ەل ۇكىمەتى ازاماتتاردى جايلى ءومىر، تولىمدى تۇرمىس سالتىمەن قامتاماسىز ەتۋ ماقساتىندا كوپتەگەن يگىلىكتى شارالار جۇرگىزىپ كەلەدى. ەل تۇرعىندارىنا دەگەن قامقورلىق ادەتتىگى كۇندەردە عانا ەمەس، ءتۇرلى اپاتتىق جانە توتەنشە جاعداي كەزىندە دە ءوز جالعاسىن تابادى. 

ەل ۇكىمەتىنىڭ ازاماتتاردى قولداۋ ساياساتى مىناۋ تۇتاس دۇنيەنى تابانىنان تىك تۇرعىزعان اسا قاتال كوروناۆيرۋس ىندەتى كەزىندە دە توقتاعان جوق. اتالعان ىندەت الىس-جاقىن شەتەلدەردى عانا ەمەس، ءبىزدىڭ ەلدى دە اينالىپ وتكەن جوق. ءبىزدىڭ ەلدە دە تالاي ادام اۋىرۋ جۇقتىرىپ، اۋىرۋحاناعا جاتقىزىلدى. ەلدە توتەنشە جاعداي جاريالانىپ، بۇكىل ەل كارانتيندە وتىر. وسى جاعدايعا بايلانىستى ءبىرتالاي ازامات جۇمىستارىنان ۋاقىتشا ايىرىلىپ قالدى. ءسويتىپ، ولاردىڭ تابىس كوزى توقتاپ، كەيبىرىندە ءتىپتى كۇندەلىكتى كۇنكورىستىڭ قامىن قامداۋدىڭ ءوزى قيىنعا سوقتى.

وسى جاعدايدى ەرەكشە نازاردا ۇستاعان مەملەكەت باسشىسى قاسىم-جومارت توقاەۆ ازاماتتاردى جان-جاقتى قولداۋ شارالارىن قولعا الۋدى تاپسىردى. نەگىزگى جۇمىس باعىتى، كارانتينگە بايلانىستى تابىسىنان ايىرىلعان تۇرعىندارعا ەڭ تومەنگى ايلىق تابىس كورسەتكىشى مولشەرىندە (42500 تەڭگە كولەمىندە) قارجىلاي قولداۋ كورسەتىلدى. رەسمي اقپاراتتارعا سەنسەك بۇل قارجىنى بىرنەشە ميلليون ەل تۇرعىنى العان كورىنەدى.

ەلدەگى وسىناۋ جاعدايلارعا بەي-جاي قاراماعان تۇڭعىش پرەزيدەنت، ەلباسى نۇرسۇلتان نازارباەۆ تا حالىققا كورمەكتەسىپ جاتىر. ەلباسى نۇرسۇلتان نازاباەۆتىڭ ارنايى باستاماسىمەن قۇرىلعان «Birgemiz» قورى كارانتين كەزىندە تابىس كوزىنەن ايىرىلىپ، قيىنشىلىققا ۇشىراعان 330 مىڭنان اسا
مۇقتاج وتباسىعا ەلۋ مىڭ تەڭگەدەن بىرجولعى قارجىلاي كومەك كورسەتتى. بۇل كومەك الداعى كۇندەرى تاعى دا وتىز مىڭنان استام وتباسىعا بەرىلەدى دەپ جوسپارلانىپ وتىر. اتالعان اقپاراتتى «Birgemiz» قورىنىڭ قامقورشىلار كەڭەسىنىڭ توراعاسى باۋىرجان بايبەك مىرزا مالىمدەدى. ول بۇل اقپاراتتى Facebook جەلىسىندەگى جەكە پاراقشاسىندا جازدى.

«Birgemiz» قورى سونىمەن قاتار دۇنيەجۇزىلىك ەكىنشى سوعىستاعى جەڭىستىڭ 75 جىلدىعىنا وراي ەكىنشى دۇنيەجۇزىلىك سوعىستىڭ قىرىق مىڭ قاتىسۋشىسى جانە اتالعان سوعىسقا قاتىسقان مۇگەدەك ارداگەرلەر، سونداي-اق تىل ەڭبەككەرلەرىنە ەلۋ مىڭ تەڭگەدەن تولەماقى بەرىلدى. مۇندا سەگىز جۇزدەن  استام ارداگەر مەن سەگىز مىڭان اسا تىل ەڭبەككەرىنە ءتۇرلى ازىق-تۇلىك
سەبەتتەرى جانە جەكە قورعانىس زاتتارى جەتكىزىلدى. مۇنداي ارداگەرلەردى
قولداۋ قىزمەتى تاعى دا جالعاستى جۇرگىزىلەتىن بولادى.

