دۇنيەجۇزىلىك بانك قازاقستانعا مال شارۋاشىلىعىن دامىتۋ ءۇشىن 500 ميلليون دوللار بەرەدى. بۇل تۋرالى قر اۋىلشارۋاشىلىق مينيسترلىگى حابارلادى.

«دۇنيەجۇزىلىك بانكتىڭ ديرەكتورلار كەڭەسى ۆاشينگتوندا (اقش) قازاقستان ءۇشىن دايىندالعان «مال شارۋاشىلىعىن تۇراقتى دامىتۋ» جوباسىن قارجىلاندىرۋ تۋرالى شەشىم قابىلدادى»، - دەپ جازىلعان مينيسترلىك اقپاراتىندا.

كەلەسى قادام - ء​​تيىستى نەسيە كەلىسىمىنە قول قويۋ. بولجام بويىنشا ول اعىمداعى جىلدىڭ كۇزىندە وتەدى.

جوبا شارتى بويىنشا رەسپۋبليكاعا مال شارۋاشىلىعىن جان-جاقتى دامىتۋعا 500 ميلليون اقش دوللارى بولىنەدى. بانك ازىرلەگەن جوسپار 5 جىل ىشىندە - 2021 جىلدان 2025 جىلعا دەيىن جۇزەگە اسىرىلۋى كەرەك. وسى كەزەڭدە قازاقستان قورشاعان ورتاعا تەرىس اسەرىن تيگىزبەستەن، مال ەتىن ءوندىرۋدىڭ ەكسپورتقا باعىتتالعان سەكتورىن دامىتۋعا جانە كوبەيتۋگە مىندەتتى.

جوبانى ىسكە اسىرۋدا قازاقستان ءۇشىن مۇلدەم جاڭا قارجى قۇرالى - ناتيجەگە باعىتتالعان باعدارلاما (نبب) نەسيەسى قولدانىلادى. بۇل مەحانيزم قارىز الۋشىعا قاراجات كەلىسىلگەن ناتيجەگە جەتكەن كەزدە عانا تولەنەتىن بولادى.

جوبانىڭ نەگىزگى ناتيجەسى ۆەتەرينارلىق قىزمەتتەر مەن جانۋارلاردى تىركەۋدى جاقسارتۋ جانە ەت سالاسى ءۇشىن ءتيىمدى اگروەكولوگيالىق ساياسات ورناتۋ.

سونداي-اق، ەكسپورت پەن باسەكەگە قابىلەتتىلىكتىڭ تۇراقتى ءوسۋى ءۇشىن باقىلاۋ جۇيەسى جاسالادى، ۆەتەريناريا قىزمەتى جاڭعىرتىلىپ، سيىر ەتىن وسىرۋمەن اينالىساتىن فەرمەرلەردىڭ بىلىكتىلىگىن ارتتىرۋ  جۇيەسى قۇرىلادى.

سونىمەن قاتار، جۇمىس ورىندارىن قۇرۋ جانە اۋىل تۇرعىندارىنىڭ كىرىستەرىن ارتتىرۋ ماقساتى  كوزدەلىپ وتىر. بورداقىلاۋ الاڭدارىمەن بىرلەسىپ جۇمىس جاسايتىن 20 مىڭنان استام وتباسىلىق فەرمالاردى قۇرۋدى قولداۋ جوسپاردا بار.

Abai.kz