قازىر قاۋىپتى ىندەت قاھارىنا ءمىنىپ تۇر. كۇن سايىن ىندەت جۇقتىرعان مىڭ شاقتى ادام تىركەلۋدە. مينيسترلىكتىڭ سوڭعى مالىمەتىنە سۇيەنسەك، قازىر ەلىمىزدە كوروناۆيرۋس جۇقتىرعاندار سانى – 50 مىڭعا جۋىقتاعان. 264 ادام ءدال وسى ىندەتتەن قايتىس بولعان. ارىدەگىسىن ايتپاعاندا، سوڭعى ءبىر اپتادا، 30 ماۋسىم مەن 6 شىلدە ارالىعىندا 76 ادام كۆي-دەن كوز جۇمعان.  بۇدان بولەك، رەسپۋبليكا بويىنشا پنەۆمونيا دياگنوزىمەن 28 مىڭ ادام اۋرۋحانالاردا جاتىر ەكەن. بۇل دا مينيسترلىكتىڭ ءوز دەرەگى.

وسىنداي الاعاي دا بۇلاعاي كەزدە ەل ىشىندە الىپ-قاشپا اڭگىمە دە كوبەيگەن. كۇندىز-ءتۇنى ءدارىحانالاردا ۇزىن-سونار كەزەك. «جاۋ جاعادان العاندا، ءبورى ەتەكتەن الادى» دەگەندەي، ۇرەيلى جۇرتتىڭ قالتاسىنا قاراپ، قۇلقىنى جىبىرلاپ، قۋلىقتى ويلاعان الدەكىمدەر جاڭاعى ءدارى-دارمەكتىڭ باعاسىن اسىرىپ ساتىپ جاتقانى دا اقپاراتتا ايتىلدى. وعان ەلدەگى ءدارى-دارمەك جەتىسپەۋشىلىگىن تاعى قوسىڭىز...

ەل اۋزىندا ءارتۇرلى اڭگىمە. «پالەن دەگەن ەم ەكەن، تۇگەن دەگەن ءجون ەكەن» دەسكەن جۇرت بازار مەن ءدارىحانا كەزىپ تەنتىرەپ ءجۇر. ال اعارتۋشىلىق باعىتتاعى اقپارات جوقتىڭ قاسى. قۇزىرلىلار كۇن سايىن ىندەت جۇقتىرعانداردىڭ سانىن ەسەپتەۋ مەن «كارانتين تالاپتارىن ساقتاڭىزدار» دەگەننەن وزگە جارىتىپ اقپارات تاراتا قويعان جوق. ەسەسىنە، الەۋمەتتىك جەلىدە اڭگىمە كوپ. ەل جىلت ەتكەن ءاربىر اقپاراتقا ەلەڭدەپ وتىر. ءاربىر ايتىلعان اقپاراتقا سەنەدى.

وسى رەتتە ءبىز «Abai.kz» اقپاراتتىق پورتالى تۇراقتى تۇردە جۇرگىزىپ كەلە جاتقان ينتەرنەت-كونفەرەنتسيانى – كوروناۆيرۋس تاقىرىبىنا ارناعاندى ءجون كوردىك.

ينتەرنەت-كونفەرەنتسيا سپيكەرى – ادىلبەك جاقسىبەكۇلى نۇرىمبەتوۆ. ورال قالاسىنداعى 4-ءشى جۇقپالى اۋرۋلار ەمحاناسىنىڭ I ساناتتى ينفەكتسيونيست دارىگەرى.

ادىلبەك جاقسىبەكۇلى وسىعان دەيىن دە Facebook جەلىسىندە اعارتۋشىلىق باعىتتاعى اقپاراتتار جاريالاپ وتىرعان. ءبىراز ۋاقىت بۇرىن ءوزى دە كۆي جۇقتىرىپ، ەمدەلىپ شىققان.

كوروناۆيرۋستى جۇقتىرماۋ ءۇشىن نە ىستەۋ كەرەك؟ قازىر بازارلارمەن مەن ءدارىحانالاردا دەفيتسيتكە اينالعان قۇيرىق ماي مەن اسپيرين، پاراتسەتامول سەكىلدى انتيبيوتيكتەر قانشالىقتى پايدالى؟ ۇيدە ەم قابىلداپ جاتقان ازاماتتار نە ىستەيدى؟ كۆي-ءدى بولدىرماۋ ءۇشىن نەمەسە ونىڭ بەتىن قايتارۋ ءۇشىن ەڭ ءتيىمدى ەم قانداي؟

وسى جانە وزگە دە ءسىزدى جانە ءسىزدىڭ جاقىندارىڭىزدى الاڭداتقان ساۋالدارعا «Abai.kz» سپيكەرى ادىلبەك نۇرىمبەتوۆ جاۋاپ بەرەدى. سپيكەردىڭ اشىق سۇحباتى مەن سىزدەر قويعان ساۋالدىڭ جاۋابى «Abai.kz» اقپاراتتىق پورتالىندا جاريالاناتىن بولادى!

ساۋالدارىڭىزدى جولداي بەرىڭىزدەر، مارحابات، مارتەبەلى وقىرمان!

Abai.kz