2018 جىلدىڭ سوڭىندا ۇلكەن امبيتسيالارى بار كىشكەنتاي حولدينگ قازاقستانداعى ءبىلىم سالاسىن جاڭا دەڭگەيگە شىعارامىز دەگەن بيىك ماقساتپەن Daryn.online اتتى ءبىلىم بەرۋ جوباسىن باستادىق. جوبانىڭ يدەياسىن كومپانيا باسشىسى ايبەك قۋاتباي جاساقتادى. قالعانىمىز كونتسەپتسيانى دامىتۋعا اتسالىستىق.

جوبا ماقساتى - ۋاقىت پەن قاشىقتىققا تاۋەلسىز ۇزدىك ءبىلىم پلاتفورماسىن كوپشىلىككە ۇسىنۋ بولدى. 2019 جىلدىڭ كوكتەمىنەن باستاپ، قازاقستانداعى ءوز سالاسى بويىنشا ەڭبەگى كورىنگەن مىقتى ۇستازداردى جيناپ، ۆيدەوساباقتار ءتۇسىرۋدى باستادىق. كونتسەپت قيىن بىراق، قاراپايىم ەدى. كەز-كەلگەن ءپاننىڭ ىشىندەگى تاقىرىپتى وقۋشىعا 5-7 مينۋت ارالىعىندا ماكسيمۋم جەتىك ءتۇسىندىرۋ مىندەتى تۇر ەدى. ول ويدى ايبەك ايتقاندا بىزدە ازداپ كۇمان بولعانىن جاسىرمايمىن. بىراق، بىرنەشە اي تەستيڭ جاساپ، جوبا قۇرامىنداعى كوماندا مۇشەلەرى بولىپ دايىن بولعان ساباقتاردى پلاتفورمادا اۋەلى ءوزىمىز وقىپ شىققان سوڭ عانا كوڭىلىمىز ورنىنا ءتۇستى.

جالپى جوبانى اياققا تۇرعىزۋ وڭاي بولعان جوق. بىرنەشە رەت كوماندا ءھام مۇعالىمدەر دە اۋىستى. تالاي ۆيدەولاردى سول بويى پلاتفورماعا شىعارعان جوقپىز. قانشاما تاپسىرمالار مەن تەستىلەردى قولدان ەنگىزىپ، سونشا قاتەلىكتەردى ءتۇن دەمەي جوندەۋمەن بولدى رەداكتورلارىمىز.

كۇزدىڭ باسىندا جوبانى كوپشىلىككە ۇسىناتىن كەزدە، جەتەرلىك قارجى مۇلدەم بولعان جوق. ايماقتاردى بىرنەشە رەت ارالاعان ەلشىلەرىمىز وبلىستار مەن قالالاردان سەنىم ءبىلدىرىپ، قازاقستاندا بولاشاعى بۇلىڭعىر كورىنگەن جوباعا ينۆەستيتسيا جاساپ، جۇمىس اتقارۋعا كەلىسكەن سەرىكتەستەردى تاپتىق، ايتەۋىر. وسىندا ءبىرتالاي رەت سەرىكتەس ىزدەپ جازىلعان پوستتارىم ەستەرىڭىزدە بولار.

ءسويتىپ، Daryn.online جوباسى باستالدى. 2019 جىل سوڭىنا دەيىن اۋقىم كەڭەيدى. جوبا بارىسىندا جاڭا ستراتەگيالىق شەشىمدەر قابىلدانىپ، 2020 جىلدى باسەڭدەپ باستاعانىمىزبەن، ناۋرىز ايىنا دەيىن Daryn.online جوباسىندا اقىلى تارتىپتە رەسپۋبليكامىزدىڭ بارشا ايماقتارىنان 15 مىڭعا جۋىق وقۋشى ءبىلىم الىپ جاتتى. ءونىمدى الەۋمەتكە ۇسىنۋ بارىسىندا باستان وتكەن قيىندىقتار مەن كەدەرگىلەردى ايتىپ، پوستىمدى باتىستىق success storyگە اينالدىرۋعا تىرىسپاي-اق قويايىن. سەبەبى، ءبىز ءوزىمىزدىڭ باستاپقى العا قويعان ميسسيامىزدىڭ قيىر بۇرىشىن دا قامتىعان جوقپىز.

