پاۆلوداردىڭ مامانداندىرىلعان تەرگەۋ سوتى كۇدىكتى رەتىندە ۇستالعان وبلىس اكىمى بولات باقاۋوۆتى 2 ايعا قاماۋ تۋرالى شەشىم قابىلدادى.

سوت پروتسەسسى كەزىندە پروكۋرور وبلىس اكىمى بولات باقاۋوۆتىڭ قر قىلمىستىق كودەكسىنىڭ 362 بابى، 4 تارماعى، 3 بولىگى بويىنشا، ياعني، «ءوزىنىڭ جەكە باس پايداسى نەمەسە باسقا جەكە تۇلعانىڭ، ۇيىمنىڭ پايداسى ءۇشىن قىزمەتتىك مانسابىن نەمەسە بيلىك قۇزىرەتىن پايدالانۋ» بويىنشا كۇدىكتى دەپ تانىلعانىن ايتتى.

زاڭدا بۇل باپ بويىنشا، 5 جىلدان 10 جىلعا دەيىن باس بوستاندىعىنان ايىرۋ، دۇنيە مۇلكىن تاركىلەۋ، ءومىر بويى بەلگىلى ءبىر قىزمەتكە تاعايىندالۋ نەمەسە بەلگىلى ءبىر قىزمەتپەن اينالىسۋ قۇقىنان ايىرۋ جازاسى كوزدەلگەن.

باقاۋوۆ 2 ايعا قامالدى

مەملەكەتتىك ايىپتاۋ كۇدىكتى باقاۋوۆتى 2 ايعا، ياعني 2020 جىلدىڭ 16 ناۋرىزىنا دەيىن قاماۋدا ۇستاۋدى سۇرادى. پروكۋرور ءوز تالابىندا، كۇدىكتى باقاۋوۆ بوستاندىقتا ءجۇرىپ، تەرگەۋ پروتسەسسىنىڭ وبەكتيۆتى وتۋىنە كەدەرگى كەلتىرۋى مۇمكىن ەكەندىگىن ايتىپ، ءۋاج كەلتىرگەن.

ال باقاۋوۆ بولسا، وزىنە تاعىلىپ وتىرعان ايىپپەن كەلىسپەيتىنىن ايتقان. پاۆلودار وبىلىسىنىڭ اكىمى وزىنە قاتىستى سوتتان كەپىلاقى تولەۋ ارقىلى ۇيقاماققا جىبەرۋىن سۇراعان. ءتىپتى، سوتقا قاتىسقان اكىمنىڭ ەكى قورعاۋشىسى اكىمنىڭ تۋىستارىنىڭ 1 ميلليون تەڭگە كولەمىندە كەپىلاقى تولەگەنى تۋرالى قۇجاتتى كورسەتىپ، ونى ءىس ماتەريالدارىنا تىركەۋدى سۇراعان.

ءىستى پاۆلودار تەرگەۋ سوتىنىڭ سۋدياسى بالتابەك دۇنبەكباەۆ قاراپ، اكىم بولات باقاۋوۆتى 2 ايعا قاماۋ تۋرالى سانكتسيا قابىلدادى.

بولات باقاۋوۆ نە ءۇشىن قامالدى؟

سوت پروتسەسسى كەزىندە باقاۋوۆ ءىسى تۋرالى ەگجەي-تەگجەيلى باياندالدى. بۇل تۋرالى «Tengrinews.kz» سايتى جازدى.

پروكۋرور رۋستام سادۆاكاسوۆتىڭ ايتۋىنشا، 2019 جىلدىڭ قىركۇيەگىندە پاۆلودار وبلىستىق مەملەكەتتىك كىرىستەر دەپارتامەنتى «AksuTransLogistic» جشس-دە سالىققا قاتىستى كەشەندى تەكسەرىس جۇرگىزگەن. ال جاڭاعى «AksuTransLogistic» جشس-ءنىڭ جالعىز قۇرىلتايشىسى وبلىس اكىمى بولات باقاۋوۆتىڭ تۋىسى باقاۋوۆ ر.د. دەيتىن ادام بولعان.

