قازاقستاننىڭ كاسىپوداقتار فەدەراتسياسى – ەلدەگى ەڭبەك ادامدارىنىڭ ەڭ ۇلكەن اليانسىنا اينالعان. بۇگىندە فەدەراتسيا مۇشەلىگىندە 1,5 ميلليوننان استام ادام تىركەلگەن. ەڭبەك ادامدارىنىڭ زاڭدى قۇقىقتارىن جان-جاقتى قورعاۋدا كاسىپوداقتار فەدەراتسياسىنىڭ اتقاراتىن ماڭىزى وراسان زور. ول الەۋمەتتىك ارىپتەستىك جۇيەسىنىڭ ءبىر تارابى. قوعامدىق كەلىسىمنىڭ ساقتالۋى، ەل ەكونوميكاسىنىڭ دامۋى، الەۋمەتتىك-ەكونوميكالىق ءھام ەڭبەك قاتىناستارىندا ەڭبەككەرلەردىڭ زاڭدى قۇقىقتارىن قورعايتىن بىردەن ءبىر ۇيىم.

بۇگىندە الەمدە كاسىپوداقتار قۇرامىندا 176 ميلليوننان اسا ادام مۇشە ەكەن. فەدەراتسيا 171 مەملەكەتتە جۇيەلى جۇمىس جاساپ جاتىر. وسىنى ەسكەرسەك، قوعامدىق كوڭىل-كۇي مەن ءومىردى تۇراقتاندىرۋدا كاسىپوداقتار جۇمىسىنىڭ الاتىن ورنى ەرەكشە.

قازىر قاۋىپتى ىندەن (كوروناۆيرۋس) پەن قارجىلىق قيىندىق قوس بۇيىردەن قىسقان الاعاي دا بۇلاعاي كەزەڭدە مەملەكەت تاراپىنان بىرقاتار توتەنشە شەشىمدەر قابىلدانعانى بەلگىلى. ەل اۋماعىندا جاريالانعان توتەنشە جاعداي رەجيمى مەن حالىقتىڭ الەۋمەتتىك از قامتىلعان توپتارىنا، سونىڭ ىشىندە توتەنشە جاعداي كەزىندە تۇراقتى تابىسىنان ۋاقىتشا ايىرىلعان ازاماتتارعا الەۋمەتتىك قولداۋ ت.ب. باستامالارعا قوعامدىق ۇيىمدار دا ءۇن قوسىپ جاتىر.

بۇل ورايدا ەلدەگى 1,5 ميلليوننان اسا ەڭبەككەردىڭ باسىن بىرىكتىرىپ وتىرعان قازاقستاننىڭ كاسىپوداقتار فەدەراتسياسى قانداي شارۋالار اتقارۋدا؟ ءبىز شولۋ جاساپ كورگەن ەدىك.

كاسىپوداقتار توتەنشە جاعداي كەزىندە نە ىستەپ جاتىر؟

16 ناۋرىز كۇنى قازاقستاننىڭ كاسىپوداقتار فەدەراتسياسى قازاقستان حالقىنا جانە ەلدەگى جۇمىس بەرۋشىلەرگە ارانيى ۇندەۋ جاريالاپتى.

مەملەكەت باسشىسى مەن ۇكىمەت تاراپىنان قولعا الىنعان بىرقاتار شارالاردىڭ ماڭىزدىلىعىنا توقتالا كەلە، بيۋدجەت شىعىستارىن ازايتۋ، ايماقتارداعى جۇمىسپەن قامتۋدى رەتتەۋ، ەلدىڭ اقشا-قارجى نارىعىن تۇراقتاندىرۋ سەكىلدى باستامالاردى قولدايتىندىقتارىن ءبىلدىرىپتى.

