كوكشەتاۋ وڭىرىندەگى شاعىن اۋىلداردىڭ ءبىرى - داۋقارادان بىرنەشە ادام "حالىق جاۋى" رەتىندە ۇستالىپ، اتىلعانى اتىلىپ، اتىلماعانى يتجەككەنگە ايدالىپ كەتتى. ول جاقتان امان ورالعانى جوق...

...كەيىن، ارادا وتىز جىلداي ۋاقىت وتكەندە اۋىلداعى ساۋساقپەن سانارلىقتاي شالداردىڭ ءبىرى و دۇنيەگە اتتانارىندا قاتتى قينالىپ، قايتا-قايتا شىڭعىرىپ، جان داۋسى شىعىپ، جانىنداعى جاقىندارى مەن كوڭىلىن سۇراي كەلگەن كورشى-قولاڭدارىن شوشىتىپ ءولدى. اۋىل ىشىندەگى سىبىرلاپ قانا ايتىلاتىن اڭگىمەنى ەستىپ جۇرگەن شەشەم ماعان: "ول كىسى اتى شۋلى 37-ءشى جىلى تالاي اۋىلداسىنىڭ ۇستىنەن "دومالاق ارىز" ءتۇسىرىپ، نكۆد-عا ۇستاتىپ جىبەرگەن زالىم بولعان ەكەن..." - دەدى. "بۇل دۇنيەنىكى و دۇنيەگە كەتپەيدى، بىرەۋگە قيانات جاساعان جان جازاسىز قالمايدى دەگەن وسى", - دەپ تۇيىندەدى.

مەن انامنىڭ سول ءسوزىن ءومىر بويى ەسىمنەن شىعارماي، ەشكىمنىڭ الا ءجىبىن اتتاماۋعا، ەش ادامعا قيانات جاساماۋعا تىرىستىم. اياعىمنان شالعان دۇشپانىمدى دا ءوز ورنىنا قويعانىم بولماسا، سوڭىنا ءتۇسىپ، قۋدالامادىم...

كارىباي مۇسىرماننىڭ الەۋمەتتىك جەلىدەگى جازباسىنان

Abai.kz