قىتاي ۆيرۋسىنىڭ (كوروناۆيرۋس) جىلدام تارالۋىنا بايلانىستى قازاقستان بيلىگى رەسەيدەن كومەك سۇراپتى. گۋمانيتارلىق كومەك. «Sputniknews.kz» سايتىنىڭ مالىمەتىنشە، قازاقسان بيلىگى مۇنداي كومەكتى تەك رەسەيدەن عانا ەمەس، باسقا دا مەملەكەتتەردەن سۇراپ، ءۇشبۋ حات جولداعان كورىنەدى.

قازاقستاننىڭ سىرتقى ىستەر مينيسترلىگى: «ءبىز گۋمانتيرالىق كومەك تۋرالى ءوتىنىشتى بارلىق ەلدەرگە جولدادىق. ونىڭ ىشىندە رەسەي فەدەراتسياسى دا بار», - دەپتى جۋرناليستەردىڭ ساۋالىنا.

ال ورىستىڭ «كوممەرسانت» گازەتىنىڭ جازۋىنشا، تۇركىمەن مەن ۋكرايننەن باسقا تمد-نىڭ بارلىق مەملەكەتى رەسەي بيلىگىنە رەسمي حات جولداعان. كومەك سۇراعان. بەتپەردە، تەست جۇيەلەرى مەن وكپەنى جاساندى جەلدەتۋ (يۆل) اپپاراتتارىن جەتكىزىپ بەرۋدى وتىنگەن.

بۇعان دەيىن رەسەي ۇكىمەتى مەديتسينالىق تاۋارلاردى، سونىڭ ىشىندە جاڭاعى بەتپەردەلەر مەن باسقا دا قاجەتتى زاتتاردى شەتەلگە شىعارۋعا بولمايدى دەگەن شەشىم قابىلداعان ەكەن. الايدا، ول قۇجاتتا وزگە ەلدەرگە گۋمانيتارلىق كومەك رەتىندە جىبەرۋگە بولادى دەگەن جولدار بار ەكەن-مىس. «سوعان سۇيەنىپ، الگى كومەك سۇراعاندارعا قول ۇشىن بەرۋگە ماقۇلمىز»، دەگەندەي كەرگىمە ءسوز جازىپتى، «كوممەرسانت» .

ايتا كەتەيىك، وسىعان دەيىن، اقپاندا، قازاقستان جاڭاعى رەسەيدەن كوروناۆيرۋستى انىقتايتىن ارنايى قۇرىلعىلار العان. جالعىز ءبىز ەمەس، تمد-نىڭ باسقا دا ەلدەرى الدى.

ال جاڭاعى «كوممەرسانت» گازەتى: «رەسەيدىڭ «ۆەكتور» بيوتەحنولوگيا جانە ۆيرۋسولوگيا ورتالىعىندا جاسالعان اپپاراتتاردى وداقتاس ەلدەرگە قايتارىمسىز بەردىك»، دەپ جازىپتى.

ودان كەيىن، اقش بيلىگى دە قازاقستانعا ارنايى ۇشاق جىبەرىپ، گۋمانيتارلىق كومەك ۇسىنعان.

قىتاي دا كومەك رەتىندە ازدى-كەم زات-بۇيىم جەتكىزگەن. بەتپەردەلەر، ءبىر رەتكى قولدانۋعا ارنالعان قولعاپتار مەن كوزاينەكتەر. ەلشىلىك 20 ناۋرىزدا اتالعان مەديتسينالىق تاۋارلاردى «سك-فارماتسيا» جشس-گە بەرگەنىن الەۋمەتتىك جەلىدە جازىپ، ءسۇيىنشى سۇرادى.

ال بۇگىن قىتايدان ارنايى ۇشاق الماتىعا جەتىپ، قونعانى بەلگىلى بولدى. قىتاي توراعاسى شي جيپيڭ دە قازاقستانعا گۋمانيتارلىق كومەك جىبەرىپتى.

«بۇل قىتاي ۇكىمەتىنىڭ العاشقى گۋمانيتارلىق كومەگى. بۇگىن، تەستتەر، قولعاپتار، كوزاينەكتەر، حالاتتار مەن باسقا دا مەديتسينالىق قۇرالدار كەلدى.  الدا تاعى دا وسىنداي كومەك كەلەدى دەپ ۇمىتتەنەمىن»، - دەپتى باس كونسۋلدىڭ ورىنباسارى مياو حۋمبو دەيتىن ادام.

ءتۇيىن. راس، قازىرگىدەي قىسىلتاياڭ كەزەڭدە قازاقستان بيلىگى اركىمگە الاقان جايىپتى، دەپ سوگە سويلەۋگە جانە كەلمەس. قاۋىپتى ۆيرۋسپەن بەتپە-بەت كەلگەندەگى قازاقستان مەديتسيناسىنىڭ رەالدى جاعدايى كورشى-قولاڭنان كومەك سۇراۋعا ماجبۇرلەۋى تۇسىنىكتى دە. ونىڭ ۇستىنە، مۇنداي كومەكتى كىمدەر الماي جاتىر...

ەستەرىڭىزدە بولار، قىتايدا ۆيرۋس العاش انىقتالعان كەزدە، قازاقستان بيلىگى قىتايعا كومەك جىبەرگەن.

1 اقپاندا پرەزيدەنت توقاەۆ قىتاي توراعاسى شي جيپيڭعا حات جازىپ، الدا-جالدا قاجەتتىلىك بوپ جاتسا، كومەكتەسۋگە دايىن ەكەنىن جەتكىزگەن. 2 اقپاندا  قازاقستان بيلىگى قىتايعا 13,6 توننا مەديتسينالىق زاتتار جىبەرگەنى بەلگىلى بولدى. ال 3 اقپاندا قىتايدىڭ سىرتقى ىستەر ءمينيسترى العىس ايتىپ، اعىنان جارىلعان.

تاقىرىپقا تۇزدىق رەتىندە ايتا كەتەيىك، الگىندە عانا الدى پرەزيدەنتتىڭ كەڭەسشىسى، ارتى ۇساق-تۇيەك اكىم-قارالارعا دەيىن: «قازاقستان قاۋىپتى ۆيرۋسقا الدىن-الا دايىن بولدى»، دەپ جارىسا جازىپ جاتقان ەدى. اۋەلى، رەسپۋبليكانىڭ ءار وڭىرىنەن ءالسىن-ءالسىن: «پالەن وڭىردە تاۋلىگىنە تۇگلەن مىڭ بەتپەردە تىگەدى» دەگەن اقپاراتتار تاراپ جاتتى. ءتىپتى، ەكس-پرەزيدەنت ەل-حالىقتان كومەك سۇراپ، ءبىرلى-جارىم باي-باعلاننىڭ قالتاسىنداعى قارجىعا قۇرىلعان «ءبىز بىرگەمىز» قورى كەشە عانا 5 ميلليون بەتپەردەنى تەگىن تاراتاتىنىن ايتقان. توتەنشە جاعداي كەزىندە ەلدەگى تۇراقتىلىقتى ساقتاپ قالۋ ءۇشىن قازىنادان قىرۋار قاراجات بولەتىنىن، كەشە پرەزيدەنت توقاەۆ مالىمدەدى. بۇنىڭ ءبارى بىلە ءجۇرسىن دەگەن اقپارات...

ايتپاعىمىز، اتىگور بولعان الگى گۋمانيتارلىق كومەك ەندى قازاقستاننىڭ ءوز دارىگەرلەرىنە، ءوز حالقىنا كەرەك بولىپ، كىسى كومەگىنە جۇگىنۋگە تۋرا كەلدى.

Abai.kz