جۇما, 14 تامىز 2020
COVID-19 قازاقستاندا. جۇقتىرعاندار — 101848. جازىلعاندار — 78633. قايتىس بولعاندار — 1269
1820 33 پىكىر 3 شىلدە, 2020 ساعات 14:49

استانادا نۇرسۇلتان نازارباەۆقا مونۋمەنت ورناتىلدى

استاناداعى ۇلتتىق قورعانىس ۋنيۆەرسيتەتىنىڭ الدىنا قازاقستاننىڭ بۇرىنعى پرەزيدەنتى، قاۋىپسىزدىڭ كەڭەسىنىڭ جانە «نۇر وتان» پارتياسىنىڭ توراعاسى نۇرسۇلتان نازارباەۆقا ارنالعان مونۋمەنت ورناتىلدى. بۇل تۋرالى «tengrinews.kz» جازدى.

ەل پرەزيدەنتى قاسىم-جومارت توقاەۆ مونۋمەنتتىڭ اشىلۋ راسىمىنە ونلاين رەجيمدە قاتىستى. ول ءوزىنىڭ قۇتتىقتاۋ سوزىندە نۇرسۇلتان نازارباەۆتىڭ قازىرگى قازاقستاننىڭ نەگىزىن قالاعانىن، تاۋەلسىز قازاقستان تاريحىنداعى نازارباەۆتىڭ الار ورنى مەن ۇستانعان ساياساتى تۋرالى ايتىپتى.

«تۇراقتىلىق پەن تاتۋلىق، بەرەكە مەن بىرلىك – ەلباسىنىڭ سارابدال ساياساتىنىڭ ناتيجەسى. كەز كەلگەن مەملەكەتتىڭ تاريحىندا وشپەس ءىز قالدىرعان بىرەگەي تۇلعالار بار. ولاردىڭ سىڭىرگەن ەڭبەگىن باعالاي ءبىلۋ جانە جان-جاقتى دارىپتەۋ – وسكەلەڭ ۇرپاقتىڭ پارىزى»، – دەدى قاسىم-جومارت توقاەۆ.

مەملەكەت باسشىسىنىڭ ايتۋىنشا، قازاقستاننىڭ قارۋلى كۇشتەرى تۇڭعىش پرەزيدەنتتىڭ جارلىعىمەن قۇرىلعاندىقتان، بۇل مونۋمەنتتىڭ ۇلتتىق قورعانىس ۋنيۆەرسيتەتىندە ورناتىلۋىنىڭ سيمۆولدىق ءمانى زور.

«تاۋەلسىزدىك العان ساتتەن باستاپ نۇرسۇلتان ءابىشۇلى نازارباەۆ اسكەري الەۋەتىمىزدى قالىپتاستىرۋ بارىسىندا ەڭ كۇردەلى دەگەن ماسەلەلەردى شەشۋگە ءوزى تىكەلەي ارالاستى. ونىڭ باسشىلىعىمەن حالقىمىز بەن ەلىمىزدى ىقتيمال اسكەري قاقتىعىستاردان قورعاۋ ماقساتىندا ارميامىزدىڭ پەرسپەكتيۆالارى مەن مىندەتتەرى، ۇلتتىق قاۋىپسىزدىكتى قامتاماسىز ەتۋدىڭ باسىمدىقتارى مەن مەحانيزمدەرى ايقىندالدى. نۇرسۇلتان نازارباەۆ پرەزيدەنت بولعان جىلدارى اسكەري قۇرىلىمنىڭ زاڭنامالىق جانە قۇقىقتىق-نورماتيۆتىك بازاسى ازىرلەندى. سونداي-اق قارۋلى كۇشتەردىڭ قۇرىلىمى مەن قۇرامى جاساقتالىپ، ارميانىڭ قارۋلانۋى كەزەڭ-كەزەڭىمەن ىسكە اسىپ، زاماناۋي ينفراقۇرىلىم قالىپتاستى»، – دەدى قاسىم-جومارت توقاەۆ.

ايتا كەتەيىك، 6 شىلدە ەكس-پرەزيدەنت نۇرسۇلتان نازارباەۆتىڭ تۋعان كۇنى جانە استانا كۇنى. بيىل نازارباەۆ 80 جاسقا تولادى. وسىعان دەيىن پرەزيدەنت توقاەۆتىڭ ەلباسى تۋرالى ماقالاسى «ەگەمەن قازاقستان» گازەتىندە جاريا بولعان ەدى.

نۇرسۇلتان نازارباەۆتىڭ قازىرگى قىزمەتتەرى:

ول بىلتىر ناۋرىزدا پرەزيدەنت وكىلەتىن توقتاتاتىنىن مالىمدەگەن. بىراق «نۇر وتان» پارتياسىنىڭ ليدەرى جانە قاۋىپسىزدىك كەڭەسىنىڭ توراعاسى قىزمەتىندە قالدى.

- قازاقستان رەسپۋبليكاسىنىڭ قاۋىپسىزدىك كەڭەسىنىڭ توراعاسى،

- «Nur Otan» پارتياسىنىڭ توراعاسى،

- قازاقستان حالقى اسسامبلەياسىنىڭ توراعاسى،

- قازاقستان رەسپۋبليكاسى ۇلتتىق ءال-اۋقات قورىن باسقارۋ جونىندەگى كەڭەستىڭ توراعاسى،

- نازارباەۆ ۋنيۆەرسيتەتى، زياتكەرلىك مەكتەبى جانە قوردىڭ جوعارى قامقورشىلىق كەڭەسى توراعاسى،

- دۇنيەجۇزى قازاقتارى قاۋىمداستىعىنىڭ توراعاسى.

نۇرسۇلتان نازارباەۆتىڭ اتاقتارى مەن ماراپاتتارى:

- «ەلباسى» ستاتۋسى،

- «قۇرمەتتى سەناتور» اتاعى،

- «ەۋرازيا ەكونوميكالىق وداعىنىڭ قۇرمەتتى توراعاسى» اتاعى،

- «تۇركىتىلدەس مەملەكەتتەردىڭ ىنتىماقتاستىعى كەڭەسىنىڭ عۇمىر بويعى قۇرمەتتى توراعاسى» مارتەبەسى،

نۇرسۇلتان نازارباەۆتىڭ قازاقستاننان العان جانە شەتەلدىك عىلىمي اتاقتارى مەن لاۋازىمدارى تۋرالى ءبىز بۇعان دەيىن دە جازعان ەدىك.

بۇلاردان بولەك، قازاقستاندا ەلوردا، اۋەجاي، ءىرى قالالارداعى باستى كوشەلەر نۇرسۇلتان نازارباەۆتىڭ اتىمەن اتالادى. سونداي-اق ونىڭ بىرنەشە ەسكەرتكىشى بار.

Abai.kz

33 پىكىر