كەشە، 27 اقپاندا نۇر-سۇلتان قالاسىنداعى قر ۇلتتىق اكادەميالىق كىتاپحاناسىندا «وتانداستار» وقۋ زالى اشىلدى. رۋحاني وردانىڭ اشىلۋى «وتانداستار قورى» مەن دۇنيەجۇزى قازاقتارى قاۋىمداستىعى جانە قر ۇلتتىق اكادەميالىق كىتاپحاناسىنىڭ باستاماسىمەن جۇزەگە استى. 

شارا باستالماس بۇرىن كىتاپحاناعا كەلگەن وقىرماندار مەن قوناقتارعا سۋرەت كورمەسى ۇيىمداستىرىلدى. الەم سۇلۋلىعىن قىلقالاممەن بەينەلەگەن اتاجۇرتقا قىتاي ەلىنەن كەلگەن قانداس باۋىرلارىمىز تولقىن تابىسبەك، زەردە باقىتبەك، قايرات جايىربەكۇلى، جالىن باۋىرقان شىعارماشىلىعىن كورەرمەن قاۋىم جوعارى باعالادى.

«وتانداستار» وقۋ زالىنىڭ اشىلۋ سالتاناتىنا پروفەسسور، جازۋشى، عالىم مىرزاتاي جولداسبەكوۆ، «وتانداستار قورىنىڭ» ۆيتسە-پرەزيدەنتى ماعاۋيا سارباسوۆ، بەلگىلى قالامگەر سۇلتان ورازالين، تۇركىتانۋشى عالىم قارجاۋباي سارتقوجاۇلى جانە جۋرناليستتەر مەن زيالى قاۋىم وكىلدەرى قاتىستى.

باس قالامىزدا «وتانداستار» وقۋ زالىنىڭ اشىلۋى قازاق رۋحانياتىنا سۇبەلى قازىنا بولىپ قوسىلعان شوقتىعى بيىك شارا بولدى. التاي مەن اتىراۋ اراسىنداعى قالامى قارىمدى، ويى جۇيىرىك قازاق قالامگەرلەرىنىڭ كىتاپ قورىنا تاعى ءبىر سارقىلماس قازىنا قوسىلدى. قازاق مادەنيەتى مەن وركەنيەتىنىڭ دامۋىنا قۋانعان وقىرمان قاۋىمنىڭ قۋانىشىندا شەك بولمادى. ارقانىڭ قارا تاستى قاڭباقتاي جەردەن ۇشىرار بورانىنا قاراماي، ەڭكەيگەن كارىدەن ءجاسوسپىرىم بالالارىنا دەيىن رۋحاني جيىنعا تەگىس جيىلدى.

الەم قازاقتارىنىڭ شىعارمالارى جيىلعان وقۋ زالىندا «قازاق الەمى» - «مير كازاحوۆ» كىتابىنىڭ ەلەكتروندىق نۇسقاسىنىڭ تۇساۋكەسەرى ءوتتى. ۇلتتىق اكادەميالىق كىتاپحانا اياسىندا، «وتانداستار» تسيفرلى كىتاپحاناسى قۇرىلعانى جونىندەگى اقپارات وقىرمان قاۋىم كوڭىلىنە جانە ءبىر مارتە قۋانىش سىيلادى. قازىرشە كىتاپ قورى 2000 كىتاپتان اسقان «وتانداستار» وقۋ زالىنا ءالى دە توم-توم كىتاپتار سىيعا تارتىلاتىنىنا سەنىم مول.

«وتانداستار قورى» مەن دۇنيەجۇزى قازاقتارى قاۋىمداستىعىنىڭ «وتانداستار» وقۋ زالىن اشۋ باستاماسىن قولداعان ۇلتتىق اكادەميالىق كىتاپحانا ۇجىمىنا مىڭ العىس.

جۇرەگى دالاسىنداي دارقان قازاق حالقىنىڭ ءار تاڭى ارايلى، ءار كۇنى شۋاقتى بولسىن!

مۇحتار سەرجان

Abai.kz