جارناماسىن كورىپ «تاعى ءبىر قازاق كينوسى دۇنيەگە كەلدى»، دەپ  جادىراپ قالدىق. تەاتر سالاسىندا جۇرگەن تەمەنوۆتىڭ كينو الەمىندەگى تىڭ ەڭبەگىن كورۋگە اسىقتىم. «ماحاببات بەكەتى» ءوز زامانىندا وزىق تۋىندى بولعانى بەلگىلى. «مەنىڭ كۇنالى پەرىشتەم»، اتىن ەستىگەندە ەلەڭ ەتە قالعانىم راس. «پەرىشتەدەن نە كۇنا تاپتى ەكەن» دەپ، الايدا ادەبي الەمدە اسىرەلەۋ، كوركەمدەۋ دەگەن دۇنيە بارىن ەسكەرىپ، ءبىر توقتادىم.

كەشكىسىن جۇمىستان سوڭ دوستارىممەن بىرگە كينوتەاتردى بەتكە الدىق. پرەمەرانىڭ ەكىنشى كۇنى بولعاندىقتان بيلەتسىز قالامىز با دەپ ەرتەرەك بارعان ءتۇرىمىز. الايدا، كورسەتىلىمگە 10 مينۋت قالعاندا كاسسانىڭ الدىنان تابىلدىق. زالدىڭ جارتىسىنا بيلەت ساتىلماپتى. ورنىمىزعا جايعاسىپ تىڭ تۋىندىنى تاماشالاۋعا كىرىستىك. بۇرىندارى ءوز باسىمدا  كورگەن كينونى ساراپتاۋ، كەمشىلىگىن جىپكە ءتىزۋ، استارىنا ءۇڭىلۋ دەگەن بولماۋشى ەدى. ارى بارسا، دوستار اراسىندا كىشىگىرىم پىكىر الماسۋمەن شەكتەلەتىنمىن. بۇل جولى ولاي بولمادى. كينونىڭ ءون بويىنان الدەقانداي ەستەتيكا، كوركەمدىك، مورال ىزدەگەن ەدىم، كوز الدىمنان كولبەڭدەپ كولدەنەڭ كورىنىستەر كەتپەي قويدى. بۇل مەن سياقتى قاراپايىم كورەرمەننىڭ كوڭىلىنىڭ تۇيگەنى.

حوش، فيلم باستالدى. ءا دەگەننەن تۇسىنىكسىز جايتقا تاپ بولدىم. قارت كىسىنىڭ قالاۋىمەن بوساتىپ جىبەرگەن ازاماتتى (باستى رولدەگى جىگىت) كۇزەتشىلەر قايتادان قۋا جونەلەدى. نەگە قاشتى جانە قۋعا نە سەبەپ بولدى؟

جارناماسىن كورىپ «تاعى ءبىر قازاق كينوسى دۇنيەگە كەلدى»، دەپ  جادىراپ قالدىق. تەاتر سالاسىندا جۇرگەن تەمەنوۆتىڭ كينو الەمىندەگى تىڭ ەڭبەگىن كورۋگە اسىقتىم. «ماحاببات بەكەتى» ءوز زامانىندا وزىق تۋىندى بولعانى بەلگىلى. «مەنىڭ كۇنالى پەرىشتەم»، اتىن ەستىگەندە ەلەڭ ەتە قالعانىم راس. «پەرىشتەدەن نە كۇنا تاپتى ەكەن» دەپ، الايدا ادەبي الەمدە اسىرەلەۋ، كوركەمدەۋ دەگەن دۇنيە بارىن ەسكەرىپ، ءبىر توقتادىم.

كەشكىسىن جۇمىستان سوڭ دوستارىممەن بىرگە كينوتەاتردى بەتكە الدىق. پرەمەرانىڭ ەكىنشى كۇنى بولعاندىقتان بيلەتسىز قالامىز با دەپ ەرتەرەك بارعان ءتۇرىمىز. الايدا، كورسەتىلىمگە 10 مينۋت قالعاندا كاسسانىڭ الدىنان تابىلدىق. زالدىڭ جارتىسىنا بيلەت ساتىلماپتى. ورنىمىزعا جايعاسىپ تىڭ تۋىندىنى تاماشالاۋعا كىرىستىك. بۇرىندارى ءوز باسىمدا  كورگەن كينونى ساراپتاۋ، كەمشىلىگىن جىپكە ءتىزۋ، استارىنا ءۇڭىلۋ دەگەن بولماۋشى ەدى. ارى بارسا، دوستار اراسىندا كىشىگىرىم پىكىر الماسۋمەن شەكتەلەتىنمىن. بۇل جولى ولاي بولمادى. كينونىڭ ءون بويىنان الدەقانداي ەستەتيكا، كوركەمدىك، مورال ىزدەگەن ەدىم، كوز الدىمنان كولبەڭدەپ كولدەنەڭ كورىنىستەر كەتپەي قويدى. بۇل مەن سياقتى قاراپايىم كورەرمەننىڭ كوڭىلىنىڭ تۇيگەنى.

