رەوبليتاتسيا جۇمىسىنداعى تاجىريەبەمنەن بايقاعانىم – جات اعىم وكىلدەرىنىڭ كوپشىلىگى «شيرك»، «كۇپىر»، «بيدعات»، «تاعۋت»، «نيفاق»، «كابير-مۋرتاكيب» جانە «جيھاد» تاقىرىپتارىن تۋ ەتىپ ۇستايدى.

البەتتە، اقيدا جانە فيقھ پاندەرى بويىنشا اتالعان تاقىرىپتار اسا ماڭىزدى. بۇل تاقىرىپتاردى جان-جاقتى تۇسىنبەيىنشە، ادامنىڭ يسلامدى تولىق قابىلداۋ مۇمكىن ەمەس. دەگەنمەن، وسى تاقىرىپتى تۋ ەتىپ ۇستاپ جۇرگەن باۋىرلارىمىزدىڭ كوپشىلىگىنەن اڭعارعانىم، ولاردىڭ احلاق (مۇسىلماندىق ەتيكا) تۋرالى ءىلىمى تىم تاياز. تاياز عانا ەمەس، باسىم كوپشىلىگىنىڭ مىنەز-قۇلقى قىرسىق، قىڭىر، قارا دۇرسىندەۋ. ىشتەرىندە وزدەرىنىڭ سول قارا ءدۇرسىن مىنەزدەرىن اينىماس «پۇتقا» اينالدىرىپ جىبەرگەندەرى دە بارشىلىق.

وسىلاي سول تاكاپپار مىنەزىن بارىنەن جوعارى قويۋدى جالعاستىرا بەرسە، ونىڭ سوڭى «شيرككە»، «كۇپىرگە»، بيدعاتقا»، «تاعۋت بولۋعا»، «مۇناپىقتىق ەتۋگە»، «ۇلكەنت كۇنا جاساۋعا» يتەرمەلەۋى ابدەن مۇمكىن عوي. سەبەبى، اللا-تاعالا قۇران-كارىمدە: «ءناپسى جاماندىققا بۇيىرادى» (يۋسۋف، 53) دەپ ەسكەرتەدى. ال، اللا ەلشىسى (س.ع.س): «ەڭ ۇلى جيھاد – ناپسىمەن كۇرەس» دەپ وسيەت ەتكەن. الاشتىڭ الداسپان اقىنى ماحامبەت: «مۇسىلمانشىلدىق كىمدە جوق، تىلدە بار دا، دىلدە جوق» دەيدى. ءيا باۋىرىم، مىنەزىڭدى تۇزەمەگەننەن كەيىن سەنىڭ تىلىڭدەگى مۇسىلمانشىلدىق كىمگە كەرەك؟

مۇحان يساحان،

ءدىنتانۋشى. PHD دوكتورى،

قمدب جانىنداعى عۇلامالار كەڭەسىنىڭ مۇشەسى،

(شقو ءدىن ماسەلەلەرىن زەرتتەۋ ورتالىعى).

Abai.kz