەسىندە بىرقاتار يگىلىكتەردى كورەدى.

تىگىنشىلىكتى كاسىپكەرلىك كوى دەپ ويلاماپپىن. ول مەن ءۇشىن جاي عانا قوسىمشا دۇنيە ەدى. ال مەملەكەت تاراپىنان ۇيىمداستىرىلىپ جاتقان تەگىن كۋرستار مەن كاسىپكەرلىك تۋرالى ترەنينگتەردەن وزىمە پايدالى اقپاراتتار الدىم.

سونىمەن قاتار، زاڭگەرلىك جانە بۋحگالتەرلىك ءبىلىم الدىم. ءوزىم جاڭا كليەنتتەر تاپتىم. كۋرس اياقتالعان سوڭ، 100 اەك مولشەرىندەگى مەملەكەتتىك گرانتقا يە بولدىم. وسى گرانتتىڭ ناتيجەسىندە تىگىن جابدىعىمدى جاڭارتىپ الدىم. ەندى كوبىرەك تاپسىرىس الۋعا مۇمكىندىگىم بار دەيدى كوپبالالى كاسىپكەر انا.

ءتۇيىن. بۇگىندە مەملەكەت تاراپىنان كوپ بالالى انالارعا جاسالىپ جاتقان قامقورلىق از ەمەس. بۇگىندە مەملەكەت انالارعا تەك الەۋمەتتىك جاعىنان عانا ەمەس، سونىمەن قاتار، ولاردىڭ ءبىلىم الىپ، جەكە كاسىبىن سول بىلىممەن ۇشتاستىرۋعا جاعداي جاساپ وتىر. سولاردىڭ ءبىرى گۇلسارا.

قازىر دە ەلىمىزدىڭ ءار وڭىرىندە گۇلسارا سەكىلدى ءوز كاسىبىن دوڭگەلەتىپ، ءوزى عانا ەمەس، اينالاسىنا پايداسىن كەلتىرىپ وتىرعان نازىك جاندىلار كوبەيىپ كەلەدى. ماسەلەن، وتكەن جىلدىڭ وزىندە “اتامەكەن” ۇلتتىق كاسىپكەرلەر پالاتاسىنىڭ جانىنداعى ىسكەر ايەلدەر كەڭەسى دە بەلسەندى قولداپ كەلەدى. وتكەن جىلى ايەلدەردىڭ كاسىپكەرلىكپەن اينالىسۋى ءۇشىن اتالعان پالاتادان 1 ميلرد تەڭگە كولەمىندە قارجى بولىنگەن بولاتىن. ال، ءبىر عانا اقمولا وڭىرىندە ون مىڭنان استام قىز-كەلىنشەك ءوز كاسىبىن اشىپ، وزىنە عانا ەمەس، اينالاسىنداعى ادامدارعا دا پايداسىن كەلتىرىپ وتىر.

وتكەن ءبىر جىلدا ەلىمىزدەگى كاسىپكەر ايەلدەردىڭ ۇلەسى 29,6 پروتسەنتتەن 30,1 پايىزعا دەيىن ارتقان. ال، سوڭعى ءۇش جىلدا ەۋروپالىق دامۋ بانكىنىڭ وزىنەن 26 ميلليارد تەڭگەنى قۇرايتىن جيىرما مىڭنان اسا نەسيە بەرىلگەن. بۇگىندە كاسىپكەرلىكپەن اينالىساتىن ايەلدەردىڭ بەلسەندىلىگى الماتى قالاسىندا بايقالعان. كاسىپكەرلىك سالاسىندا سولتۇستىك قازاقستان مەن باتىس وڭىرلەرىنىڭ بەلسەندىلىگى باسەڭدەگەن.

ءتۇيىن. قازىرگى ۋاقتاعى قازاق اقپارات كەڭىستىگىندەگى ەڭ اكتۋالدى ماسەلەلەردىڭ ءبىرى انا مەن بالا تاقىرىبى بولسا، سونىڭ ىشىندە كوپ بالالى انالاردىڭ تالاپ-ۋاجدەرى مەن ونى شەشۋگە باعىتتالعان مەملەكەتتىك ساياساتتىڭ جاي-جاپسارى جازۋ ءبىزدىڭ مىندەت.

مەملەكەت كوپ بالالى انالارعا قارايلاسپاي وتىر دەپ اۋىزدى قۋ شوپپەن سۇرتۋگە جانە بولماس. ويتكەنى، ۇكىمەتتىك ماسششتابتا اتقارىلىپ جاتقان كوپ بالالى انالاردى قولداۋعا باعىتتالعان ساياسات بىرتە-بىرتە جەمىسىن بەرىپ كەلەدى. سونىڭ جارقىن ۇلگىسى، جوعارىداعى كوپ بالالى انا - گۇلسارا جاقۋباەۆا. گۇلسارانىڭ مەملەكەت قولداۋىنىڭ ارقاسىندا ءوز كاسىبىن دوڭگەلىپ وتىرعانى جالعىز مىسال ەمەس. Abai.kz اقپاراتتىق پورتالىندا گۇلسارا سەكىلدى ءوز كاسىبىن باستاپ جاتقان انالار تۋرالى وسىنىڭ الدىندا جازىلعان ەدى.

مەملەكەتتىك قولداۋ ارقاسىندا ەشكىمگە الاقان جايماي، كاسىپ باستاپ جاتقان گۇلسارانىڭ مىسالى وزگە دە قولداۋعا مۇقتاج انالارعا موتيۆاتسيا بولادى دەپ سەنەمىز...

Abai.kz