قازاقستان پرەزيدەنتتىگىنە ۇمىتكەر بولىپ، سايلاۋعا تۇسكەن، سايلاۋ قورىتىندىسى بويىنشا قازىرگى پرەزيدەنت قاسىم-جومارت توقاەۆتان كەيىنگى ەكىنشى ساتىعا جايعاسقان ساياساتكەر ءامىرجان قوسانوۆ الگىندە ەۋرازيا ارناسىنا سۇحبات بەرىپتى. 

سايلاۋدان كەيىنگى ەل-حالىقتىڭ وكپەسى جايلى ءسوز ەتىپ، سول كەزدە ءوزىن قولداعان ازاماتتارعا العىسىن بىلدىرگەن ساياساتكەر ءوزىنىڭ باستى قاتەلىگى - سول كۇنى تۇندە-اق، قاسىم-جومارت توقاەۆتى، ياعني پرەزيدەنتتى قۇتتىقتاعانى بولعانىن ايتىپتى.

«مەنىڭ قاتەلىگىم – تۇندە مويىنداۋىم دەپ ويلايمىن. مۇندا ۇلكەن تاڭداۋ بولدى: ساياسي حايپ جيناپ، ءوزىن سونشالىقتى تاباندى وپپوزيتسيونەر، رەۆوليۋتسيونەر ەتىپ كورسەتۋ. بىراق ونىڭ ارتى قيىن جاعدايعا الىپ كەلۋى مۇمكىن ەدى. سول سەبەپتى ماعان مەملەكەتتىڭ تاۋەلسىزدىگى، حالقىمىزدىڭ تىنىشتىعى قىمبات بولدى. قارالايتىنىن، كۇيەلەيتىنىن بىلسەم دە، وسىنداي قادامعا باردىم»، – دەپتى ءامىرجان قوسانوۆ.

Abai.kz