بەلگىلى ءدىنتانۋشى عالىم قايرات جولدىبايۇلى قازاقستاندىقتارعا ۇندەۋ جاساپ، ىندەتتەن ساقتانۋ ءۇشىن توي-دۋمانعا، ءدىني راسىمدەرگە ۋاقىتشا بارماۋعا شاقىردى. 

- ارداقتى اعايىندار! قازىرگى ىندەتكە بايلانىستى مەن سىزدەرگە ماڭىزدى ءبىر ۇندەۋ تاستاعىم كەلىپ وتىر. جانازا كوبەيدى. كۇن سايىن قارالى حاباردى ەستىپ، جۇرەگىمىز اۋىرىپ، كوڭىلىمىز قۇلازىپ، قابىرعامىز قايىسۋدا. وكىنىشكە وراي، ءالى كۇنگە دەيىن اۋىل-اۋىلدا، ءتىپتى قالالاردا قۇدالىق سياقتى توي-تومالاق ءالى ۇزىلمەي تۇر، جالعاسىپ جاتىر. سونى دوعارىڭىزدار. بولمايدى... سەبەبى سول قۇدالىققا، سول قۋانىشقا كەلگەن كىسىلەردىڭ اراسىنان وسىناۋ دەرتكە شالىنىپ، قانشاما ادام مىنا دۇنيەمەن قوشتاسىپ جاتىر. سوندىقتان تويدى، تومالاقتى، قۇدالىق سياقتى راسىمدەردى دوعارىڭىزدار. قازىر جانازا كوپ، قۇرمەتتى اعايىندار، ەت جاقىنى بولماساڭىزدار، جانازا راسىمدەرىنە بارماڭىزدار.

قۇرمەتتى جانازا يەلەرى، اعايىن-تۋىسقا: «ءبىز سىزدەردى تۇسىنەمىز، جانازاعا كەلمەي-اق قويىڭىزدار. مىنا ىندەت بىتكەننەن كەيىن، ولىمگە قاتىستى بارلىق ءراسىمدى جاسايمىز، سول كەزدە كەلەسىزدەر» دەپ ايتىڭىزدار. قۇرمەتتى اعايىندار، از عانا قازاق قىرىلىپ قالماسىن دەسەك، توي-دۋماندى، قۇدالىق سياقتى راسىمدەردى توقتاتىڭىزدار. جانازاعا بارماڭىزدار، - دەدى عالىم.

Abai.kz