حوش، فيلم باستالدى. ءا دەگەننەن تۇسىنىكسىز جايتقا تاپ بولدىم. قارت كىسىنىڭ قالاۋىمەن بوساتىپ جىبەرگەن ازاماتتى (باستى رولدەگى جىگىت) كۇزەتشىلەر قايتادان قۋا جونەلەدى. نەگە قاشتى جانە قۋعا نە سەبەپ بولدى؟

قاشقان بويدا كونتسەرت زالىنا تاپ بولعان ازامات ساحنادا دايىندىق جۇرگىزىپ وتىرعان ايشانىڭ (باستى رولدەگى بويجەتكەن) اۋەزدى اۋەنىنە ەلىتەدى. وسى تۇستاعى ءبىر دەتالدى كورەرمەن بايقاماۋى مۇمكىن ەمەس. ول - كۇيساندىق ۇستىندە قالعان سىرعا. قىزدىڭ قۇلاعىندا باسقا سىرعا، جىگىت قولىندا قالعان سىڭار سىرعا مۇلدەم باسقا.

دارىگەر-وقىتۋشىمەن سويلەسكەن ازاماتتىڭ سوزىنەن مىنانى بايقادىق، اكەسىز وسكەن بالا بۇزاقى، كوشە تاربيەسىمەن وسەدى ەكەن. قوعامداعى الەۋمەتتىك ماسەلەنى كوتەرۋدى كوزدەگەنى بايقالادى. اكە تاربيەسىنىڭ وزىندىك ورنى بارى راس. ال قىزدىڭ كۇيەۋگە شىقپاي ءجۇرۋى دە اكەسىزدىكتىڭ كەسىرى ەكەن. ونى شەشەسىمەن اڭگىمەلەسكەندە بايقادىق.

مالدارىگەرلىك ورتالىققا كەلگەن ازامات جۇمىسقا قايتا كىرگىسى كەلگەنىن ايتادى. ال دارىگەر «بۇل ساعان تسيرك ەمەس، جانۋارلاردى ءتۇسىنۋ كەرەك» دەپ جاۋاپ قاتتى. سوندا تسيركتە جانۋارلاردى تۇسىنبەيدى ەكەن. كەرىسىنشە، جانۋارلار مەن ادامداردىڭ ەڭ جاقىن، ەڭ ەتەنە ارالاساتىن ورنى تسيرك ەمەس پە؟

ەڭ سوراقىسى، ايشا ءان سالعاندا اۋزىنىڭ قيمىل-قوزعالىسى كادر سىرتىنداعى انگە مۇلدەم سايكەس كەلمەيدى، ياعني سينحروننوست جوق. ءۇش جەردە وسى بايقالدى. ءاندى ءوزى ورىنداپ جاتپاعانى بەلگىلى، تىم بولماسا ءماتىندى جاتتاپ السا بولار ەدى.

فيلمدە يماندىلىق ماسەلەسى بار. ول مەشىت ارقىلى كورىنەدى. باستى كەيىپكەردىڭ ماڭدايىن ساجدەگە قويىپ، وتكەن-كەتكەنىنە وكىنگەنى بولار، ونى مەشىتتەگى جاماعات اراسىنان كورەمىز. الايدا اللانىڭ ءۇيى اڭگىمەلەسەتىن ورىن ەمەس. وگەي اكەسى ەكەۋى مەشىت سىرتىندا-اق سويلەسسە بولار ەدى. قۇلشىلىق ورنىنىڭ قۇنىن ءتۇسىرىپ جىبەرگەن جوق پا دەگەن ويدا قالدىق.

ال ايشانىڭ قۇربىسىن قاسىنا الىپ، قالانى شارق ۇرىپ ازاماتتى ىزدەۋى «يرونيا ليۋبۆي» فيلىمىنەن اۋماي قالدى. ءدال وسى سيۋجەتتەردەن «قازىرگى زاماندا جىگىت قىزدى ەمەس، قىز جىگىتتى ىزدەيدى» دەگەن يدەيانىڭ باسى قىلتيادى. ول راس تا شىعار. الايدا بۇل قازاق قىزىنا مۇلدەم جات ارەكەت. ءفيلمنىڭ ەڭ نەگىزگى كوتەرگەن ويى - اجارى كەلىسكەن، سىمباتتى، بىراق اقشاسىز ارۋلار بايلاردىڭ ويناسى بولۋى كەرەك. ونسىز ونەر الەمىنە ورلەۋ، تابىسقا جەتۋ مۇمكىن ەمەس.

