ءماجىلىس دەپۋتاتى بەرىك دۇيسەمبينوۆ قر پرەمەر-ءمينيسترى ا. مامينگە 2019 جىلدىڭ 23 قىركۇيەگىندە تاجىك-اۋعان شەكاراسىندا جاۋىنگەرلىك قيمىلدار مەن اسكەري قاقتىعىستارىنا قاتىسقان وتانداستارىمىزعا «ارداگەر» مارتەبەسىن بەرۋ تۋرالى حات جولداعان بولاتىن. اتالمىش حاتقا ەلىمىزدىڭ قارۋلى كۇشتەرىنىڭ باس شتابى جاۋابىن بەردى.

جالپى، 1992-2001 جىلدار كەزەڭىندەگى تاجىك-اۋعان شەكاراسىن قاۋىپسىزدىكپەن قامتاماسىز ەتۋگە ارنالعان بۇل اسكەري قيمىلدارعا قازاقستاننان ون مىڭعا جۋىق جاۋىنگەر قاتىستى. ولاردىڭ الدىڭعى بۋىن وفيتسەرلەرىنىڭ جاسى بۇگىندە الپىستان اسسا، ەڭ جاسى قىرىق بەستە ەكەن.

مىسالى، 1995 جىلدىڭ 7 ساۋىرىندە، پشيحاۆر شاتقالىندا تاجىكستان شەكاراسىن قارۋ-جاراق پەن ەسىرتكى دالىزىنە اينالدىرماقشى بولعان، مۇزداي قارۋلانعان لاڭكەستەرمەن بولعان كەسكىلەسكەن شايقاستا 17 قازاق ساربازى قازا بولىپ، 30-دان اسا جاۋىنگەر اۋىر جاراقات العان.

«بۇگىندە قازاقستان – بىتىمگەرشىلىك دايىندىققا باسا نازار اۋدارا وتىرىپ، بۇۇ ميسسياسى اياسىندا ونىڭ گەوگرافياسىن كەڭەيتۋگە مۇددەلى ەل. اعىمداعى جىلدىڭ وتكەن ايىندا ءبىزدىڭ ەلىمىز 170 بىتىمگەر دايىندادى. ەرتەڭ الەم ەلدەرىندەگى بەيبىت ءومىردى قولداۋ ءۇشىن وتقا تۇسەتىن ءبىزدىڭ بىتىمگەر ساربازدارىمىز دا ەسكەرۋسىز قالماي ما؟ «ەرىم» دەگەن ەل بولماسا، «ەلىم» دەگەن ەر قايدان شىعادى؟!» - دەپ جازدى دەپۋتات ءوز حاتىندا.

دەپۋتات الەۋمەتتىك ادىلدىكتى ورناتۋ ماقساتىندا  مەملەكەت تىنىشتىعى مەن  قاۋىپسىزدىگىن ساقتاۋداعى  ەرەن ەرلىكتەرىن باعالاي وتىرىپ،  ءوسىپ كەلە جاتقان جاس بۋىندى تاربيەلەۋدەگى ماڭىزدىلىعىن ەسكەرە وتىرىپ، تاجىك-اۋعان شەكاراسىنداعى ۇرىستارعا قاتىسقان جاۋىنگەرلەرگە ءتيىستى قۇرمەت كورسەتىلۋىن سۇراعان بولاتىن.

كەشە عانا دەپۋتاتتىق حاتتىڭ جاۋابى كەلدى. ەلىمىزدىڭ قارۋلى كۇشتەرىنىڭ باس شتابى وسى ماسەلە جونىندەگى ءوتىنىشتى قاراعانىن، 2018 جىلعى 28 اقپاندا «ارداگەرلەر ۇيىمدارى كوتەرەتىن ماسەلەلەردى شەشۋ جونىندەگى ۇسىنىستاردى دايىنداۋ بويىنشا» زاڭ جوباسى بويىنشا جۇمىس توبى قۇرىلعانىن جانە «قر كەيبىر زاڭنامالىق اكتىلەرىنە جەكە ساناتتاعى ازاماتتاردى الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭىنىڭ جوباسى ازىرلەنگەنىن جەتكىزدى. وندا 1992-2001 جىلدارى تاجىكستان-اۋعانستان ۋچاسكەسىندە تمد-نىڭ سىرتقى شەكاراسىن قورعاۋدى كۇشەيتۋگە قاتىسقان اسكەري قىزمەتشىلەرگە «ارداگەر» مارتەبەسىن بەرۋ تۋرالى نورماسى ەنگىزىلگەنىن اتاپ ءوتتى.

Abai.kz