تسوي ەسەپتەن جاڭىلدى ما، الدە شىن ستاتيستيكا وسى ما؟
بۇگىن كوروناۆيرۋس پەن پنەۆمونيا ستاتيستيكاسىنىڭ بىرىكتىرىلەتىنىن ايتقان قر دەنساۋلىق ساقتاۋ ءمينيسترى الەكسەي تسوي جىل باسىنان بەرى 234 مىڭنان استام ادامنىڭ پنەۆمونياعا شالدىققانىن مالىمدەدى.
«وسى جىلدىڭ 1 قاڭتارىنان 15 شىلدەسىنە دەيىن قازاقستاندا 234 187 ادام پنەۆمونيامەن اۋىرعان. بۇل – وتكەن جىلدىڭ كورسەتكىشىمەن سالىستىرعاندا 3,3 ەسە كوپ (70 926 ادام)»، - دەدى الەكسەي تسوي.
مينيستر تسويدىڭ ايتۋىنشا، جىل باسىنان بەرى 15 شىلدەگە دەيىن 3327 ادام وسى پنەۆمونيادان قايتىس بولعان.
ەندى ءسال كەرى شەگىنىس جاسايىق. 11 شىلدە كۇنى پرەزيدەنت قاسىم-جومارت توقاەۆتىڭ قاتىسۋىمەن ۇكىمەتتىڭ كەڭەيتىلگەن وتىرىسى وتكەنىن بىلەسىزدەر. ول جيىندا پرەزيدەنت توقاەۆ ەلدەگى ەپيدەميولوگيالىق جاعدايدى رەتتەۋ ءۇشىن ۇكىمەتكە 2 اپتا ۋاقىت بەرگەن.
مىنە، سول جيىندا ءسوز الىپ، ەسەپ قىلعان دەنساۋلىق ساقتاۋ ءمينيسترى الەكسەي تسوي جىل باسىنان بەرى, ياعني، 1 قاڭتار مەن 30 ماۋسىم ارالىعىندا ەلىمىزدە 98 546 استام ادامنىڭ پنەۆمونياعا شالدىققانىن ايتقان.
«2020 جىلدىڭ العاشقى جارتى جىلىندا ەلىمىزدە پنەۆمونياعا شالدىققاندار سانى وتكەن جىلمەن سالىستىرعاندا 55,4 پايىزعا كوبەيىپ، 98 546 ادامعا جەتتى (2019 جىلى 63 436 بولعان). 2020 جىلدىڭ ماۋسىم ايىندا 32 724 ادام پنەۆمونيامەن تىركەلدى. بۇل كورسەتكىش 2019 جىلى 7 964 ەدى»، - دەگەن مينيستر تسوي.
ول سونداي-اق، 2020 جىلدىڭ جارتى جىلىندا 1772 ادام باكتەريالدى جانە ۆيرۋستى پنەۆمونيادان قايتىس بولعانىن ايتقان.
«ەگەر وتكەن جىلعى جاعدايمەن سالىستىرساق، بيىل التى اي ىشىندە 1772 ادام قايتىس بولدى. ال 2019 جىلى 1780 ادام كوز جۇمعان ەدى»، - دەگەن مينيستر.
مينيستر الەكسەي تسوي ول جولى (11 شىلدەدە) 2020 جىلدىڭ 1 قاڭتارى مەن 30 ماۋسىم ارالىعىنداعى ەسەپتى كورسەتكەن. ال بۇگىن 1 قاڭتار مەن 15 شىلدە ارالىعىنداعى ەسەپتى جاريا ەتتى. ول بويىنشا پنەۆمونياعا شالدىققاندار سانى 234 187 ادام، ال وسى دەرتتەن قايتىس بولعاندار سانى 3327 ادام دەپ كورسەتىلگەن.
قاراپايىم اريفمەتيكاعا سالساق، 1-15 شىلدە ارالىعىندا 135 641 ادام پنەۆمونياعا شالدىعىپ، 1555 ادام وسى باكتەريالدى جانە ۆيرۋستى پنەۆمونيادان كوز جۇمعان.
1) 234 187 - 98 546 = 135 641 ادام ىندەتتى.
2) 3327 - 1772 = 1555 ادام قايتىس بولعان.
مينيستر ەسەپتەن جاڭىلدى ما، الدە شىن ستاتيستيكا وسى ما؟
Abai.kz