ناۋرىزدىڭ باسىنداعى جاڭالىقتار ەشكىمگە وڭاي تيگەن جوق. كوڭىل ايتىپ وتىرايىن دەسەم، ءوزىمنىڭ دە كوڭىل كۇيىم جوق. سوندىقتان، ناقتى ماسەلەلەرگە وتسەم دەيمىن. قازاقستاندا بىزدەن باسقا دا مەملەكەتتىك ءھام جەكەمەنشىك ونداعان ءبىلىم بەرۋ پلاتفورمالارى بار. كوپشىلىگى كورشىلەس رەسەيدەن زاتىن سول كۇيى الىپ، اتىن وزگەرتە سالعان جوبالار. ونى ايىپ تا كورمەيمىز ءھام ولاردىڭ ەڭبەكتەرىنە كيىز استىنان مىسىقپەيىلدە قاراپ جاتقان ءبىز جوق. كەرىسىنشە، ساپالى ءبىلىم بەرەمىز دەپ كەلە جاتقان نيەتتەرىنە العىستان باسقا ايتارىمىز جوق. ال، Daryn.Online - قازاقستاندىق جوبا. ەگەر، بەرگەنىمىز ساپاسىز بولسا، وندا جاۋابىمىز دا وسى ەلدىڭ ازاماتتارىنىڭ الدىندا بولماق.

كەشەگى ءتاجۆيرۋستان ساقتانۋ شارالارىمەن قالالار كارانتينگە كەتەردەن بۇرىن ەلدىڭ اتقامىنەرلەرى وسى كەزەڭدەگى ەلدەگى جاپپاي ءبىلىم بەرۋ ءىسىنىڭ ونلاينعا كوشۋ مۇمكىندىگىن ايتقانىن ءبارىمىز ەستىدىك. بىراق، قالاي؟ قالاي كوشىرمەك؟ ويتكەنى، قازاقستاندا 90% قازاق تىلىندە ءبىلىم الاتىن وقۋشىلار ءۇشىن ونلاين ءبىلىم بەرەتىن كەڭ شەشىمدەردى قاراستىرعان پلاتفورمالار جوق ەدى. ءبىزدىڭ ءوزىمىزدىڭ ولاردىڭ بارلىعىن قامتي الاتىن الەۋەتىمىز بەن رەسۋرسىمىز بولعان جوق. بىراق، بار شەشىمدەردىڭ ىشىندەگى سالىستىرمالى تۇردە ەڭ قولايى ءارى جەتىگى Daryn.online ەدى. سوندىقتان دا، ءبىزدىڭ كوماندا الەۋمەت الدىنداعى جاۋاپكەرشىلىگىمىز بەن مىندەتتەرىمىزدى سەزىنە وتىرىپ، جوبانى كارانتين كەزەڭىندە تولىق اقىسىز رەجيمدە كوپشىلىكتىڭ يگىلىنە بەرۋدى ءجون سانادىق. بۇل ۇسىنىسپەن ءبىز ەڭ العاش بولىپ، ءبىلىم مينيسترلىگىنە ينتەرنەت رەسۋرستار ارقىلى ۇندەۋ جاسادىق. مينيستر اسحات ايماعامبەتوۆ مىرزا جوبانى كورىپ، مينيسترلىك ماماندارى تەكسەرىپ، مەملەكەتتىك ستاندارتقا ساي ەكەندىگىنە كوزدەرى جەتكەن سوڭ، سەنىم ءبىلدىرىپ مەكتەپتەرگە ونلاين ءبىلىم الۋعا بولاتىن پلاتفورمالاردىڭ ءبىرى رەتىندە ۇسىندى.