ازاماتتىڭ كوشە بۇزىقتارىنا قوسىلىپ، سولاردىڭ شىرماۋىندا جۇرگەنى ەمىس-ەمىس بايقالدى. ولاردان ورداسىن بولەك سالۋدى كوزدەگەن جىگىتتى جولدان توسىپ الادى. ال ۇرى-قارى، كوشە جىگىتتەرىنە ازاماتتىڭ اناسى كۇيەۋگە تيگەن-تيمەگەنى نە كەرەك. ءتىپتى، تويعا شاقىرمادىڭ دەپ تيىسەدى، ەكىنشى رەت كۇيەۋگە شىعىپ جاتقان ورتا جاستاعى ايەلگە توي جاساۋ دەگەندى كوز كورىپ، قۇلاق ەستىمەپتى ءالى كۇنگە.

اسحات (ايشانىڭ ويناسى) - جالعاندى جالپاعىنان باسقان دوكەي. ايشا ءۇشىن اسپانداعى ايدى اپەرۋگە ءازىر. جايىلىپ جاستىق، ءيىلىپ توسەك بولادى. بولماعاندا شە، ءوزى ءانشى، سىمباتتى، جاياۋ ادام جاتىپ قارايتىن، اتتى ادام ءتۇسىپ قارايتىن كوركى بار. سۇلۋلىعى سونشا فرانتسۋز جەرار دەپاردەنىڭ ءوزى اۋزىنان سۋى قۇرىپ تامسانا قارايدى. بىراق، تىم ءىشىپ-جەپ قاراۋى ىڭعايسىزداۋ بولدى.

رەجيسسەر ەركىندىك پەن بوستاندىقتى قالىقتاعان قۇسپەن، تاۋدا جورتقان تاعىمەن بەينەلەيدى. بىراق ۆيدەولاردىڭ ساپاسىز ەكەنىن ايتپاسا بولمايدى. بۇل - كينو، ەستەتيكا الەمى. ءون بويىنان شىنايىلىقپەن قوسا، اسەمدىك بايقالىپ تۇرۋ كەرەك. ءتىپتى، ءبىر-ەكى تۇستا، ميكروپلان دا كوزگە شالىندى. ال يپپودرومدا جەر تارپىعان اتتىڭ پلانىن ەكى رەت بەرۋدىڭ نە قاجەتتىلىگى بولدى ەكەن؟

ارى قاراي قوزعالايىق، ماحابباتىن ونەردەن ارتىق قويعان ايشا پاريجدەن قايتىپ ورالدى. ەگىس دالاسىندا جۇرگەن ازاماتىن دا تاپتى. سول ساتتەگى جىگىتتىڭ كەلبەتى، جۇگەرى جيناپ جۇرگەن ادامنان ماشينا جوندەيتىن ادامعا كوبىرەك ۇقسايدى. ءۇستى-باسى، بەتى قاپ-قارا ماي. مۇمكىن باسقاشا شەشىم جاساعاندا بولار ما ەدى.

كينونىڭ ءون بويىنداعى سىلقىمدار تىم جەڭىلتەك. كوشە بويىنداعى بيكەشتەردەن ەش ايىرماشىلىعى جوق. جۇرگەن ءجۇرىس، كيگەن كيىم، سويلەگەن سوزدەرى قازاق قىزىنا جات.

ارينە، بىتكەن ىسكە سىنشى كوپ. مىقتى بولسا ءوزى ءتۇسىرىپ المايدى ما دەپ وتىرعاندار دا بار بولار. اركىم ءوز ىسىنە جاۋاپتى، ءوز ءىسىنىڭ شەبەرى بولعان دۇرىس-اۋ. ونسىز دا تۇرالاپ تۇرعان قازاق كينوماتوگرافياسى تاعى ءبىر شالاعاي دۇنيەمەن تولىققانداي بولدى. ماقساتىمىز كورەرمەنگە كورىم دۇنيەلەر جول تارتسا ەكەن دەگەن نيەت قانا. ءفيلمنىڭ كوڭىلگە قونىمدى، ويلاندىرار تۇستارى دا بارىن جوققا شىعارمايمىز. ونى كوپشىلىك كورەرمەن بايقاپ، باعاسىن بەرىپ جاتار. بۇل - مەن سياقتى قاراپايىم كورەرمەننىڭ كوزىنە شالىنعان كولدەنەڭ كورىنىستەر دەپ ۇقساڭىزدار دەيمىن.

ر/S فيلم سوڭىنداعى تيترداعى قاتەلەردەن كوز سۇرىنەدى. مىسالى، «ساعىندىم الماتىمدى» «ساعىندىم امالاتىمدى»، «كازكوممەرتسبانك» - «كازكومەرتسبانك»، تاعى باسقا ۇساق-تۇيەك ءارىپ قاتەلەر بار. باز بىرەۋلەرگە راسىندا ۇساق دۇنيە كورىنۋى مۇمكىن. مەن ءۇشىن ولاي ەمەس.

«اباي-اقپارات»