قازاقستان پرەزيدەنتى قاسىم-جومارت توقاەۆ بىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى.

اقوردا رەزيدەنتسياسىندا بىرقاتار مەملەكەتتىڭ جاڭادان تاعايىندالعان توتەنشە جانە وكىلەتتى ەلشىلەرىنىڭ قازاقستان پرەزيدەنتىنە سەنىم گراموتالارىن سالتاناتتى تۇردە تاپسىرۋ ءراسىمى ءوتتى.

مەملەكەت باسشىسىنا تۇركيا رەسپۋبليكاسىنىڭ ەلشىسى ۋفۋك ەكيدجي، بولگاريا رەسپۋبليكاسىنىڭ ەلشىسى بويان حادجيەۆ، ساۋد ارابياسى كورولدىگىنىڭ ەلشىسى ابدۋلازيز ابدۋللا ءال-داۋد سەنىم گراموتالارىن تابىس ەتتى.

مەملەكەت باسشىسى شەتەلدىك ەلشىلەردى قازاقستانداعى ديپلوماتيالىق جۇمىستارىنىڭ رەسمي باستالۋىمەن قۇتتىقتاپ، ولاردىڭ ىزگى ميسسيالارىنا تابىس تىلەدى.

سالتاناتتى شارا بارىسىندا پرەزيدەنت ءاربىر ەلشىمەن جەكە-جەكە سويلەستى.

قاسىم-جومارت توقاەۆ ۋفۋك ەكيدجيمەن اڭگىمەلەسۋ بارىسىندا قازاقستان مەن تۇركيا اراسىنداعى قارىم-قاتىناستاردىڭ ستراتەگيالىق سيپاتىن اتاپ ءوتىپ، ەكىجاقتى سەرىكتەستىكتىڭ ودان ءارى نىعايا تۇسەتىنىنە سەنىم ءبىلدىردى. پرەزيدەنت تۇركيا باسشىلىعىنىڭ ەلباسى نۇرسۇلتان نازارباەۆقا تۇركى كەڭەسىنىڭ قۇرمەتتى توراعاسى مارتەبەسىن بەرۋ جونىندەگى باستاماسىنا، سونداي-اق، باۋىرلاس ەلدىڭ «استانا پروتسەسىنە» بەلسەندى قاتىسقانى ءۇشىن ريزاشىلىق ءبىلدىردى.

– وسى ءساتتى پايدالانا وتىرىپ، ارىپتەسىم پرەزيدەنت ەردوعانعا جۇرەكجاردى سالەمىمدى جولدايمىن. ءبىز ونىڭ بيىلعى ءساۋىر ايىندا قازاقستانعا جاسايتىن رەسمي ساپارىن اسىعا كۇتەمىز، – دەدى قاسىم-جومارت توقاەۆ.

قازاقستان پرەزيدەنتى بويان حادجيەۆتەن سەنىم گراموتاسىن قابىلداۋ كەزىندە بولگاريامەن اراداعى ىقپالداستىقتىڭ دوستىق سيپاتىن اتاپ ءوتتى. مەملەكەت باسشىسى نيۋ-يوركتە وتكەن بۇۇ باس اسسامبلەياسى 74-سەسسياسىنىڭ الاڭىندا پرەزيدەنت رۋمەن رادەۆپەن جانە بولگاريانىڭ ۆيتسە-پرەزيدەنتى يليانا يوتوۆامەن نۇر-سۇلتان قالاسىندا كەزدەسكەنىن ايتتى.

– وسى كوكتەمدە بولگاريا پرەزيدەنتىنىڭ قازاقستانعا ساپارىن اسىعا كۇتەمىز. ونىڭ ساپارى تابىستى بولاتىنىنا جانە ەكى ەل اراسىنداعى ىنتىماقتاستىقتىڭ دامۋىنا تىڭ سەرپىن بەرەتىنىنە سەنىمدىمىن، – دەدى مەملەكەت باسشىسى.

قاسىم-جومارت توقاەۆ ابدۋلازيز ابدۋللا ءال-داۋدپەن اڭگىمەلەسۋ كەزىندە ەكىجاقتى قاتىناستاردىڭ قازىرگى دەڭگەيى مەن ءمان-ماڭىزىن جوعارى باعالاپ، ينۆەستيتسيالىق بايلانىستاردىڭ نىعايىپ كەلە جاتقانىن، مۇناي-گاز، حيميا، اتوم جانە جاڭارتىلعان ەنەرگيا كوزدەرىن پايدالانۋ سالالارىنداعى ىنتىماقتاستىقتىڭ الەۋەتى زور ەكەنىن ەرەكشە اتاپ ءوتتى.

– ءبىز ساۋد ارابياسىنىڭ تاق مۇراگەرى مۇحاممەد بەن سالماندى قازاقستانعا ساپار جاسايدى دەپ كۇتەمىز. ەگەر ول ساپارمەن بيىل كەلسە، وتە جاقسى بولار ەدى، – دەدى قازاقستان پرەزيدەنتى.

Abai.kz