سول ارالىقتان بەرى بىزگە بۇرىن-سوڭدى بولماعان ءبىرتالاي ايىپتاۋلار كەلە باستادى. ارينە، جوبا يگىلىگىن كورىپ جاتقان ازاماتتارىمىز شاش ەتەكتەن. دەگەنمەن، ارالارىڭىزداعى كەيبىر كۇمان تەربەگەن ساۋالدارعا وسى تۇستا جاۋاپ بەرىپ، بۇل تاقىرىپتاردى جاپسام دەپ وتىرمىن. ويتكەنى، قازىر بىزدە بۇلاردى تالقىلاۋعا ۋاقىت تا جوق. سونىمەن...

«بۇل جوبانىڭ ارتىندا بىرەۋلەر تۇر؟ تابامىز!»

جوق. ايقىن نارسەنى ىزدەپ قايتەسىز؟ "قايسسىڭ؟" دەسەڭىزدەر وزدەرى-اق كورىنەدى. Daryn.online جوباسىنىڭ ارتىندا بىرەۋ ەمەس، ەل بولاشاعىنا الاڭدايتىن بىرنەشە قاراپايىم ازاماتتار مەن ءوز ۇلەستەرىن قوسىپ جاتقان ونداعان بىلىكتى ۇستازدار تۇر. جوبا اياققا تۇرعان كەزدە بىرنەشە كۆازيمەملەكەتتىك ۇيىمدار مەن جەكە كومپانيالاردان تولىق ساتىپ الۋ ۇسىنىسى بولدى. بىراق، ولاردىڭ ەشقايسىمەن كەلىسىم جاساعان جوقپىز. قازاقستان نارىعىندا ەشكىمنىڭ كومەگى مەن قامقورلىعىنسىز وسىنداي جوبا جاساي العانىمىز ءۇشىن ماقتانامىز. ءبىلىم سالاسىن ءارى قاراي دامىتۋ ءۇشىن قولىمىزدان كەلگەندى جاساي بەرەمىز.

«مەملەكەتتەن اقشانى سورىپ جاتقان شىعارسىڭدار!؟»

جوق. ءبىز وسى كۇنگە دەيىن جوبامىز ءۇشىن مەملەكەتتەن ءبىر تيىن دا اقشا العانىمىز جوق. بۇدان كەيىن دە الامىز دەپ ويلامايمىن. 2 اپتادان بەرى Daryn.online جوباسىنا 10 ميلليونداي شىعىن جاسادىق. تەحنيكالىق مۇمكىندىگى ءبىر مەزەتتە 10 مىڭ وقۋشىعا ارنالىپ ءجۇرىپ جاتقان پلاتفورماعا بىرنەشە اپتادا ميلليونننان استام وقۋشى تىركەلگەن كەزدە، جاعداي قالاي بولعانىن ويلاي بەرسەڭىزدەر بولادى. سەرۆەرلەرىمىزدىڭ تەحنيكالىق مۇمكىندىگىن كەڭەيتۋ مەن كونتەنت تولىقتىرۋعا بارلىق قاراجات كومپانيامىزدىڭ قورىنان كەتتى. باسقاسىن ايتا بەرسەك، اسىلىق بولار. سوندىقتان، مەملەكەتتەن اقشا الىپ وتىرسىڭدار دەگەن كوڭىلگە تيەتىن ارتىق ءسوز. ەلگە كومەگىمىز ءتيىپ جاتقانىنا توقپىز. ال، كوماندامىز ءۇشىن جاقسى تاجىريبە عانا.

«كوروناۆيرۋس جاقسى بولدى عوي سەندەرگە؟!»     

