بۇگىن مەملەكەت باسشىسى قاسىم-جومارت توقاەۆ حالىقارالىق «قازاق ءتىلى» قوعامىنىڭ ح قۇرىلتايىندا ءسوز سويلەدى.

پرەزيدەنت ءوز سوزىندە انا ءتىلى ماسەلەسى – مەملەكەتتىك، ساياسي جانە ۇلتتىق ماڭىزى بار تاقىرىپ ەكەنىن باسا ايتتى.

«بۇگىنگى جيىننىڭ ءمان-ماعىناسى ەرەكشە. سەبەبى انا ءتىلى ماسەلەسى، بۇل – مەملەكەتتىك، ساياسي جانە ۇلتتىق ماڭىزى بار تاقىرىپ. قازىرگى تاڭدا دۇنيە جۇزىندە ءتىل وزەكتى، نازىك ماسەلەگە اينالىپ كەتتى. بۇل ۇردىسكە ءبارىمىز كۋا بولىپ وتىرمىز.

ەڭ الدىمەن، وسى جەردە ءسوز سويلەپ، مازمۇندى ويلارىن ورتاعا سالعان ازاماتتارعا العىسىمدى بىلدىرەمىن. سالماقتى پىكىرلەر، ۇتىمدى ۇسىنىستار ايتىلدى. سونىڭ ءبارىن مۇقيات قاراپ، الداعى جۇمىسىمىزدا مىندەتتى تۇردە ەسكەرۋ قاجەت»، - دەدى پرەزيدەنت.

ونان سوڭ قاسىم-جومارت توقاەۆ «قازاق ءتىلى» قوعامى – مەملەكەتتىك ءتىلدىڭ مىزعىماس تۇعىرىن نىعايتىپ جۇرگەن اسا ماڭىزدى قۇرىلىم ەكەنىن ايتتى.

«سوناۋ 1989 جىلى ىرگەسى قالانعان ۇيىمنىڭ ەگەمەن ەل تاريحىنداعى ورنى بولەك. كەزىندە كورنەكتى عالىمدار – اكادەميكتەر ءابدۋالي قايدار جانە ومىرزاق ايتبايۇلىنىڭ باستاماسىمەن قۇرىلعان «قازاق ءتىلى» قوعامىنىڭ تاريحي جولىن قازىرگى بۋىن وكىلدەرى مەن بەلگىلى ءتىل ماماندارى لايىقتى جالعاستىرىپ كەلە جاتىر.

بۇگىندە ۇيىم مۇشەلەرى كوپتەگەن ءتيىمدى ءىس-شارالاردى، جاسامپاز جوبالاردى تابىستى جۇزەگە اسىرۋدا. مەن مەملەكەت باسشىسى رەتىندە «قازاق ءتىلى» قوعامىنىڭ ءار مۇشەسىنە شىنايى ريزاشىلىعىمدى بىلدىرەمىن. زاڭعار جازۋشى ءابىش كەكىلباەۆتىڭ «ءتىل مەرەيى – ەل مەرەيى» دەگەن قىسقا-نۇسقا، ماعىناسى تەرەڭ ءسوزى بار.

ءتىل – بارشامىزعا ورتاق قۇندىلىق. ءتىل – اللانىڭ قۇدىرەتىنىڭ ارقاسىندا ادامدارعا بەرىلگەن ۇلكەن سىي ءارى مۇمكىندىك. ءتىل – ادامزاتتىڭ نەگىزگى جەتىستىگى. ادام بالاسىنىڭ ويداعىداي دامۋىنىڭ ەڭ باستى سەبەبى دە – ءتىل. ءبىز وركەنيەتتى ەل رەتىندە انا ءتىلىمىز – قازاق ءتىلىنىڭ ابىروي-بەدەلىن ارتتىرۋ ءۇشىن ءبىر ەل بولىپ تاباندى جۇمىس ىستەۋىمىز كەرەك. بۇگىنگى جيىننىڭ باستى ماقسات-مىندەتى دە – وسى»، - دەدى پرەزيدەنت.

ونان سوڭ، مەملەكەت باسشىسى ءتول ءتىلىمىز ۇلتتى ۇيىستىراتىن، وركەنيەتىمىزدىڭ ءورىسىن كەڭەيتەتىن «جۇمساق كۇشكە» اينالىپ كەلە جاتقانىن باسا ايتتى.

«مىسالى، الەمگە ايگىلى تاريحي تۇلعا بەيبارىس سۇلتاننىڭ، ۇلى ويشىل ابايدىڭ، اسا كورنەكتى عالىم قانىش ساتباەۆتىڭ ۇلت وركەنيەتىندەگى ورنى مەن ەڭبەگى بىرەگەي. ال، بۇگىندە جاھان جۇرتىنىڭ سۇيىكتى انشىسىنە اينالعان ديماش قۇدايبەرگەن، ايگىلى كانن فەستيۆالىندە ۇزدىك اكتريسا دەپ تانىلعان سامال ەسلياموۆا، بەلگىلى شاحماتشى، الەمنىڭ بىرنەشە دۇركىن چەمپيونى ءبيبىسارا اساۋباەۆا، بۇكىل جاپون حالقىنا، سونىڭ ىشىندە يمپەراتورعا دا وتە تانىمال، كاسىبي سۋمودا جۇرگەن جالعىز قازاق بالۋانى، جەڭىمپاز ەرسىن بالتاعۇل (كيمبوزان حارۋكي) جانە Higgsfield AI جاھاندىق ستارتاپ جەتەكشىسى ەرزات دۋلاتوۆ سياقتى ناعىز دارىن يەلەرى قازاقتىڭ مادەنيەتىن، رۋحانياتىن، زياتكەرلىك قۋاتىن جان-جاقتى دارىپتەپ ءجۇر.

حالقىمىز «ەلدەستىرمەك – ەلشىدەن» دەپ بەكەر ايتپاعان. بۇل ازاماتتاردى ەلىمىزدىڭ ناعىز وتانشىل پەرزەنتتەرى ءارى رۋحاني ەلشىلەرى دەسەك، ارتىق بولماس. قازىر قازاقستان كوپتەگەن شەتەل ادامدارى قۇرمەتپەن قارايتىن، ىقپالدى مەملەكەتكە اينالدى. سوندىقتان ءبىز قازاق ءتىلىنىڭ بولاشاعىنا قاتىستى تەرىس كوزقاراستان اۋلاق بولۋىمىز كەرەك. ءتىلىمىزدىڭ تاعدىرى كۇماندى، بەلگىسىز دەپ زارلاي بەرسەك، وزگە ەلدەر مەن حالىقتار بىزگە قالاي قارايدى، قالاي سەنەدى؟!

ۇنەمى تۇڭىلە بەرۋ وڭ ناتيجە اكەلمەيدى، مۇنداي اڭگىمەنى دوعاراتىن كەز كەلگەنىنە كوزىمىز ابدەن جەتتى»، - دەدى پرەزيدەنت.

Abai.kz