HRW زاڭ جوباسىن تالقىلاۋ كەزىندە بەلسەندىلەر پىكىرى ەسكەرىلۋى كەرەك دەپ ەسەپتەيدى. ازاتتىق بەلسەندىلەر بولسا نارازىلىق اكتسيالارى مەن كوپشىلىك شارالارعا تىيىم سالۋدى كوزدەيتىن زاڭ توتەنشە جاعداي كەزىندە قابىلدانىپ كەتەدى دەپ الاڭدايدى.
26 ناۋرىزدا ءماجىلىس زاڭ جوباسىن ءبىرىنشى وقىلىمدا ماقۇلدادى. بەلسەندىلەر قۇجاتتى قابىلداپ الۋعا اسىققان بيلىكتى سىنادى. ولار جاڭا زاڭدا شەكتەۋ كوپ دەپ وتىر.
HRW زەرتتەۋشىسى لورا ميللس 1995 جىلى قابىلدانعان زاڭعا قاراعاندا، جاڭا زاڭ جوباسىندا شەكتەۋلەردىڭ ازايعانى شامالى دەيدى.
"شارانى وتكىزۋ تۋرالى ءوتىنىشتى قابىلداۋ-قابىلداماۋ قۇقىعى بيلىك قۇزىرەتىندە قالادى. شەنەۋنىكتەر اكتسيا وتەتىن ورىن مەن ۋاقىتتى ۇسىنۋى مۇمكىن. ۇيىمداستىرۋشىلار وعان كەلىسپەسە، شارا وتپەيدى. بۇنىڭ ەشقايسىسى جيىن ەركىندىگىن قولدايتىن حالىقارالىق ەرەجەلەرگە ساي ەمەس", - دەيدى ميللس.
وتكەن جىلى ماۋسىمدا پرەزيدەنت سايلاۋىندا جەڭىسكە جەتكەن قازاقستان پرەزيدەنتى قاسىم-جومارت توقاەۆ يناۋگۋراتسيادان سوڭ ميتينگىلەر تۋرالى جاڭا زاڭ جوباسىن قابىلداۋعا ۋادە بەرگەن. اقپان ايىندا ۇكىمەت بەيبىت جيىندار تۋرالى زاڭ جوباسىن تالقىلاۋعا ۇسىندى. قۇجاتپەن تانىسقان زاڭگەرلەر بيلىك قازىرگى شەكتەۋلەردى جاڭا زاڭعا كوشىرگىسى كەلەدى دەپ وتىر.
Abai.kz