جوعارىدا اتالعان ارنايى كومەكتى الۋشىلاردىڭ رەسمي ءتىزىمى قازاقستان رەسپۋبليكاسى ەڭبەك جانە الەۋمەتتىك قورعاۋ مينيسترلىگى ۇسىنعان ارناۋلى ءتىزىم بويىنشا بەلگىلەنگەن جەتى كاتەگورياعا ساي جاسالدى. ءتىزىم اتالعان ەرەجەگە ساي اكىمدىكتەر تاراپىنان بەرىلدى.

كومەك الۋشىلاردىڭ قاتارىندا از قامتىلعان جانە كوپبالالى وتباسىلار جانە كومەككە مۇقتاج مۇگەدەك جاندار، ەڭ تومەنگى زەينەتاقى الاتىن جانە الەۋمەتتىك جاعىنان ءالسىز توپقا كىرەتىن زەينەتكەرلەر بار. سونىمەن قاتار مۇمكىندىگى شەكتەۋلى بالا تاربيەلەپ وتىرعان وتباسىلار، جەتىم بالالار، ەكىنشى دۇنيەجۇزىلىك سوعىستىڭ ارداگەرلەرى جانە ولارعا تەڭەستىرىلگەن تىل ەڭبەككەرلەرى دە كومەك الۋشىلاردىڭ تىزىمىنە ەندى.

«قوردان بەرىلەتىن كومەكتىڭ ەكىنشى تولقىنى اياسىندا 10,5 ملرد.
تەڭگە كولەمىندە قاراجات ءبولىندى. قور رەسۋرستارى شەكتەۋلى، سول
سەبەپتى قولداۋ شىنىندا كومەككە مۇقتاج، ماتەريالدىق جاعدايى
تومەن ازاماتتارعا عانا كورسەتىلەتىن بولادى»,- دەدى قور توراعاسى
رۋسلان ساكەەۆ.

ەلباسىنىڭ باستاماسىمەن قۇرىلعان «Birgemiz» قوعامدىق قورى وسى ايدىڭ باسىندا مۇقتاج جاندارعا كوروناۆيرۋستان ساقتانۋ قۇرالدارىن تاراتقان بولاتىن. ناقتىراق ايتقاندا ءساۋىر ايىنىڭ باسىندا اتالعان قور ەل ازاماتتارىنا بەس ميلليونننا اسا ماسكامەن قامتاماسىز ەتكەن ەدى.

اي باسىندا ەلباسى نۇرسۇلتان ءابىشۇلى نازارباەۆتىڭ باستاماسىمەن قۇرىلعان «Birgemiz» قوعامدىق قورى ەلدەگى توتەنشە جاعدايعا بايلانىستى، وتاندىق «سق-فارماتسيا» ۇكىمەتتىك وپەراتورىمەن بەس ميلليون ماسكا ساتىپ الۋ تۋرالى كەلىسىمشارت جاساسقان بولاتىن. بۇل كەلىسىمشارت قازاقستان رەسپۋبليكاسى پرەزيدەنتى جانىنداعى توتەنشە جاعدايدى قامتاماسىز ەتۋ جونىندەگى مەملەكەتتىك كوميسسيانىڭ ۇسىنىسى بويىنشا جاسالعانىن ايتا كەتۋ كەرەك.

وسىنىڭ الدىندا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ قاۋىپسىزدىك كەڭەسىنىڭ وتىرىسىندا ەلىمىز اۋماعىندا كوروناۆيرۋستىڭ تارالۋىنا قارسى شارالار شەڭبەرىندە، كومەككە مۇقتاج ازاماتتاردى ءتۇرلى قاجەتتى قورعانىس بۇيىمدارىمەن قامتاماسىز ەتۋدى تاپسىرعان بولاتىن. بۇل قورعانىس قۇرادار قاتارىندا مەديتسينالىق ماسكالارمەن قامتاماسىز ەتدىڭ قاجەتتىلىگى اسا جوعارى ەكەنى ايتىلعان.

