قازاقستان رەسپۋبليكاسىنىڭ
پرەزيدەنتى ق.ك.توقاەۆقا.

اسا قۇرمەتتى قاسىم-جومارت كەمەلۇلى!

20 قاڭتار كۇنى ماجىلىستە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى جانە كوش-قون ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ جوباسى تالقىلاۋعا ارنالعان 19 وتىرىس ءوتتى.

ەستەرىڭىزدە بولسا، «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» قازاقستان رەسپۋبليكاسىنىڭ 2013 جىلعى 21 ماۋسىمداعى № 105-V زاڭىنىڭ 13-بابتىڭ 18) تارماعىنداعى «ەڭبەك قىزمەتى» دەگەن ءسوزدى «ەڭبەك ءوتىلى» دەپ وزگەرتۋ تۋرالى ۇسىنىس بەرگەمىز. 

سەبەبى، اتالعان تارماقشاداعى «ەڭبەك قىزمەتى» دەگەن ۇعىم قازاقستان رەسپۋبليكاسىنىڭ «زەينەتاقىمەن قامسىزداندىرۋ تۋرالى» زاڭىندا دا، «ەڭبەك كودەكسىندە» دە جوق. تەك، «ەڭبەك ءوتىلى» دەگەن ۇعىمعا «ەڭبەك كودەكسىندە» «جۇمىسكەر ەڭبەك مىندەتتەرىن ورىنداۋعا جۇمساعان، كۇنتىزبەمەن ەسەپتەلگەن ۋاقىت، سونداي-اق وسى كودەكسكە سايكەس ەڭبەك وتىلىنە كىرەتىن وزگە دە كەزەڭدەر;» دەپ، زاڭدىق انىقتاما بەرىلگەن. 

ناقتىلاپ ايتساق، ەكەۋى دە قازاقستان رەسپۋبليكاسىنىڭ ازاماتى بولا تۇرا، جەرگىلىكتى زەينەتكەرلەر مەن شەتتەن ورالعان زەينەتكەرلەردىڭ ەڭبەك ەتكەن جىلدارىن ەسەپتۋدە ەكى ءتۇرلى ۇعىم پايدالانىلىپ، ەكەۋىن ەكىگە ءبولىپ قاراعان.

بۇل – ەڭ الدىمەن «تەگىنە، الەۋمەتتىك، لاۋازىمدىق جانە مۇلىكتىك جاعدايىنا، جىنىسىنا، ناسىلىنە، ۇلتىنا، تىلىنە، دىنگە كوزقاراسىنا، نانىمىنا، تۇرعىلىقتى جەرىنە بايلانىستى نەمەسە كەز كەلگەن وزگە جاعداياتتار بويىنشا ەشكىمدى ەشقانداي كەمسىتۋگە بولمايدى.» دەگەن قازاقستان رەسپۋبليكاسىنىڭ كونستيتۋتسياسىنىڭ 14-بابىنىڭ 2-بولىگىنە قايشى.

اتالعان ۇسىنىسىمىزدى دەپۋتات بەيبىت مامىراەۆ ءوز اتىنان جۇمىس توبىنىڭ تالقىسىنا سالعان بولاتىن.

الدىڭعى وتىرىستا زەينەتكەر دەپۋتات قۋانىش سۇلتانوۆتان باستاپ، ءبارى بۇل ۇسىنىستى قولداپ، مينيسترلىك وكىلدەرىنە شۇيلىككەن.

كەشە جۇمىس توبىنىڭ وتىرىسىنا ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك قامسىزداندىرۋ جانە ساقتاندىرۋ دەپارتامەنتىنىڭ باسقارما باسشىسى ۆيكتوريا شەگاي جانە باقىت كاليكەنوۆا دەگەن ەكى قىز كەلىپ، دەپۋتات ب. مامىراەۆتىڭ ۇسىنىسىنا قارسى شىقتى. 