جوق. كورىپ وتىرعانىڭىزداي، بۇل كەسەل ەشكىمگە جاقسى بولىپ جاتقان جوق. وسىلاي جالعاسا بەرەتىن بولسا، جاقسى بولمايتىنى دا انىق. ەگەر، جوبا باسشىسى ايبەك مەنەن كاسىبي كەڭەس سۇرايتىن بولسا، بالكىم جوبانى اقىسىز ەتۋ يدەياسىن قولداماعان بولار ەدىم. بۇل جەردە ماسەلە باسقادا. بۇل جاعداي ءبىزدىڭ جوباعا پايداسىنان كورە كەرى ەففەكتى كوبىرەك بولاتىنىن شىرامىتىپ وتىرمىن. ەرتەڭ كارانتين اياقتالعاندا قانشاما اتا-انالار مەن ۇستازدار جوبانىڭ قايتادان اقىلى فورماتقا اۋىسقانىنا رەنجىگەن كۇيى كوپ نەگاتيۆ پىكىرلەر ايتاتىن بولادى. قازىر وقىپ جاتقان وقۋشىلاردىڭ بارلىعى بىزدە قالادى دەپ ويلاماي-اق قويىڭىز. ولاردىڭ كوووپشىلىگى دەرلىك ءبىرىنشى مۇمكىندىكتە-اق اككاۋنتتارىن ماڭگىگە ۇمىتىپ كەتەدى دەپ ويلايمىن. ال، ساپالى بىلىمگە ىنتالى وقۋشىلار كوروناۆيرۋسقا دەيىن دە ءبىزدىڭ جوبادا بار ەدى.

«جاندارىڭ اشىسا نە ءۇشىن تىركەلۋ قويعانسىڭدار؟» 

وكىنىشكە وراي، ءبىزدىڭ ءبىلىم پلاتفورمامىزدا "قۇدايى قوناق" دەگەن ستاتۋس جوق. ءھام جوبا كومانداسىندا Unknown وقۋشىنى جازباي تانىپ، ناتيجەسىن ءبىلىپ وتچەت بەرىپ وتىراتىن كورىپكەل-پالشى ماماندار دا جوق. بۇل تەحنولوگيا. ۇستازدار ءوز وقۋشىلارىن باعالاۋى ءۇشىن جەكە اككاۋنت قاجەت. ول ءار وقۋشىنىڭ ءبىلىم الۋ پروتسەسىندە قاي تاقىرىپقا كەلىپ، تەستتەردەن قانداي ناتيجەمەن وتكەندەرىن كورىپ، قاداعالاپ وتىرۋعا كومەك بەرەتىن بىردەن ءبىر قۇرال. بالالارىڭىزدىڭ اتى-ءجونى ياكي كۋالىك سياقتى قۇجاتتارى بولماسا، مەكتەپكە قابىلدانبايتىنى سياقتى، جەكە اككاۋنتىڭىز بولماسا جوبانىڭ بارلىق مۇمكىندىكتەرىن قولدانا المايسىز. ول سىزدەردىڭ قاۋىپسىزدىكتەرىڭىز بەن يگىلىكتەرىڭىز ءۇشىن قاجەت نارسە. ەگەر، كەي مۇعالىمدەرىمىزدىڭ ءوزى تىركەلۋدىڭ نە ءۇشىن كەرەگىن بىلمەي ايىپتاپ جاتسا، وندا مەكتەپ مۇعالىمىن اۋىستىرۋى كەرەك ياكي وقۋشى مەكتەپ اۋىستىرۋى كەرەك. ەڭ دۇرىسى سول مۇعالىم ماماندىعىن اۋىستىرۋى كەرەك.

«وي، وسى ينتەرنەتتەرىڭ بالە بولدى عوي...»