سالىقشىلار جشس-ءنىڭ 2014 جىلدىڭ 1 قاڭتارى مەن 2018 جىلدىڭ 31 جەلتوقسانى ارالىعىنداعى بيۋدجەتكە تولەنەتىن سالىقتى ۋاقىتىلى تولەۋىن، كورپوراتيۆتىك، الەۋمەتتىك، ققس جانە باسقا دا مىندەتتى بيۋدجەتتىك تولەمدەردىڭ دۇرىس جۇرگىزىلۋىن تەكسەرگەن.

«جاۋاپتى مەملەكەتتىك قىزمەتكەر بولا تۇرا پاۆلودار وبلىسىنىڭ اكىمى باقاۋوۆ «AksuTransLogistic» جشس-دەگى تەكسەرىس تۋرالى ءبىلىپ، اتالمىش كاسىپورىن مەن ءوزىنىڭ تۋىسى بولىپ كەلەتىن باقاۋوۆ ر.د.-عا كەسىر تيگىزبەۋ ءۇشىن، وزىنە بەرىلگەن قۇقىقتى اسىرا پايدالانىپ، پاۆلودار وبلىستىق مكد-ءنىڭ جاۋاپتى تۇلعالارىنا اتالعان كاسىپورىنداعى تەكسەرىس تۋرالى، ونىڭ قورىتىندىسى تۋرالى اقپاراتتى جەتكىزۋگە تاپسىرما بەرەدى»، دەدى پروكۋرور.

مەملەكەتتىك ايىپتاۋدىڭ ايتۋىنشا، 2019 جىلدىڭ جەلتوقسانىندا وبلىس اكىمىنە  جشس-ءنى تەكسەرۋ كەزىندە سالىقتىق زاڭنامالاردىڭ بۇزىلعانى انىقتالىپ، 200 ميلليون تەڭگەدەن اسا سالىقتىڭ الىنۋى مەن سالىق تولەۋدەن ماقساتتى تۇردە بۇلتارعانىنا قاتىستى سوتقا دەيىنگى تەرگەۋدىڭ باستالعانى تۋرالى اقپارات جەتەدى.

«بولات باقاۋوۆ «AksuTransLogistic» جشس-ءنىڭ يەسى بولىپ تابىلاتىن ءوز تۋىسىنىڭ مۇددەسى ءۇشىن، ياعني، باسقا جەكە تۇلعانىڭ پايداسى ءۇشىن بىرنەشە مارتە زاڭسىز تۇردە وزىنە بەرىلگەن قۇقىق پەن قۇزىرەتتى اسىرا پايدالانىپ، پاۆلودار وبلىستىق مكد-ءنىڭ جاۋاپتى تۇلعالارىنان شىنايى قورىتىندىنى جاسىرىپ، ارتىق الىنعان سومانى 3-5 ميلليون تەڭگەگە دەيىن ازايتىپ كورسەتۋدى تالاپ ەتكەن»، دەدى مەملەكەتتىك ايىپتاۋشى.

ايتا كەتەيىك، پاۆلودار وبلىسىنىڭ اكىمى بولات باقاۋوۆقا قاتىستى قىزمەت بابىن اسىرا پايدالانۋ فاكتىسى بويىنشا ايىپ تاعىلىپ، ءىس تىركەلگەن. سول بويىنشا قازىر تەرگەۋ جۇمىستارى جۇرگىزىلۋدە. بۇل تۋرالى قر ۇقك مالىمدەگەن.

«ۇلتتىق قاۋىپسىزدىك كوميتەتى 2020 جىلعى 15 قاڭتاردا پاۆلودار وبلىسىنىڭ اكىمى ب. باقاۋوۆقا قاتىستى لاۋازىمدىق ۋاكىلەتتىلىكتەرىن اسىرا پايدالانۋ فاكتىسى بويىنشا قر قك 362-بابى 2-ءبولىمى 3-تارماعى بويىنشا تىركەلگەن قىلمىستىق ىسكە سايكەس جەدەل-تەرگەۋ ءىس-شارالارىن جۇرگىزدى. قازىرگى ۋاقىتتا تەرگەۋ امالدارى جالعاسۋدا. وسى كەزەڭدە تولىق دەرەكتەر تەرگەۋ مۇددەسىندە جاريالاۋعا جاتپايدى»،- دەلىنگەن ۆەدومستۆو حابارلاماسىندا.