«ازاماتتىق قوعامنىڭ ەڭ ۇلكەن بولىگى رەتىندە ءوز مۇشەلەرىمىزدى جانە ارىپتەستەرىمىزدى قوعامداعى جاعدايدى تۇراقتاندىرۋ ءۇشىن كۇش بىرىكتىرۋگە شاقىرامىز»، - دەپتى ۇندەۋدە.

جۇمىس بەرۋشىلەر مەن باكتەردى:

ەڭبەك ادامىن سەبەپسىز جۇمىستان بوساتپاۋعا، بارلىق الەۋمەتتىك اۋدارىمداردى تولەۋگە، جالاقىنى ازايتپاۋعا، ەڭبەك جاعدايىنىڭ نەگىزسىز ناشارلاۋىنا جول بەرمەۋگە، قىزمەتكەرلەرگە قاشىقتان جۇمىس جاساۋ ءۇشىن جاعداي جاساۋعا، ەڭبەك زاڭناماسى مەن ۇجىمدىق شارتتاردىڭ ساقتالۋىن قامتاماسىز ەتۋگە تج كەزىندە نەسيەلىك تولەمدەر مەن پايىزدىق وسىمدەردى ۋاقىتشا توقتاتۋعا شاقىرىپتى.

ەڭبەك ادامىنىڭ قۇقىعى باستى نازاردا

جوعارىداعى ۇندەۋگە بايلانىستى اقتوبە وبلىسىندا كاسىپوداقتار ورتالىعى جانىنان جەدەل شتاب قۇرىلىپ، سەنىم تەلەفونى ىسكە قوسىلعان ەكەن. وندا ماماندار وڭىردەگى ەڭبەك ادامدارىنىڭ ەڭبەك زاڭناماسىنىڭ ساقتالۋىنا بايلانىستى ساۋالدارىنا جاۋاپ بەرىپ، زاڭدى قۇقىقتارىن قورعاۋعا كومەكتەسەدى. قۇقىقتىق-كونسۋلتاتيۆتىك جۇمىس اتقارادى.

«بۇل باستامالار – ەلدەگى كوروناۆيرۋسقا قارسى شارالاردى ىسكە اسىرۋ مەن توتەنشە جاعداي كەزىندە كəسىپوداق مۇشەلەرىنىڭ قۇقىعىن قورعاۋعا باعىتتالعان ناقتى قادامدار. باستىسى قيىن كەزدە جۇمىس ورىندارىن ساقتاۋ، قاراپايىم ەڭبەككەرلەردىڭ مۇددەلەرىن قورعاۋعا اتسالىسۋ»، – دەيدى وڭىرلىك جەدەل شتاب وكىلدەرى.

اقتوبەدە «SENIM» كاسىپوداعى مەديتسينا قىزمەتكەرلەرىنە قولداۋ كورسەتكەن. وبلىستىق جۇقپالى اۋرۋلار اۋرۋحاناسى، كارانتيندىك گوسپيتال مەن ۋاقىتشا اۋرۋحانانىڭ دارىگەرلەرى مەن مەديتسينالىق قىزمەتكەرلەرىنە ازىق-تۇلىك جانە گيگيەنالىق قۇرالدار جەتكىزىپ بەرگەن. سونداي-اق، 132 جەدەل جاردەم قىزمەتكەرىنە از-كەم اقشالاي سىياقى تاعايىنداعان.

اقتوبەدە مىڭ جارىمعا تارتا كاسىپوداق مۇشەسى بار «اقبۇلاق» اق توتەنشە جاعداي كەزىندە تۇرعىنداردى ءساۋىردىڭ سوڭىنا دەيىن جىلۋمەن قامتاماسىز ەتەتىنىن ايتتى.  ال تاحاۋي احتانوۆ اتىنداعى دراما تەاترى مەن «الاقاي» قۋىرشاق تەاترى وزدەرىنىڭ تىگىن تسەحىندا مەديتسينالىق بەتپەردەلەر تىككەن.