ينتەرنەتتىڭ بالەسى دە بەرەكەسى دە بار. بۇل ادامزاتتىڭ جەتكەن ەڭ مىقتى يگىلىكتەرىنىڭ ءبىرى، دەگەنمەن. وسىدان شيرەك عاسىر بۇرىن قولىمىزدا جاھاننىڭ اقپاراتى بولاتىنىن ەشكىم ويىنا كىرگىزە المايتىن ەدى. بۇكىل الەم ونلاين ءبىلىم بەرۋ ىسىندە العا كەتىپ بارادى. ءبىزدىڭ ەلدە ول ەندى كەلە باستادى. الداعى ون جىلدا گيبريدتى ونلاين ءبىلىم جۇيەسىنە كوشىپ كەتسەك، ءبىلىم سالاسىندا جاساعان ەڭ جاقسى قادامدارىمىزدان بولار ەدى دەپ ويلايمىن. سوندىقتان، وقۋشىلاردىڭ ونلاين ءبىلىم الۋعا جانە ۇستازداردىڭ ءبىلىم بەرۋگە قازىردەن ۇيرەنە باستاۋى سول ونجىلدىق مەجەگە ەرتە جەتۋىمىزگە سەپتىگىن تيگىزەدى دەپ ويلايمىن.

«اۋەلى ساپالى ينتەرنەتپەن قامتاماسىز ەتىپ الىڭدار!»

بۇل ساۋال ەندى ءبىزدىڭ جوباعا ەمەس. ءبىز ءوز قامتۋ ايامىزدا قولدان كەلگەنىن ماكسيمۋم جاساپ ءارى بەرىپ جاتىرمىز. ال، ينتەرنەتپەن جابدىقتاۋمەن ارنايى اينالىساتىن مينيسترلىك بار. ولاردا وسىعان دەيىن تالاي ۋاقىت بولدى. بىراق، مىندەتتەرىن ءالى تولىق اتقارا العان جوق. ءبىز دە ول ءۇشىن رەنجۋلىمىز. سوندىقتان، Daryn.online رەسۋرسىنا قولجەتكىزۋ قيىندىقتارى تۋىنداپ جاتسا، ونىڭ قارعىسى مەن نالاسىن بىزگە ەمەس، باسقا ادرەسكە جولداڭىزدار. ويتكەنى، وسى پوستتى جاريالاۋ ءۇشىن دە الماتىنىڭ سىرتىنداعى اۋىلدا جارتى ساعاتتان بەرى فەيسبۋكتىڭ اشىلۋىن كۇتىپ جۇيكە توزىپ وتىر.

ايتسە دە، وسى ءساتتى پايدالانىپ بيلىك باسىنداعى اعالارىمىزدان تەز ارادا قالا بالاسى مەن اۋىل بالاسىنىڭ ينتەرنەت مۇمكىندىكتەرىنە قولجەتىمدىلىگىن تەڭەستىرۋدى سۇرايمىز.

قورىتا كەلسەك، Daryn.online جوباسى قولدانۋشىلاردىڭ وسىنداي قيىن كەزەڭدە ءبىلىم الۋى ءۇشىن بازالىق بارلىق مۇمكىندىكتەردى بەرەتىنىنە سەنەمىز. جوبا كەمشىلىكتەرى ءۇشىن ۇرسىپ جاتساڭىزدار باسىمىزدى ءيىپ تۇرىپ ۋاجدەرىڭىزدى تىڭدايمىز ءھام ەسكەرەمىز. بىراق، بەتالدى ايىپتاۋلار مەن لايقا ويدىڭ استىنداعى پىكىرلەرگە قاتتى جاۋاپ بەرىپ جاتساق سىزدەر ايىپقا بۇيىرماڭىزدار. ءدال قازىر از ۋاقىتقا بولسا دا (سولاي بولعاي) ميلليونداعان وقۋشىنىڭ ءبىلىمى بىزگە بايلانىستى بولىپ تۇر. نيەتىمىز اق، پەيىلىمىز وڭ، ارەكەتىمىز تۋرا. وسى كۇيىمىزگە سەلكەۋ ءتۇسىرىپ قويماۋلارىڭىزدى وتىنەمىز.

ويتكەنى، ءبىز دە ءسىز سياقتى ادامبىز.

سادىق شەرىمبەك

Abai.kz