مۇنىڭ ءبارى نەنى بىلدىرەدى؟ ءبىزدىڭ قازاق قانداي قيىن شاقتا دا وسىلاي جۇمىلا كەتەدى، اۋزىنان جىرىپ باسقاعا بەرگىسى، وزگەگە كومەكتەسكىسى كەلىپ تۇرادى جانە ەڭ كەرەمەتى ولاردىڭ ەشقايسىسى سول ساۋاپتى ءىسى ءۇشىن قايىرىم سۇرامايدى. وسى جىلۋعا اقشا قوسىپ جاتقانداردىڭ كوبى – نە باسپاناسى، نە كولىگى، ءتىپتى قىزمەتى دە جوق ەڭ قاراپايىم جۇرت. قالاي عانا مەيىرلەنبەيسىڭ!

بۇل قاسيەت بىزگە قايدان كەلدى؟ قان ارقىلى ءسىڭدى. قازاقتا اسار، جىلۋ، بايعازى، ەرۋلىك، كەۋسەن، بايلاۋ، شۇلەن، ساۋىن دەەەپ كەتە بەرەتىن قايىرىمدىلىقتىڭ سان اتاسى بولدى. كوبىن قازىر ۇمىتىپ بارامىز. وتتەگى كونتسەنتراتورىنا اقشا جيناۋ – وسىنداعى جىلۋ ءداستۇرى. قازىر دامىعان ەلدەردە "كراۋفاندينگ" دەگەن نارسە بار. ول – وسى جىلۋ جيناۋدىڭ زاماناۋي ءتۇرى. بىراق ولار بىرەۋگە ءبىر تيىن بەرۋ ءۇشىن بۇگە-شۇگەسىنە دەيىن سۇراپ، زەرتتەپ بارىپ بەرەدى. ال ءبىزدىڭ قازاق قالتاسىنداعى بارىن شىن سەنىممەن، شىنايى كوڭىلمەن ۇسىنادى.

بۇرىنعى قازاق توق ادامنىڭ اش ادامعا، ساۋ ادامنىڭ ناۋقاس ادامعا، باي ادامنىڭ كەدەي ادامعا جىلۋ بەرۋى – قۇداي الدىنداعى قارىز دەپ بىلگەن. قۋاناتىنىمىز، قازىر دە سولاي. اللا ءبىزدى وسى قاسيەتىمىزدەن ايىرماسىن! جىلۋ جۇرەكتى جىلىتادى. جىلۋعا اقشاسىن قوسقان، دۇعاسىن قوسقان بارشا قايىرىمدى جانداردى ءتاڭىر جارىلقاسىن!