شەگايدىڭ سونداعى ايتقان ءۋاجى: قازاقستان رەسپۋبليكاسىنا قونىس اۋدارىپ كەلگەن قانداستارىمىزدىڭ زەينەتاقى ماسەلەسىن شەشۋ ءۇشىن موڭعوليا جانە قىتايمەن كەلىسىم-شارت جاسالماقشى ەكەن-مىس. قازىر مەملەكەتتەر ارا كەلىسسوز جۇمىستارى ءجۇرىپ جاتىپتى. بىراق، ونىڭ ناقتى قاشان ىسكە اساتىنى تۋرالى كەسىپ ەشتەڭە ايتا المادى.

سول-اق ەكەن، دەپۋتات بەيبىت مامىراەۆ سىلق ەتىپ، ۇسىنىسىن قايتارىپ الدى.

قازاقستان مەن موڭعوليا اراسىندا جاسالعان الەۋمەتتىك قامسىزداندىرۋ سالاسىنداعى ىنتىماقتاستىق تۋرالى كەلىسىمنىڭ كۇشى 2014 جىلعى 8 ساۋىردە جويىلعان بولاتىن.

ونى جويۋعا باستاماشى بولعان كىم دەيسىز عوي؟! 

قازاقستان ۇكىمەتىنىڭ ءوزى!

ال، قازاقستان مەن قىتاي اراسىندا مۇنداي كەلىسىم ءومىرى بولعان ەمەس!

وسى ماسەلەگە بايلانىستى، شەتتەن ورالعان نەشە مىڭداعان زەينەتكەر قانداستارىمىز زارداپ شەكتى. 

2017 جىلى ەلوردادا وتكەن دۇنيەجۇزى قازاقتارىنىڭ V قۇرىلتايى قارساڭىندا، قۇرىلتايدىڭ ۇيىمداستىرۋ كوميتەتىنىڭ مۇشەسى رەتىندە سول كەزدەگى ۆيتسە-پرەمەر اسقار ءمامين ارقىلى پرەزيدەنتكە بەس ۇسىنىس بەرگەم.

ول – تۇڭعىش پرەزيدەنتتىڭ كوشى-قون قورىن قۇرۋ، قىتايدان كەلگەن قازاقتاردا تالاپ ەتىلەتىن «سوتتىلىق تۋرالى» انىقتامانى كۇشىنەن قالدىرۋ، ءبىلىم الۋ ماقساتىندا كەلگەن قازاقستان رەسپۋبليكاسىنىڭ ازاماتتارى بولىپ تابىلمايتىن ۇلتى قازاق ادامدار ءۇشىن كۆوتونى كوبەيتۋ، 11-قاراشانى «ۇلتتىق كوشى-قون كۇنى» مەرەكەسى ەتىپ بەلگىلەۋ جانە قىتاي مەن موڭعوليادان كەلگەن زەينەتكەرلەردىڭ زەينەتاقىسىن جەرگىلىكتى حالىقتىڭ زەينەتاقىسىمەن تەڭەستىرۋ تۋرالى بولاتىن. 

سول قۇرىلتايدا ەلباسى نۇرسۇلتان نازارباەۆ وسى بەس ۇسىنىستىڭ تورتەۋىن شەشۋ تۋرالى ۇكىمەتكە تاپسىرما بەردى. سونىڭ بىرەۋى – وسى زەينەتاقى ماسەلەسى. 

«قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىنىڭ 13-بابىنا 2018 جىلى تولىقتىرۋ ەنگىزىلىپ، 2019 جىلدىڭ 1 قاڭتارىنان باستاپ، ول نورما اتقارىلىپ كەلەدى. 

وكىنىشكە وراي، ەلباسى پارمەنىمەن بەرىلگەن بۇيرىقتى اتقارۋشى بيلىك پەن زاڭ شىعارۋشى ورگان دۇرىس قابىلداماي، زاڭدا «ەڭبەك قىزمەتى» دەپ جىبەرگەن عوي. بۇل جولعى ماقسات – ورايى كەلىپ تۇرعاندا، سونى تۇزەتىپ جىبەرۋ عانا بولاتىن!

سوندا، ۇكىمەت ءوزى بۇزعان مەملەكەت ارالىق كەلىسىمدى ءوزى قايتا جاساۋى مۇمكىن بە؟!