قارت كىسىلەرگە كومەك

ال «SENIM» دەنساۋلىق ساقتاۋ جۇيەسى قىزمەتكەرلەرىنىڭ كاسىپوداعى كوروناۆيرۋستىق پاندەميا كەزىندە قوزعالىسى شەكتەلگەن قارت كىسىلەر مەن زەينەتكەرلەرگە قاجەتتى ازىق-تۇلىك پەن ءدارى-دارمەك زاتتارىن جەتكىزىپ بەرگەن. ماڭعىستاۋداعى كاسىپوداق جاستارىنىڭ ەرىكتىلەرى قولعا العان اتالمىش شارا رەسپۋبليكانىڭ وزگە دە وڭىرلەرىندە جالعاسىن تاپقان.

ال قاراعاندىلىق كاسىپوداقتار فەدەراتسياسىنىڭ جەدەل شتابى توتەنشە جاعداي كەزىندە قىزمەتتىڭ شەكتەلۋىنە بايلانىستى تابىسىنان ايىرىلعان نەمەسە اقىسىز دەمالىسقا جىبەرىلگەن كاسىپورىن قىزمەتكەرلەرىنە الەۋمەتتىك تولەمدەر تۇرىندە قولداۋ كورسەتۋ ماسەلەسىن قاراستىرعان.

قاراعاندى وبلىستىق كاسىپوداق كەڭەسىنىڭ مۇشەسى، قانات ناۋرىزباەۆ جەتەكشىلىك ەتەتىن «مەرەي» جشس كوپسالالى مەديتسينالىق ماسكالار ءوندىرىسىن ۇيىمداستىرعان. تاۋلىگىنە 25-30 مىڭ دانا ازىرلەۋگە قابىلەتتى تسەح قاراعاندى وبلىسىنىڭ الەۋمەتتىك دارىگەرلەرىنە 60 مىڭ ماسكا جەتكىزىپ بەرگەن.

باتىس قازاقستان وبلىسىندا كاسىپوداقتار جانىنداعى «كەلەشەك» جاستار كەڭەسى «دارىگەرلەرگە العىس» چەللەندجىن باستاپ، قاۋىپتى ىندەتپەن كۇرەستىڭ الدىڭعى شەبىندە جۇرگەن مەديتسينا قىزمەتكەرلەرىن قولداۋ بىلدىرگەن.

شىمكەنتتە «YNTYMAQ» ورتا جانە شاعىن بيزنەس سالاسى جۇمىسكەرلەرىنىڭ سالالىق كاسىپوداعى قالاداعى قوعامدىق كولىكتەرگە جاسالاتىن سانيتارلىق شارالاردى باقىلاۋعا العان. ودان بولەك، ەڭبەك ادامدارىنىڭ قۇقىقتارىن ساقتاۋ ءۇشىن شىمكەنت قالاسى جانە تۇركىستان وبلىسى بويىنشا جەدەل شتاب قۇرىلعان.

قىزىلوردا وبىلىسىندا كاسىپوداقتار ۇيىمى 362 وتباسىنا ازىق-تۇلىك جەتكىزىپ بەرگەن.

ءتۇيىن. قازاقستاننىڭ كاسىپوداقتارى ۇيىمدارى ەلىمىزدىڭ ايماقتارىندا بىرقاتار شارالاردى اتقارۋدا بەلسەندىلىك تانىتىپ وتىر. اتاپ ايتقاندا، جەدەل جۇمىس شتابى قۇرىلىپ، كاسىپوداق ۇيىمدارى حالىقتىڭ الەۋمەتتىك از قامتىلعان بولىگىنە تەگىن ازىق-تۇلىك، مەديتسينالىق بۇيىمدار جەتكىزىپ بەرىپ جاتىر. بۇل دە ءوز كەزەگىندە «جۇمىلا كوتەرگەن جۇك جەڭىل» ەكەندىگىن دەلەلدەيدى.

Abai.kz