"اۋداندا 11 ەلدىمەكەننىڭ ەگىستىكتەرىن سۋ شايعان. جالپى ءبىر مىڭنان استام اۋىل شارۋاشىلىعى تاۋار وندىرۋشىلەر ءتىزىمى جاسالدى. 7639 گەكتار ەگىستىكتىڭ شىعىنىن 4 ملرد 1 ملن تەڭگە كولەمىندە ەسەپتەپ، ۇكىمەتكە ۇسىندىق. كوميسسيا شەشىمى بويىنشا ءار داقىل تۇرىنە قاراي وتەماقى جاسالادى" دەدى وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆ.

ونىڭ ايتۋىنشا، 297 مالدى (58 باس سيىر، 227 قوي-ەشكى، 16 جىلقى، 2 تۇيە جانە 227 ءۇي قۇس) سۋ اعىزىپ اكەتكەن.

"مال شىعىنىن وتەۋ ءۇشىن نارىقتاعى باعا بويىنشا 32 ملن تەڭگە شىعىندى ەسەپتەپ، ۇكىمەتكە ۇسىنىپ وتىرمىز" دەدى ول.

1 مامىردا وزبەكستاننىڭ سىرداريا وبلىسىنداعى ساردوبا سۋ قويماسى جارىلىپ، اينالاسىنداعى اۋىلداردى سۋ شايىپ كەتكەن. 1 مامىر تۇندە ساردوبانىڭ سۋى قازاقستاننىڭ وڭتۇستىگىندەگى، قازاق-وزبەك شەكاراسىندا ورنالاسقان اباي كانالىنا جەتىپ، ماقتارال اۋدانىنداعى بىرنەشە اۋىلدى سۋ العان. وسىدان سوڭ ماقتارال اۋدانىندا توتەنشە جاعداي جاريالانىپ، مىڭداعان تۇرعىن ەۆاكۋاتسيالانعان. جۇزدەگەن ءۇيدى سۋ باسىپ، جارامسىز قالعان.

بۇعان دەيىن بيلىك وكىلدەرى سۋ تاسقىنىنان زارداپ شەككەن تۇرعىندارعا ارقايسىسىنا 100 مىڭ تەڭگە كولەمىندە وتەماقى بەرىلەتىنىن، ۇيلەرى جارامسىز قالعان تۇرعىندارعا جاڭادان باسپانا بەرىلەتىنىن ايتقان.

باسىندا قازاقستان بيلىگى سۋ تاسقىنىنا بايلانىستى وزبەكستانعا نارازىلىق نوتاسىن جىبەرىپ، وتەماقى سۇرايدى دەگەن اقپارات شىققان. كەيىننەن قازاقستان سىرتقى ىستەر مينيسترلىگى نارازىلىق نوتاسى جىبەرىلمەيدى دەپ حابارلادى.

9 مامىردا پرەزيدەنت قاسىم-جومارت توقاەۆ Twitter جەلىسىندە "سۋ رەسۋرستارىن ءتيىمدى ءارى ءادىل پايدالانۋ ماسەلەسى وزبەك تاراپىمەن تىعىز بايلانىستا شەشىلەتىن بولادى" دەپ جازدى.

بۇعان دەيىن ۇيىنەن، مالىنان ايىرىلعان تۇرعىندار بيلىكتەن ناقتى كومەك بولماي جاتقانىن ايتىپ، نارازىلىق بىلدىرگەن.

Abai.kz