ەكىنشىدەن، كەزىندە ءمۇيىزى قاراعايداي مينيسترلەر بەردىبەك ساپارباەۆ پەن تامارا دۇيسەنوۆا جاساي الماعان كەلىسىم-شارتتى بۇگىن دەپارتامەنتىنىڭ باسقارما باسشىسى ۆيكتوريا شەگاي قايتىپ جاساي قويماق؟!

ءسويتىپ، باسقارما باسشىسى شەگاي قىز جاسالماعان «كەلىسىم-شارپەن» بىلدەي دەپۋتات ب. مامىراەۆتى شەكەدەن شەرتىپ، شالقاسىنان ءتۇسىردى دە باسىنان اتتاپ ءوتىپ، كەتە باردى. ەڭ كەرەكتى باپ جاردان قۇلاپ، قالا بەردى!..

حالدىق مۇنداي وپاسىزدىقتى ەشقاشان كەشىرمەيدى!!!

دۇنيەنىڭ قورلىعى سول، دەپۋتات بەيبىت بايماعامبەتۇلى شايناپ بەرگەن ناندى جۇتا الماي، ماسقارا بولدى عوي!

مىنە، حالىق سەنىم ارتقان دەپۋتاتتىڭ سيقى!

مەن دەپۋتات بەيبىت مامىراەۆتىڭ بۇل ارەكەتىن مەملەكەتكە دەگەن جاۋاپكەرشىلىگىنىڭ جوقتىعى، ۇلتقا جاساعان قيانات جانە سابەتتەن قالعان ساسىق بيۋروكراتيزمنىڭ باتپاعىنان شىعا الماعاندىقتىڭ بەلگىسى دەپ، باعالايمىن!

پارلامەنت – مامىراەۆ اڭىرايىپ قاراپ وتىراتىن ساياجاي ەمەس، ەڭ جوعارعى زاڭ شىعارۋشى ورگان! دەپۋتاتتىڭ باستى مىندەتى – ساپالى زاڭ قابىلداۋ!! ءسويتىپ، قۇقىقتىق مەملەكەت قۇرۋعا داڭعىل جول اشۋ!

بەيبىت مامىراەۆتىڭ ءومىربايانىن شولىپ شىقتىم، عىلىم دوكتورى، پروفەسسور، اكادەميك دەپ جازىلىپتى. قر پرەزيدەنتى اكىمشىلىگىنىڭ ىشكى ساياسات باسقارماسىندا، ەلشىلىكتە جاۋاپتى قىزمەتتەر اتقارىپتى. جوعارى وۋ ورىندارىن دا باسقارىپتى. 

ارينە، ول كىسى بىلىكتى عالىم، ىسكەر باسشى بولسا، بولعان شىعار. بىراق تولىمدى دەپۋتات ەمەس ەكەن!

اسا قۇرمەتتى قاسىم-جومارت كەمەلۇلى!

مەن قر پرەزيدەنتى جانىنداعى ۇلتتىق قوعامدىق سەنىم كەڭەسىنىڭ مۇشەسى رەتىندە سىزدەن «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭىنداعى قاتەلىكتى تۇزەتىپ، قانداستارىمىزدىڭ زەينەتاقى ماسەلەسىن شەشۋگە ىقپال ەتۋىڭىزدى جانە اتالعان زاڭداعى قازاقستان رەسپۋبليكاسىنىڭ كونستيتۋتسياسىنا قايشى كەلىپ تۇرعان قاتەلىكتى كورىپ تۇرىپ، تۇزەتۋگە ارەكەت ەتە الماعان بەيبىت مامىراەۆتىڭ دەپۋتاتتىق وكىلەتتىگىن مەرزىمىنەن بۇرىن توقتاتۋىڭىزدى سۇرايمىن.

قۇرمەتپەن،

اۋىت مۇقيبەك،

قر پرەزيدەنتى جانىنداعى
ۇلتتىق قوعامدىق سەنىم كەڭەسىنىڭ مۇشەسى.

Abai.kz