«Birgemiz» قوعامدىق قورىنىڭ توراعاسى رۋسلان ساكەەۆتىڭ ايتۋىنشا، ارنايى كەلىسىمشارتپەن ساتىپ الىنعان بۇل ماسكالار كوروناۆيرۋستان ەڭ كوپ زارداپ شەككەن ءىرى قالالار - نۇر-سۇلتان قالاسىنا (2 ميلليون دانا), الماتى قالاسىنا (2 ميلليون دانا) جانە شىمكەنت قالاسىنا (1 ميلليون دانا) جەتكىزىلەتىن بولادى.

ەكىجاقتى كەلىسىمشارت بويىنشا، «سق-فارماتسيا» كومپانياسى جوعارىدا اتالعان قالالارعا مەديتسينالىق ماسكالاردى ون كۇن ىشىندە جەتكىزۋگە مىندەتتەلەدى. ءبىر ماسكانىڭ باعاسى ونىڭ اتالعان قالالارعا جەتكىزىلۋ باعاسىن قوسا ەسەپتەگەندە 118 تەڭگە بولۋى كەرەك. سونىمەن قاتار، ساتىپ الىنعان وسى ماسكالاردىڭ ساپاسىنا دا «سق-فارماتسيا» كومپانياسى جاۋاپتى بولادى. ال جەرگىلىكتى اكىمدىكتەر بۇعان دەيىن «Birgemiz» قوعامدىق قورىمەن جاساسقان كەلىسىمشارت بويىنشا، ماسكالاردى تارپسىرىپ العانى جايلى ۋاقىتىلى ەسەپ بەرىپ وتىرۋعا مىندەتتى. ءارى بۇل مەديتسينالىق ماسكالاردىڭ ءتيىستى مەكەن-جايلارعا بەلگىلەنگەن ۋاقىتتا جەتكىزىلۋىن قامتاماسىز ەتۋگە مىندەتتى.

«ماسكالار ەڭ الدىمەن، تۇرعىنداردىڭ ۆيرۋس جۇقتىرۋ قاۋىپى جوعارى ءالسىز توپتارىنا، ونىڭ ىشىندە جالعىز باستى قارتتارعا، كوپبالالى جانە از قامتىلعان وتباسىلارعا، جەتىم بالالارعا، ۇوس-نىڭ ارداگەرلەرىنە جانە ولارعا تەڭەستىرىلگەندەرگە، تىل ەڭبەككەرلەرىنە، ەرەكشە قاجەتتىلىكتەرى بار ازاماتتار مەن مۇمكىندىگى شەكتەۋلى بالالاردى كۇتۋشى ادامدارعا ارنالعان»، - دەدى رۋسلان ساكەەۆ.

ءسوز سوڭىندا ايتا كەتەرىمىز، «Birgemiz» قوعامدىق قورى ەلباسى نۇرسۇلتان نازارباەۆتىڭ باستاماسىمەن قۇرىلعان بولاتىن. قوعامدىق قور كوروناۆيرۋس پاندەمياسىنا قارسى كۇرەس كەزىندە ەل ازاماتتارىنىڭ كومەككە مۇقتاج توپتارىن قولداۋ ماقساتىندا قۇرىلدى. قور قۇرىلعان سوڭ قور ەسەبىنە 13 ميللياردتان استام تەڭگە تۇسكەن. قوردان كومەك الۋشالاتىن ازاماتتاردىڭ ءتىزىمىن جاساۋ ءۇشىن جەرگىلىكتى اكىمدىكتەر جانە الەۋمەتتىك قامسىزداندىرۋ مەكمەلەرىنىڭ ەسەبىنە سۇيەنىپ، جۇمىس جۇرگىزىلىپ جاتىر.

ءبىز جوعارىدا «Birgemiz» قوعامدىق قورىنىڭ ءساۋىر ايىنداعى ەكى ناقتى كومەگىمەن تانىستىردىق. ءبىر اي باسىندا، ءبىرى اي سوڭىندا جاسالعان جاسالعان الەۋمەتتىك كومەك. قوردىق جۇمىسى ءبىز كورسەتكەن ەكى مالىمەتپەن شەكتەلمەيدى. ەلدە توتەنشە جاعداي جاريالانعاننان بەرى اتالعان قور تىنىمسىز جۇمىس ىستەپ كەلەدى. ازاماتتارعان كورسەتىلگەن وزگە دە كومەكتىڭ بارلىق تۇرلەرى مەن قور ەسەبىنە تۇسكەن قاراجات بويىنشا اتالعان ۇيىمنىڭ رەسمي سايتىندا جانە الەۋمەتتىك جەلىلەردەگى رەسمي پاراقشاسىندا ۇزدىكسىز جاريالانىپ تۇرادى.

Abai.kz