سۋديا شىنار وسپانوۆا قاستەر مۇساحانۇلى مەن مۇراگەر ءالىمۇلىن ارقايسىسىن ءبىر جىلعا باس بوستاندىعىنان ايىرىپ، جازاسىن قاۋىپسىزدىگى تومەن مەكەمەدە وتەۋدى بۇيىردى. بۇعان قوسا، ولاردىڭ ارقايسىسىنا 25 250 تەڭگە كولەمىندە ايىپپۇل سالدى. سوت ولاردى قىتايعا قايتارماۋدى ۇكىم ەتتى.
سوت ۇكىمىن تۇسىندىرگەن سۋديا ولاردىڭ ء"بىر كۇنى ەكى كۇنگە ەسەپتەلەتىنىن جانە قاماۋ مەرزىمى 2019 جىلدىڭ 18 قازانىنان باستاپ سانالاتىنىن" ايتىپ، ولاردىڭ "قاماۋدا قالۋ مەرزىمى - بەس اي 24 كۇن" دەدى.
سۋديا سوت ۇكىمى قولعا تيگەن كۇننەن باستاپ 15 كۇن ىشىندە قورعاۋ تارابىنىڭ ونى اپەللياتسياعا بەرۋگە بولاتىنىن ايتتى.
21 قاڭتاردا تاڭەرتەڭ وتكەن جارىسسوزدە پروكۋرور ەرجان ازىمباەۆ ەكى جىگىتتى ءبىر جىلعا تۇرمەگە قاماپ، 10 اەك كولەمىندە ايىپپۇل تولەتۋدى سۇراعان. مەملەكەتتىك ايىپتاۋشى "جەڭىلدەتىلگەن جاعدايدى ەسكەرىپ" ولاردى قازاقستاننان شىعارماۋدى وتىنگەن.
ال قورعاۋ تارابى ەكى ازاماتتىڭ قىتايداعى قىسىمعا بايلانىستى "شەكارادان زاڭسىز وتۋگە" ءماجبۇر بولعانىن، ولاردى قىلمىستىق جاۋاپكەرشىلىكتەن تولىق بوساتۋدى سۇرادى.
بۇگىنگى سوتقا قازاقستاننىڭ ءتۇرلى ايماعىنان قاستەر مەن مۇراگەردى قولداپ، كوپ ادام كەلدى. بىراق سوت زالى شاعىن بولعاندىقتان ولاردىڭ ءبىراز بولىگى زالعا سىيماي قالدى. ولار سوت عيماراتىنىڭ سىرتىندا تۇرىپ ۇلكەنىرەك زال بەرۋدى تالاپ ەتىپ، ىزىنشە "بوستاندىق!" دەپ ايقايلادى.
2019 جىلى قازان ايىنىڭ باسىندا قىتايدىڭ شىڭجاڭ ولكەسىندە تۋىپ وسكەن ەتنيكالىق قازاقتار قاستەر مۇساحانۇلى مەن مۇراگەر الىمۇلىنىڭقازاقستانعا "شەكارانى زاڭسىز كەسىپ وتكەنى" تۋرالى اقپارات تاراعان. 14 قازاندا الماتىداعى ادام قۇقىعىن قورعاۋ بيۋروسىندا وتكەن ءباسپاسوز ءماسليحاتىندا قاستەر مۇساحانۇلى شىڭجاڭداعى "ساياسي لاگەردە قاماۋدا بولعانىن", مۇراگەر ءالىمۇلى قىتايدا "قىسىم كورگەنىن" ايتقان ەدى. قازاننىڭ ورتاسىندا قازاقستان ۇلتتىق قاۋىپسىزدىك كوميتەتى (ۇقك) ول ەكەۋىن "شەكارادان زاڭسىز ءوتتى" دەپ ايىپتاپ، وسكەمەن قالاسىنداعى تەرگەۋ يزولياتورىنا جەتكىزگەن.
قازاقستان بيلىگىنەن بوسقىن مارتەبەسىن سۇراعان قىتايدىڭ ەكى ازاماتىنا قازان ايىنىڭ سوڭىندا "پانا ىزدەۋشى تۇلعا" كۋالىگى بەرىلگەن ەدى.
ولاردىڭ ءىسى بويىنشا سوت 6 قاڭتاردا باستالعان. بۇعان دەيىن ادۆوكات ءلاززات احاتوۆا شىڭجاڭدا قالعان ولاردىڭ تۋىستارىنا دا قىتاي بيلىگى قىسىم جاساعانىن ايتقان.
Abai.kz