بولات باقاۋوۆ كىم؟

ول 2016 جىلدىڭ ناۋرىز ايىندا پاۆلودار وبلىسىنىڭ اكىمى بولىپ تاعايىندالعان. 12 جىل اكىم بولعان.

بولات باقاۋوۆ 1971 جىلى پاۆلودار وبلىسىنىڭ جەلەزين اۋدانىنا قاراستى نوۆوكۋزمينكا اۋىلىندا تۋعان.

ءبىلىمى

قازاق قۇقىقتانۋ جانە حالىقارالىق قاتىناستار ينستيتۋتىن (2003) "زاڭ عىلىمدارى" ماماندىعى بويىنشا، حالىقارالىق بيزنەس، ەكونوميكا جانە كاسىپورىنداردى باسقارۋ اكادەمياسىن (2005) بىتىرگەن.

قىزمەتى

2008-2011 جىلدار ارالىعىندا پاۆلودار وبلىسى، تەرەڭكول اۋدانىنىڭ اكىمى،

2011-2014 جىلدار ارالىعىندا  اقسۋ قالاسىنىڭ اكىمى،

2014-2016 جىلدار ارالىعىندا پاۆلودار قالاسىنىڭ اكىمى،

2016 جىلدىڭ 25 ناۋرىزىنان بەرى پاۆلودار وبلىسىنىڭ اكىمى قىزمەتىن اتقارىپ كەلەدى.

اتاقتارى

ءحوببيى - اڭشىلىق. 2018 جىلعى اقپارات بويىنشا جالاقىسى - 744 مىڭ تەڭگە.

2002 جىلى - "ەرەن ەڭبەگى ءۇشىن" مەدالىمەن،

2011 جىلى "قر تاۋەلسىزدىگىنە 20 جىل" مەدالىمەن،

2012 جىلى "وبلىسقا سىڭىرگەن ەڭبەگى ءۇشىن" توسبەلگىسىمەن،

2015 جىلى "قۇرمەت" وردەنىمەن،

2016 جىلى "قر تاۋەلسىزدىگىنە 25 جىل" مەدالىمەن ماراپاتتالعان.

اكىم پورترەتى

بولات باقاۋوۆتىڭ قىزمەتى مەن قۇزىرەتىنە قاتىستى باسپاسوزدە سىن از ەمەس. ال بىلتىرعى جىلدىڭ سوڭىندا ونىڭ پورترەتى قايىرىمدىلىق اۋكتسيونىندا ساتىلعانى بەينەلەنگەن ۆيدەو الەۋمەتتىك جەلىگە تاراپ، جۇرت قىزۋ تالقى جاساعان. بەينەجازبادا كەش جۇرگىزۋشىلەرى - بەلگىلى ازىلكەشتەر، تۇرسىنبەك قاباتوۆ پەن ياروسلاۆ مەلەحين اكىم بولات باقاۋوۆتىڭ پورترەتىن اۋكتسيوندا ويناتىپ جاتقانى كورسەتىلگەن. اكىم پورترەتىنىڭ قۇنى 31 ميلليون تەڭگەگە دەيىن باعالانعان. بۇل ارينە، جۇرتتىڭ اشۋىن تۋعىزعان.

سول كەزدە پاۆلودار وبلىسى اكىمدىگىنىڭ ءباسپاسوز حاتشىسى ەرنار سايتاحمەت باق-قا پىكىر ءبىلدىرىپ، اكىم پورترەتىنىڭ قۇنى الەۋمەتتىك جەلىدە ايتىلعان باعادان الدەقايدا ارزان ەكەنىن، بار بولعانى 700 مىڭ تەڭگەگە ساتىلعانىن ايتقان.

Abai.kz