جەكسەنبى, 22 قاراشا 2026
جاڭالىقتار 287 0 پىكىر 22 قاراشا, 2026 ساعات 15:57

الەۋمەتتىك جەلى قولدانۋشىلارى توقاەۆتىڭ سىبايلاس جەمقورلىققا قارسى كۇرەس باعىتىن قولدادى

سۋرەت: جي ارقىلى جاسالعان.

زاڭ ۇستەمدىگى – ادىلەتتى قوعامنىڭ نەگىزى

سىبايلاس جەمقورلىقپەن كۇرەس ەڭ الدىمەن زاڭ الدىنداعى تەڭدىكتەن باستالۋى كەرەك. قانداي لاۋازىم يەسى بولسا دا، بۇرىنعى ەڭبەگى مەن قوعامداعى بەدەلى زاڭ بۇزعان جاعدايدا جاۋاپكەرشىلىكتەن بوساتۋعا نەگىز بولماۋعا ءتيىس. ويتكەنى زاڭ بارشاعا ورتاق.

مەملەكەت باسشىسىنىڭ «زاڭ مەن ءتارتىپ» قاعيداتىنا ەرەكشە ءمان بەرۋى وتە ورىندى. قاراپايىم ازامات رەتىندە ايتارىم، ءادىل قوعامدا ادامنىڭ كىم ەكەنىنە ەمەس، قانداي ارەكەت جاساعانىنا باعا بەرىلۋى كەرەك. زاڭ بۇزعان ادام لاۋازىمىنا قاراماستان، ءوز ىسىنە جاۋاپ بەرۋى ءتيىس. سوندا عانا حالىقتىڭ ادىلدىككە دەگەن سەنىمى ارتادى.

سىبايلاس جەمقورلىقتىڭ زاردابىن ەڭ الدىمەن قاراپايىم حالىق تارتادى. مەملەكەت قارجىسى ماقساتسىز جۇمسالسا، قۇرىلىس ساپاسىز جۇرگىزىلسە، ونىڭ سالدارى تۇرعىنداردىڭ ومىرىنەن كورىنەدى. سوندىقتان اسىرەسە «حالىقتىق قۇرىلىس» باعدارلاماسىن جۇزەگە اسىرۋ كەزىندە اشىقتىق پەن ادالدىق باستى ورىندا بولۋى قاجەت. بولىنگەن قاراجاتتىڭ ءار تيىنى ءوز ماقساتىنا جۇمسالىپ، اتقارىلعان جۇمىس ساپالى بولۋى ءتيىس.

سونىمەن قاتار، زاڭ مەن ءتارتىپ تەك جازالاۋمەن شەكتەلمەيدى. ول ءار ادامنىڭ ىشكى مادەنيەتى مەن جاۋاپكەرشىلىگىنەن باستالادى. «تازا قازاقستان» تۇجىرىمداماسىنىڭ ءمانى دە وسىندا. تازالىق تەك قورشاعان ورتاعا ەمەس، ادامنىڭ ويىنا، ءسوزى مەن ىسىنە دە قاتىستى بولۋى كەرەك.

مەنىڭ پايىمداۋىمشا، «زاڭ مەن ءتارتىپ» ءار ازاماتتىڭ كۇندەلىكتى ومىرلىك ۇستانىمىنا اينالعاندا عانا قوعامدا ناقتى وزگەرىس بولادى. مەملەكەتتىك قىزمەت تە ەڭ الدىمەن حالىققا ادال قىزمەت ەتۋدى بىلدىرەدى. جوعارى لاۋازىم ۇلكەن جاۋاپكەرشىلىك جۇكتەيدى، ال حالىقتىڭ سەنىمى قۇر سوزبەن ەمەس، ناقتى ىسپەن اقتالۋى ءتيىس.

زاڭ الدىندا ءبارى تەڭ بولعاندا عانا ادىلدىك ورنايدى. ەشكىم زاڭنان جوعارى تۇرماۋى كەرەك. بۇل – ادىلەتتى قوعام قالىپتاستىرۋدىڭ باستى شارتى.

الماسبەك مامىتبەكوۆ

Abai.kz

0 پىكىر