2 ساۋىردە قر پرەزيدەنتى قاسىم-جومارت توقاەۆ اسكەري مىندەتتىلەردى ارناۋلى جيىندارعا شاقىرۋ تۋرالى جارلىققا قول قويعان ەدى.

وسىعان وراي، قورعانىس ءمينيسترى نۇرلان ەرمەكباەۆ قر قارۋلى كۇشتەرىنىڭ اۋماقتىق اسكەرلەرىن جاساقتاۋ ءۇشىن ارناۋلى جيىندارعا كىمدەردىڭ جانە قالاي شاقىرىلاتىنىن ايتىپتى.

اسكەرگە كىمدەر شاقىرىلادى؟

ءمينيستردىڭ سوزىنشە، ارناۋلى جيىندارعا اسكەري ەسەپتە تۇرعان جانە دەنساۋلىعى جارامدى دەپ تانىلعان ازاماتتار شاقىرىلادى.

«ازاماتتار ارناۋلى جيىنعا تۇرعىلىقتى جەرى بويىنشا شاقىرىلاتىندىقتان، كۇندەلىكتى جۇمىس رەتىندە بارىپ، قىزمەت اياقتالعاننان كەيىن ۇيلەرىنە قايتادى.

ەگدە جاستاعى، وتباسىلىق جاعدايى قيىن نەمەسە سوزىلمالى اۋرۋى بار ازاماتتاردى شاقىرۋدىڭ قاجەتى جوق. سەبەبى بىزدە ادام رەسۋرسى جەتكىلىكتى»، - دەدى ول.

اسكەرگە كىمدەر شاقىرىلمايدى؟

ءمينيستردىڭ ايتۋىنشا، قولدانىستاعى زاڭعا سايكەس ارناۋلى جيىنداردان:

- قورعانىس،

- قۇقىق قورعاۋ،

- قاۋىپسىزدىككە قاتىستى مەملەكەتتىك ورگاندا جۇمىس ىستەيتىندەر،

- اۆياتسيالىق پەرسونال،

- كوكتەمگى ەگىس جۇمىستارى كەزىندە اۋىل شارۋاشىلىعى سالاسىندا ەڭبەك ەتەتىندەر،

- پەداگوگيكالىق كادرلار،

- ءبىلىم بەرۋ ۇيىمدارى مەن ورگانداردا ىشتەي وقىپ جاتقان ازاماتتار،

- ايەلدەر،

- 18 جاسقا دەيىنگى ءۇش بالاسى بار ازاماتتار،

- تەرگەۋدەگى نەمەسە پروتسەسسۋالدىق ىسكە تارتىلعان ازاماتتار،

- جەرگىلىكتى اتقارۋشى ورگانداردىڭ دەپۋتاتتارى ارناۋلى جيىنعا شاقىرىلمايدى.

مينيستر نۇرلان ەرمەكباەۆتىڭ ايتۋىنشا، ءبىرىنشى كەزەكتە ەرىكتىلەر قىزمەت ەتەدى. اسكەرگە شاقىرىلۋشىلاردىڭ مەرزىمى مەن سانىن جەرگىلىكتى جەردەگى اكىمدەر انىقتايدى. ال جيىن 10 كۇننەن ءۇش ايعا دەيىن سوزىلۋى مۇمكىن.

«قارۋلى كۇشتەردىڭ وڭىرلىك اسكەرلەرى ايماقتىق قورعانىستى ساقتاۋعا، سونىمەن قاتار توتەنشە جاعداي ءتارتىبىنىڭ ساقتالۋىنا جاۋاپتى. ياعني اسكەري مىندەتتىلەر باسقا ايماقتارعا جىبەرىلمەيدى. وڭىرلىك اسكەرلەردىڭ بولىمشەلەرى ىشكى ىستەر ورگاندارىمەن بىرلەسىپ، بلوك-پوستتاردا مىندەتىن اتقارىپ، پاترۋلگە شىعىپ، نىسانداردى كۇزەتىپ، سۋ تاسقىنىنا قارسى شارالارعا اتسالىسىپ، دەزينفەكتسيا جۇمىستارىن جۇرگىزە الادى. ارناۋلى جيىنداردىڭ مەرزىمى مەن اسكەري مىندەتتىلەردىڭ كەرەكتى سانىن جەرگىلىكتى اتقارۋشى ورگانداردىڭ وزدەرى ايقىندايدى»، - دەدى قورعانىس ءمينيسترى.

ەرمەكباەۆ جيىن كەزىندە اسكەري مىندەتتىلەر اسكەري قىزمەتكەر مارتەبەسىنە يە بولاتىنىن اتاپ ءوتتى. ولارعا تاماق، كيىم-كەشەك، مەديتسينالىق كومەك سياقتى الەۋمەتتىك سيپاتتاعى بارلىق جەڭىلدىكتەر جاسالادى.

بۇدان وزگە، اسكەري جيىن كەزەڭىندە ولاردىڭ جۇمىس ورنى مەن اتقاراتىن قىزمەتى ساقتالادى. اسكەري مىندەتتىلەر مەملەكەتتەن ورتاشا جالاقى، ال بۇرىن جۇمىس ىستەمەگەن ادامدار – 42 500 تەڭگە مولشەرىندە ەڭ تومەنگى جالاقى الادى.

ازىرلەگەن رامينا چاكيرباەۆا

Abai.kz