سارسەنبى, 19 اقپان 2020
46 - ءسوز 1501 10 پىكىر 10 قاڭتار, 2020 ساعات 12:28

مارقاكول اۋدانىندا حالىق ۇدەرە كوشىپ جاتىر

مارقاكول اۋدانىن اشۋ (اشپاۋ) جونىندەگى وكىمەتتىك كوميسسيا سول وڭىردە جۇمىسىن باستاماقشى.
ىسكە ءسات دەمەكپىز.

بۇل ماسەلە وبلىس باسشىلىعىنىڭ باستاماسىمەن ەمەس، كەرىسىنشە، ول جاقتان ماسەلەنى "قۇيىمشىقتاپ", جابۋلى قازاندى تۇمشالاپ تاستاۋعا تىرىسۋ جاعدايىندا بولىپ وتىر.

باسقا وبلىستاردا اكىمدەر حالىقتىڭ مۇددەسى ءۇشىن شىرىلداپ جۇرەدى.
ءبىر عانا مىسال، الماتى وبلىسىنىڭ اكىمى ا. باتتالوۆ بۇرىنعى نارىنقول اۋدانىن اشۋدى ەشقانداي ۋ-شۋسىز، ءوزىنىڭ دەڭگەيىندە شەشىپ بەردى. ويتكەنى، ورەسى ءبيىك، مەملەكەتتىك ويلاۋ دارەجەسى جوعارى. اۋدان اشۋ ءۇشىن "بالەمباي ميلليارد" كەرەك دەپ بايبالام دا جاسامادى، ايقايلاپ جار سالمادى. ۇكىمەتتىك كوميسسيا دا ارتىنىپ- تارتىنىپ بارعان جوق. نارىنقول اۋدانى اشىلدى، قازىر ەستۋىمىزشە، حالىق اقىرىنداپ كوشۋدە. مەملەكەتتىك دارەجەدە ويلاۋ، ۇلتتىق قاۋىپسىزدىك پرينتسيپتەرىن تەرەڭ ءتۇسىنۋ دەگەنىمىز وسى!

ءدال سونداي جاعدايداعى شىعىس اۋداندارىن اشۋ جەرگىلىكتى اكىمشىلىكتىڭ تۇسىنبەۋ "قىتاي قورعانىنا" تاپ بولدى. اقپاراتتى تۇمشالاپ، ماسەلەنى شەگەرىپ، حالىقتى زار - قاقساتىپ قويدى. كوتەرگەن ادام اكىمشىلىكتىڭ جاۋى، "وپپوزيتسيا". مىنە، ولاردىڭ ءپرينتسيپى.

ال ەندى، مارقاكولگە بارعاندا وكىمەتتىك كوميسسيانىڭ ەكى كوزى ءتورت بولارى ءسوزسىز. حالىق ۇدەرە كوشىپ جاتىر، يەن دالا، ادامداردىڭ ءومىر ءسۇرۋ يندەكسى تومەندەپ كەتكەن. سوقىر نەمەسە كەرەڭ بولماسا، كورەر كوزگە ءبارى انىق.
قازىر، ۇكىمەتتىك كوميسسياعا زەيىن، اقىل، مەملەكەتتىك تۇرعىدا ويلاۋ قابىلەتىن تىلەيىك...

ەرلان سايروۆتىڭ الەۋمەتتىك جەلىدەگى جازباسىنان

Abai.kz

10 پىكىر